¹ Kẹkẹ ona ghyi aghyiukọ ni ọ la uka ni o la elemhi Isadisi: ''Ingmemhi ọni ọ nwu iyẹmhẹ Ishinẹgba ishila ali itata ishila mhọ obọ. ''Mhi yẹsẹ emeni vhaa khyiẹ. Vha nyele inyele ekpẹ, ama khi vha she gwhuloa. ² Chi ekẹ vule ishọyọ khi vha zise izemhi ni o kpọ vhẹ le, ama ọ she laa gwhua, rharhi khi ikanya vhẹ imha khyie mẹ khi e gba pfuse ukpẹloli Ishinẹgba mhẹ ³ Vha sato emeni a rhọ na vhẹ ali emeni vha suọ. Vha rhẹ wẹ gwhẹ, vha pfi egbe denegbe. Ama ni vhavhaa sheda vule, mhi laa bhale abhi ọghyiatọ, vhavha laa yẹsẹ ẹrhẹghẹ na mhi rhọ laa de vhẹ egbe. ⁴ Ama ikwukwu eva iọgbọ Isadisi elelemhi vhẹ li ede vhẹ e vha lee nwu ijomhi. Ee la laa nu mhẹ kyia, e rhi ede epfopfo kwhẹ, rharhi khi irhẹmhi e tẹ vhọ. ⁵ Ọni ọ laa nwule a la laa rhi ede opfopfo kwhẹsẹ, imha laa shishi eva ọli vhi ebe agbọa, abhagwhoyọ mhi ngme ingmemhi ọli khasẹ Ita mhẹ, ali ighiyukọ ọli. ⁶ U kha zẹ esọ, rhi esọ shi emeni oni Ayẹmhẹ o gwu khasẹ eni ika.'' ⁷ ''Kẹkẹ ona ghyi aghyiukọ ni ọ la Ifiladefia: Ingmemhi ọni ọ pfuasẹ ni ọ mhuẹ ingmaghyie, li ọ nwu igoji Idavidi mhọ obọ, ọ kha gweghyiea a vha mẹ ọni ọa gwese ọli, ọ kha gwese a vha mẹ ọni ọ gweghyie ọlia. ⁸ Mhi yẹsẹ ikanya ni vhaa gbe, Ghe, ghe, mhi she gweghyie odẹa na vhẹ ni ọgbọ ọ vha dobẹ a gwese. Mhi yẹsẹ khi ukwukwu izemhi vha mhuẹ, ama rhẹmhi vha rhi ingmemhi mhẹ gbe akanya vhavha khyie eva mhẹ. ⁹ Vha ẹloe kpẹ! Eni e de gboghyiẹ owuka okhyiọ, eni e ẹẹ khi Ijusi wẹwẹ e kyia ni e vha kyila wẹ, olẹmhi li ea pfi. Mhi laa zẹ ni e rhọ laa kwu vhẹ igwhua ẹghẹghẹ, ishọyọ e ke a yẹsẹ khi mhi mhọli ighọli vhẹ. ¹⁰ Abhi vha ke rhọ rhi ingmemhi mhẹ gwhẹ ni vha rhọ rhi obọ nwidu rhi egbe myie, mhi la-laa khẹ vhẹ erhẹghẹ ni ọnwufẹ o rhọ laa bhẹ vhi oni agbona kwu, ni a rhọ laa nwu eni e laa ukhomhi ekẹ fẹ. ¹¹ Mhi kẹlẹ la bhale. Vha nwu emeni vha mhọli zezeze khi ọgbọ ọ ke myie vhẹ arhu eghyiele. ¹² Mhi la-laa rhi ọni ọ mhọli onwule kyili ọchẹ apfẹ Ishinẹgba mhẹ ishọyọ ọ vha la te vhọ lasele gwhe. Mhi la-laa kẹkẹ eva Ishinẹgba mhẹ shi ọ vhi ijegbe, eva ẹvhue Ishinẹgba mhẹ ( Ijerusalemu onogbọ, ni Ishinẹgba mhẹ ọ rhọ te aleghyie kpiale), ali eva mhẹ onogbọ. ¹³ Ọni ọ zẹ esọ, ọ suọ emeni Ayẹmhẹ oo gwhu a khase eni ika. ¹⁴ Kẹkẹ ona ghyi ọni aghyiukọ ni ọ la uka Iladesha: Eni ingmemhi ni e kyili itsẹ, ni e kyili eni a rhi egbe nya ali egbegbe ọtsẹlẹ, ọni ọa mhasẹ obodẹ emeni Ishinẹgba ọ ma kwu. ¹⁵ Mhi yẹsẹ emeni vha she kpọ khyiẹlẹ nee, vhavha pfọ vhavha to! ¹⁶ Rharhi khi vha li tsẹlẹ, vhavha pfọ wẹ khi rhẹmhi vha to, mhi she laa kpa vhẹ unu pfia. ¹⁷ Rharhi khi vhaa ẹẹ khi, ''Eyẹ mhọli ọsuemhẹ, ni a gaa nono kwu'' ẹtsẹkẹ o vha to eyẹ pẹẹ.''Ama khi vha yẹsẹ khi vhẹvhẹ li anya o gaa gbe a nẹẹ, vha zẹ alo, vha banọa. ¹⁸ Vha rhi esọ shi ẹgbhẹ na mhi laa rhọ na vhẹ: Nu mhẹ dẹ igolu ni a nyomhia vhi erhẹ khi vha kẹ pfue, vha sọ egbegbe awulu atuekẹ opfopfo ishọyọ khi vha kẹ gwese omama shi egbe vhẹ egbe shi Ibanọa ni vha banọa, a rhi ovhili tono vhẹ alo khi vha kẹ kee mato. ¹⁹ Eni e sheda ghọli mhẹ kwu, rhẹmhia sase wẹ mhi gwe a wẹna wẹ abhi e lia nyele. Iyọ, mhọli ingmaghyie khi vha mhọli ipfi egbe denegbe. ²⁰ Ghe, ghe, mhi mugha obunodẹ a kphele. A kha mẹ ọni ọ suọ urhuli mhẹ khi ọ gweghyie odẹa, mhi la laa bhale elemhi apfẹ ọli, mhi nu ọli le emenale, lẹ ọ nu mhẹ le. ²¹ Ọni ọ laa nwule, mhi laa rhi obọ obita mhẹ nali shitọ elemhi eghyiele mhẹ, abhi mhi li mhọli onwule na mhi li nu Ita mhẹ shitọ eghyiele ọli. ²² Ọni ọ ze esọ, ọ rhi esọ shi emeni Ayẹmhẹ o ngme a khasẹ eni ika.''