¹ ''Kẹkẹ ona ghyi eghyiukọ ni ọ la Ẹfẹsusi: Ena khi ingmemhi ọnọgbọ oyọ ni ọ mhọli itata ishila shi obọ obita ali ọni ọgbọ ọyọ ni ọ la elemhi iteteva ikpa igolu a kyiakyia lẹ li ọ ngme oni ingmemhi ona'' ² ''Mhi yẹsẹ ikanya ni vha gaa gbe kwu ali ududumhi irhọbọnwidu ni u mhuẹ ali uwa nu eni e kyili iọgbọ enebe rha kwe, u she gwe mhasẹ wẹ fẹ eni e rhi egbe wẹ kyili ighyusomhi Ijesu, ama a she ke mẹ khi olẹmhi e pfi. ³ Mhi yẹsẹ ududumhi irobọnwidu ni vha mhuẹ, khi vha rhọ te ọtomhẹ nebu dọsẹ a lẹ rharhi eva mhẹ, vhavha dobẹ ọ lọsẹ vhẹ. ⁴ Ama ingme na mhi nwu na vhẹ lẹ khi ona, vha she tsua ighọli ikyiatsolo vhẹ pfia. ⁵ Vha sato asha ni vha te pfi obọ dọ. Vha nwegbe lieliẹ vhaa khyiẹli emeni vha kpọ ẹẹ khyiẹ. Sẹkẹnẹ rhẹmhi vha nwegbe pfi deno, mhi laa bhẹ la wolọ eni ẹtsẹkẹ ni a chino ikpa nyanọ vhi asha ni a chino wẹ shi eyọ le. ⁶ Ama vha rhi ona gwhẹ, emeni Inikolatasi ea khyieli vhavha mhọli obọ shi vhọ, ni imha lia nono. ⁷ Vha kha zẹ esọ, vha rhi esọ shi emeni Ayẹmhẹ o ngme aa khasẹ eni ika ena. Ọgbọ ọyọyọ ni ọ laa nwule lẹ mhi laa dobẹ pfanọ eni ikpamhi erhẹ inyele, ni e la owa opfọmhẹ Ishinẹgba ⁸ ''KẹKẹ ona ghyi ọni aghyiukọ ni ọ la uka Isimana: ena khi ingmemhi ọni ọgbọ ọyọ ni ọ kyili ọni ọ kpe alo ni ọ gwe kpe oshimhi, ọni ọ kpọ gwhu, ni ọ ke gwe nyele nena: ⁹ '''Mhi yẹsẹ echọ ali anya vhẹ ( Ama enọsuemhẹ lẹ vha kyia), mhi gwe yẹsẹ eni ea ye opfuẹpfuẹ vhẹ ni ẹẹ khi Ijusi wẹwẹ e kyia ( Ama olẹmhi le pfi, uka okhyio li e-kyia) ¹⁰ Imhẹ vha nu ulishi ẹchọ ni vha laa mẹ. Ghe, ghe! okhyio ọ laa pfino egwho vhẹ kwulo ọgba igwhumha khi a rhọ nwu vhẹ fẹ, a nwu vhẹ fẹ elemhi ẹlẹ igbe. Ama Vha mhọli irhọshiọ apfishi egwhuli, Ishọyọ mhi la laa rhi arhu eghyiele inyele na vhẹ. ¹¹ U kha zẹ esọ, rhi esọ shi emeni ayẹmhẹ o gwu a khasẹ eni ika ena. Ọni ọ nwule egwhuli ozeva o vha laa gbe ọli. ¹² ''Kẹkẹ ona ghyi ọni aghyiukọ ni ọ la uka Ipẹgamọmu: Ena khi ingmemhi ọni ọ mhọli ọfẹdo ni o nwunwunwu: ¹³ '''Mhi yẹsẹ asha ni vha nyele-Ayọ li eghyiele okyhio o la. ama rhẹmhi vha khyie nwu eva mhẹ zezeze, vhavha khyie irhọshiọ ni vha mhuẹ rhọ khẹ mhẹ, li shi egbẹlẹ Antipasi ni ọ kyili ọtsẹlẹ mhẹ, ni ọ rhi udu aghyie rhẹ khẹ mhẹ, ni a ke gbea elemhi iteteva vhẹ, ayọ li okhyio ọ nyele. ¹⁴ Ama mhi nwuno ikwukwu ingme na vhẹ: A mhọli iọgbọ egwho ni e nwu owẹna Ibalamu zezeze, ni e wẹna Ibaraki khi ọ kyili ọzuodẹ ni imyi Izulẹ, ishọyọ khi e kẹ dobẹ le emenale ilasobo ali igbe ighaba. ¹⁵ aa gwe li mẹ egwho ni e nwu owẹna Inikolatasi zezeze. ¹⁶ Vha Pfi egbe denegbe, ina khi iyọ!, Rhẹmhia bhẹ gwoo, Ishọyọ mhi rhi ọfẹdo ni o la mhe vhi unu khọli wẹ. ¹⁷ U kha zẹ esọ, rhi esọ shi emeni ayẹmhẹ o gwu a khasẹ eni ika. Eni e laa nwule, mhi la laa rhi ukphakpha ni o gbhagbha na wẹ le, ishọyọ mhi rhi ẹchẹ opfopfo ni a kẹkẹ eva eni iọgbọ shi na wẹ, eva ni a vha mẹ ọni ọ yẹsẹ sẹkẹnẹ ọni rhi ọli na. ¹⁸ ''Kẹkẹ ona ghyi ọni Aghyiukọ ni ọ la uka Itiyatira: Ena khi eni ingmemhi Omyi Ishinẹgba, ni ikpalo ọli e liabhi ẹlemhi erhẹ, ekoawẹ ọli e liabhi ẹlomho ni a nyiomhia: ¹⁹ '''Mhi yẹsẹ ikanya ni vha gaa gbe kwu, ighọli vhẹ ali irhọshiọ ali ugamhi ali ududumhi irhobọnwidu vhẹ, o rhọ gbe akanya ni vha gwe gbe onẹlọ li o ke gba dala oni a kpọ gbe. ²⁰ Ama mhi nwu ingme na vhẹ: Vha lama ni oni ọkpotso Ijezibẹli, ni ọọ khi ọbolẹ Ishinẹgba lẹ lẹ kyia. Owẹna li o she ghagha egamhẹ mhẹ o rhẹ wẹ a gbe ighaba o gwe rhẹ wẹ a le elamhi ni a rhọ lasẹ obo a ni ikhumhi. ²¹ Mhi she rhi imasha nali khi ọ rhọ pfi egbe denegbe, ama khi ọ vha nono khi lẹẹ a chi ighaba le. ²² Rhi ẹloe kpẹ! Mhi laa rhi igwhuamhi nwu ọli, ali eni e nu ọli a khyiẹli ududumhi edọsẹ ni o laa pfi osue na we, sẹkẹnẹ rhẹmhi e nwegbe lieliẹ vhi eni e nu ọli khyiẹlẹ. ²³ Mhi laa gbolo imyi ọlia, ishọyọ eni ika kwu e ke yẹsẹ khi mhẹmhẹa gwanọ isamhi ali ikhọkhọ ọgbọ. rhẹmhi laa fali ọgbọgbọ ota abhi ọ li gbe. ²⁴ Ama vhẹvhẹ eni e ke kpọle ni vha la Itiratiria, vhẹvhẹ kwu ni vha lama shi oni owẹna ona, ali eni e vha yẹsẹ ẹtsẹkẹ ni iọgbọ egwho ea lu ẹtsẹkẹ okyhio ni e limhi--ama mhi ẹẹ vhẹ, 'Imha khyolo itsua evhese nyanọ vhẹ ike. ²⁵ Abhabhi o ke rhẹ li, vha nwemaa nwu ze rhili apfishi na mhi rha bhale. ²⁶ Ọni ọ nwule ni ọ khyiẹlẹ emena mhi khyiẹlẹ a to ekẹ, lẹ mhi laa rhi izemhi ni a rhọ mhasẹ ni oni ẹvhue khi ẹvhue na. ²⁷ Ọọ la rhi orhẹ atoekẹ kee mhasẹ na wẹ, ọ gwọghọ wẹa abhi ekhe na ma. ²⁸ Abhi Ita mhẹ ọ li rhọ na mhẹ, mhi li laa rhi atata utsutsu ogbeẹ nali. ²⁹ Vha kha zẹ esọ, vha rhi esọ shi emeni Ayẹmhẹ o ngme a khase eni ika.