¹ Ona khi irhọkhasẹ uwi Ijesu Ikiristi ni Ishinẹgba ọ rhọ khasẹ eghamhẹ ọli emeni a laa mẹ nena, nena. Aghyukọ ọli ọ ghyie bhuli ọgamhẹ ọli ni Ijọni. ² Ijọni ọọ myie ọtsẹlẹ shi emeni ọ mẹ kwu obodẹ ingmemhi Ishinẹgba ali emeni a ngme obodẹ Ijesu Ikiristi. ³ Ivọsẹna khi uwi ọni ọgbọ ni ọ zẹ wẹ lasele gboo, ali iọgbọ kwu ni e suọ eni ingmemhi ni a laa mẹ ena, ni e rhi emeni a kẹkẹ shi ekẹ gbe akanya, rharhi khi oni ẹrhẹghẹ o she chi bhale. ⁴ Ijọni, mhi ghyie bhuli ika ishila ni e la esha: ivhẹlemhi ali ọpfọmhẹ ni o te obọ ọni ọ nyele bhẹ, ni ọ kpọ nyele, ni ọ gwe laa bhẹ, ali iyẹmhẹ ishila ni e la odalo utekwu eghyele ọli, ⁵ ali te obọ Ijesu Ikiristi ni ọ kyila ọni ọtsẹlẹ aghyie, ni ọ kyila ọmọjọ ikyiatsolo ni ọ te egwhi vule, ali ọni ọ rhi odẹ a khasẹ eni ighyie ni e la oni ekẹ agbona. Lẹ ni ọ mhọli ishomhelemhi eyẹ ọ she rhi ọlia ọli tsumhi eyẹ vhi ingmobe le, ⁶ Ọ she khyiẹlẹ eghyiele ni eyẹ, o rhi eyẹ kyila ọkpalo ni ughamhi Ishinẹgba, ali Ita ọli, ikiki ali izemhi o kyili uwi ọli ẹlẹnagbọagbọ apfishi ẹlẹnagbọagbọ. Itsẹ. ⁷ Vha ghee, ọ la elemhi atutu aa bhale; ukpẹloe kwu ee laa mẹ ọli, li shi eni e rhi ichibachiba tsese ọli. Ali ẹvhue khi ẹvhue kwu ni e la ukhomhi ekẹ ona e laa vyiẹ na. Iyọlọ Itsẹ. ⁸ ''Mhẹmhẹ khi Ituekele ali ikposhimhi,'' Ọnọmhuẹyẹ ni Ishinẹgba li ọ ngme eyọ, ''Ọni o la nena, ali ọni ọ kpọ la vhọ, ali ọni ọ gwe laa bhẹ, nọfu nẹẹ kwu.'' ⁹ Mhẹmhẹ Ijọni- inyọgwho vhẹ ali ọni ọ nu vhẹ kemhi oni echọ ali oni eghyiele ali irhiegbemyie ni o la elemhi Ijesu mhi la elemhi iteteva ekẹ ni okẹ o gasẹ ni aa lu Ipatmosi rharhi oni ingmemhi Ishinẹgba ali ọtsẹlẹ ingmemhi Ijesu. ¹⁰ Mhii la elemhi ayẹmhe ogbẹlẹ Ishinẹgba. Mhi ke sokwu urhuli ni o zezeze vhi oshimhi abhi okphẹ. ¹¹ Ọọ li, ''Kẹkẹ emeni u mẹ shi elemhi ebe, ishọyọ khi u rhi ọli ghyi eni ika Ishila ni e la Efisọsi, Isimana, Ipegamumu, itayatira, Isadisi, Ifiladefia ali iladisha.'' ¹² Mhi ke pfi alo oshimhi ni ẹẹ khi mhi mẹ urhui ọni ọ nu mhẹ a ngme, abhi mhi ke rhọ nwu egbe lieliẹ mhi mẹ ikpa igolu ishila ni e tono mugha. ¹³ Elemhi iteteva eni ikpa ni e tono mugha eyọ ọgbọ ni ọ liabhi Omyi Ọmọse ọọ la ayọ, ọ sọ awulu ni o te ukhomhi de a to ekẹ, ọ rhi ugbhogbho igolu nwu ayẹ. ¹⁴ Ukhomhi ọli ali itsu rhemhi ee pfuase gbogbogbo abhi afuolu ali ikpamhi amẹ, alo ọli ee pfuase abhi ẹlamhi erhẹ. ¹⁵ Ẹkọawẹ ọli ee gẹẹ nyanya abhi elomho ni a rhi erhẹ nyiomhia, urhui ọli oo ghyielaa abhi ekẹ nebu ni e te ikhomhi echẹ na kpiale. ¹⁶ Itata ishila ee vhala vhi obọ obita ọli, ọfẹdo ni o zẹ alo eva o te ọ vhi unu lasele. Orhẹ alo ọli oo gẹẹ nyanya abhi ovọ ogogota. ¹⁷ Abhi mhi ke rhọ mẹ ọli, mhi de tarhugwhu ekẹ nali abhi olimhi. Ọọ ke rhi obọ obita ọli nya mhe egbe ọ rhọ ẹẹ mhẹ, ''Imhẹ dobẹ ulishi nwu ẹ. Mhẹmhẹ khi ọni ọ kpe alo ni ọ gwe kpe oshimhi'', ¹⁸ Ali ọni ọ kpọ gwhu ni ọ gwe nyele. Mhii kpọ gwhu, ama ghe, ghe, mhi nyele agbọagbọ! mhemhi mhọli igoji egwhuli ali irhẹrhẹ. ¹⁹ Nenaa kẹkẹ emeni u mẹ shi ekẹ, emeni a laa mẹ nena ali emeni a ke gwe laa mẹ ẹrhẹghẹ ikposhimhi. ²⁰ Ingme ogbhagbha ni u mẹ obodẹ eni itata ishila ni e la mhẹ obọ obita emeni o ngme, ali ẹtsẹkẹ igolu ni a rhi ikpa ishila nyanọ: eni itata ishila wẹwẹ khi eni ighyukọ ika ishila, eni a rhi ikpa nyanọ ishila wẹwẹ khi eni ika ishila.