¹ Mhi ke mẹ idane ali ekẹ onogbọ, rharhi khi ekẹ ali idane ni a kpọ mẹ e she bhale a dọsẹ, abagwhoyọ a vha gwe mẹ okwu. ² Mhi mẹ oni ẹvholi ni o pfuasẹ, Ijerusalemu onogbọ, ni o rhọ te aleghyie Ishinẹgba kpiale, ni a kwhẹsẹ abhi ọmọmoshi ni a laa rhọ ghyie ugwhẹ ọli. ³ Mhi ke sokwu ududumhi uhuli ni o rhọ te elemhi oni utekwu eghyie ngme, ''Ghe, ghe! apfẹ Ishinẹgba o she bhẹ vhi iteteva iọgbọ, elemhiyọ ọ la laa nu wẹ nyele. E la laa kyili iọgbọ ọli, ọni Ishinẹgba kpakpa ọ nu wẹ la ishọyọ ọ kyili Ishinẹgba wẹ. ⁴ Ọ la laa shishi wẹ amẹ evyiẹ kwu ni e la wẹ aloa, ishọyọ a vha ke gwe laa mẹ egwhuli gwhe, wẹ khi ayele, wẹ khi evyiẹ ali ọtomhẹ. ẹtsẹkẹ nẹlẹ e she dosẹ. ⁵ Ọni ọ shitọ oni utekwu eghyie ọọ li, ''Ghe, ghe! mhi she rhi ẹtsẹkẹ kwu mela enegbọ.'' Ọọ li, ''Kẹkẹ ona shi ekẹ rharhi eni ingmemhi ena e kyili ena rhi egbe a nya ni e kyili egbegbe ingmaghyie.'' ⁶ Ọọ mhẹ, ''Eni ingme ena a she khyiẹlẹ wẹ! Mhẹmhẹ khi ọtuekẹle ali ọkposhimhi, ọni ọ to ekẹ le ni ọ gwe kposhimhi. Ọni okyiamẹ ọa gbe mhi laa rhi amẹ ni e nyele nali da ọ vha fali ota shi vhọ. ⁷ Ọni ọ laa nwule ọọ laa le eni ẹtsẹkẹ ena vhi ukwu, ishọyọ mhi kyili Ishinẹgba ọli, ọ ke kyili omyi mhẹ. ⁸ Ama enulishi, enẹ utsebọ, e gbe ugbee, enẹ ighaba, ebo, elasebo, ali epfiolẹmhi ikpa wẹ oo laa la ugbilimhi owerhẹ ni ugbhele ofu e laa to. Oyọ khi egwhuli ozeva.'' ⁹ Ukwhumhọgwho elemhi eni ighyiukọ ọ bhẹ bhuli mhẹ le, ọni ọ nwu itasa ishila ni e vọ igwhuamhi ozishila ni o kposhimhi mhọ obọ, ọọ mhẹ, ''Bhẹ vhi ana. Mhi laa rhọ khasẹ ọni ọmọmoshi ni a laa kwhẹsẹ, ugwhẹ ọni Omyi Oke.'' ¹⁰ Ọ ke rhue mhẹ vu elemhi Ayẹmhẹ shele ududumhi ukhomhi ọkpha ni o yagha, yagha, ọa rhi oni ẹvhue ni o pfuasẹ khi Ijerusalẹmu khase mhẹ, oo te idane obọ Ishinẹgba ẹẹ kpiale. ¹¹ Ijerusalemu o mhọli ikiki Ishinẹgba, igẹmhi ọli rhẹmhi o li gbea, gbea abhi emeni a rha kwhẹ shi egbe ni e somhote, somhote, e gwe liabhi echẹ ni ea pfuase gbogbogbo abhi ẹchẹ eghegbe. ¹² Ochika oni ẹvhue o yagha o mhọli ebunodẹ igbe ali eva, ali ighyiukọ ogbe ali ava. Eni ebunodẹ a kẹkẹ eva ẹdẹli igbe ali eva ni e kyili imyi Izulẹ shiọ. ¹³ Obho ni ọwọli o te a lasele (East) ebunodẹ esẹ li e la vhọ, obho ni oleda (North) ebunode esẹ li e la vhọ, obho ni olọkẹ (South) ebunodẹ esẹ li e la vho, obho ni ọwọli o te a lo ekẹ (west) ebunodẹ esẹ li e gwe la vhọ. ¹⁴ Ochika oni ẹvhue o mhọli ituekẹle igbe ali eva, wẹwẹ li a kẹkẹ eni eva ẹdẹli igbe ali eva ni e kyili eva ighyiusomhi ọni Omyi Oke ogbe ali ava shi. ¹⁵ Ọni ọ nu mhẹ ngme ọ nwu akwhi ni a rha mhasẹ ẹtsẹkẹ ni a rhi igolu khyiẹlẹ mhọ obọ khi lẹẹ rhọ mhasẹ oni ẹvhue, ebunodẹ ni e la, ali eni ichika. ¹⁶ Abhi a rhọ mhasẹ oni ẹvhue, lẹ kwu o kyili abagwho gasẹ a lẹ. Ọọ rhi oni akwhi ni a rha mhasẹ ẹtsẹkẹ mhasẹ oni ẹvhue, ọọ mhasẹ ọli ẹtawẹ agbẹlẹ egbhọ igbe asha igbe ali eva gasẹ a lẹ. ¹⁷ Ọ gwe li mhasẹ oni ochika, igbemhi ọli o kyili ẹtawẹ egbhọ ishila ikpamhi ene. abhi agbọ e a mhasẹ ẹtsẹkẹ iyọ li eni ighyiukọ e lia mhasẹ. ¹⁸ Ikhomhi echẹ ni ea pfuasẹ abhi ighegbe li a ma oni ochika nya ẹvholi egbegbe igolu, ni ea gẹẹ abhi ighegbe ni ọgbọ ọ te a mẹ egbe ọli. ¹⁹ Echẹ ni e somhote, somhote li a rhọ kwhẹsẹ oni ituekẹle ochika oni owa. Oni ikyiatsolo lẹ khi echẹ ni e liabhi ughegbe, ozeva lẹ khi echiẹ ni ea gẹẹ, oni ozesẹ lẹ khi echẹ itaje, oni ozene lẹ khi echẹ ni ea gyia ngmela, ngmela, ²⁰ Ọzishie o kyili ẹchẹ ni o vino ikẹkẹ ọbishi ali ọpfuasẹ, ozesesa o kyili echẹ ọlilẹ ni e womhẹ, womhẹ nabhi echẹ ni a rha khyiẹlẹ emeni a rha kwhẹsẹ igbe, ozishila o kyili echẹ ni e womhẹ ni ọa pfuasẹ pẹpẹpẹ nabhi echẹ ni a rha khyiẹlẹ ọkwulọkwu, ozelele o kyili echẹ nabhi a rha khyiẹlẹ alominiọmu ni o vino ikẹkẹ ọdọdọda, ozitili o kyili echẹ ọlilẹ ni o mhọli ekheliẹ, ozigbe o kyili echẹ ni e bishi abhi ebui, ozigbe ali ogwho o kyili echẹ ni oa lilẹ abhi olonwu, ozigbe ali eva o kyili echẹ ni ea bishi abhi ibulu. ²¹ Eni ebunodẹ igbe ali eva rhẹmhi ee gẹẹ ee li nya, nya, eni ebunodẹ kwu emeni ea gẹẹ ogwho li a gaa rhọ khyiẹlẹ ogwho, gwho, gwho vhọ. ufuodẹ oni ẹvholi e kyili egbegbe igolu, rhẹmhi o liabhi ughegbe. ²² Imha mẹ apfẹ ugamhi vhi oni ẹvholi, rharhi khi Ọnọmhuẹyẹ ni Ishinẹgba, ni ọ mhasẹ a ni ẹtstsẹkẹ kwu, ali ọni Omyi Oke khi oni apfẹ ugamhi. ²³ Oni ẹvholi o vha mhọli emeni o rhi ọwọli khyiẹli wẹ khi ukyi ni o la ayọ ẹẹ gẹẹ rharhi khi ikiki Ishinẹgba li o la vhọ a gẹẹ, abagwhoyọ akpa lẹ khi oni Omyi Oke. Oni ufulọ li ẹvhue oni agbona e rha mato. ²⁴ Eni ẹvhue ali eni ighyie ni e la ukhomhi ekẹ e laa rhi ọsuemhẹ wẹ bhẹ vhọ. ²⁵ Ebunode ọli a vha chigbe mhuẹ ẹrhẹghẹ ni a rha gwese wẹ elogota, ubili o vha laa bi vhi ayọ. ²⁶ E la laa rhi ikiki ali ojima oni ẹvhue bhẹ vhọ, ²⁷ Iyọ a vha mẹ emeni e vha pfuasẹ ni o dobẹ laa lo ayọ. shi ọgbọ ni ọ khyiẹli ingmemhi omama ọa liyọ ingmemhi ighagha ni ọ laa lo ayọ le, sẹkẹnẹ eni a kẹkẹ eva wẹ shi ebe inyele ni o kyili uwi ọni Omyi Oke.