¹ Ọni aghyiukọ ọ ke rhi oni amẹ okẹ inyele khase mhẹ, amẹ ni e pfuasẹ abhi ẹtse. Utekwu eghyie Ishinẹgba li o te lasele. ² Rhọ te iteteva ifuodẹ oni ẹvholi. Esọ igbogbo oni okẹ kwu orhẹ inyele o la vhọ, ni ọa mọ ikpamhi erhẹ igbe ali eva ukyi kwu. Ebe eni erhẹ o kyili irhue ẹvholi igwhami egbea. ³ A vha gwe laa mẹ ogwhumhi. Utekwu eghyie Ishinẹgba ali ọni Omyi Oke oo la laa oni evhue, ishọyọ egamhẹ oli ea kee gbega nali. ⁴ Ee laa mẹ orhalo ọli, eva ọli a kẹkẹ ọli shi wẹ vhi anukpo. ⁵ A vha gwe laa mẹ eliyọsẹ; A vha mhuẹ emeni a ke gwe rhi ufulọ rhu a shi wẹ khi ovọ rharhi khi Ọnọmhuẹyẹ ni Ishinẹgba ọ laa ke gẹẹ rhugwhu wẹ. E la laa le eghyiele ẹlenagbọagbọ. ⁶ Ọni aghyiukọ ọọ mhẹ, ''Eni ingmemhi ena egbegbe ingmemhi ni e kyili ingmaghye ni a rhi egbe a nya li e kyila, Ọnọmhuẹyẹ, ni ọ kyili Ishinẹgba iyẹmhẹ eni ebolẹ, ọ ghyie aghyiukọ ọli khi ọ kaa rhọ khase ọgamhẹ ọli emeni a la mẹ nena.'' ⁷ ''Ghe, ghe! mhi kẹlẹ laa bhẹ nena! Izọtena khi ọni ọgbọ ni ọ suọ esọ ni eni ingmemhi ni a laa mẹ ni e la oni ebe ona.'' ⁸ Mhẹmhẹ, Ijọni, mhẹmhi mẹ eni ingme ena na mhi suọ wẹ. Abhi mhi rhọ suọ na mhi rhọ mẹ, mhi de talo rhugwhu ekẹ gbega odalo ọni aghyiukọ, ọni aghyiukọ ni ọ rhi eni ngmemhi ena khase mhẹ. ⁹ Ama ọọ mhẹ, ''Imhẹ gwe liyọ! Ọgamhẹ nabhi ghyiẹ mhi li kyia! shi inyọgwho ẹ ali eni ighyiuko ali eni e suọ esọ ni ingmemhi oni ebe ona. Gbega ni Ishinẹgba!'' ¹⁰ Ọ ke ẹẹ mhẹ, Imhẹ pfi enuwu nwu eni ingmemhi ni a laa mẹ ni e la oni ebe ona, rharhi ẹrhẹghẹ o she chi bhẹ. ¹¹ Ọni ọ gwabhaa gbe ọ liyọ kee khyiẹlẹ, ọni ọ vha gwabhaa nyele, ọ liyọ nyele inyele obe kee lẹ. Ọni ọ gwabha gbe, ọ kee gbe je alo. Ọni ọ pfuasẹ, ọ pfuasẹ a kee je alo.'' ¹² ''Ghe, ghe! mhi kẹlẹ laa bhale, Ifọta mhẹ e la mhẹ vhi obọ, khi mhi rhọ fali ọgbọgbọ abhi ọ li gbe. ¹³ Mhẹmhẹ khi ituekẹle ali ikposhimhi, ọni ọ kpalo ni ọ gwe kpe oshimhi, ọni ọ tuekele ni ọ gwe kyili ọni ọ kposhimhi. ¹⁴ Izọtena khi uwi eni e pfuẹ awulu wẹa ishọyọ khi e kee dobẹ te oni orhẹ inyele pfa le e ke te oni obunode oni ẹvholi lo. ¹⁵ Edato ọli li iwoshi, iọgbọ uvhaza, ighaba ni o kyili idetsia ikpotso ali emọse, egbe ugbee, elasobo, ali iọgbọ ni e nono ikanya ighagha kwu e la. ¹⁶ Mhemhe, Ijesu, mhẹmhi ghyie aghyiukọ mhẹ bhuli vhẹ khi ọ kaa ngme eni ingmemhi ena khasẹ eni ika. Mhẹmhẹ khi umhili ali ushishi Idavidi, ni ọ kyili atata utsutsu ogbẹẹ. ¹⁷ Ọni Ayẹmhẹ ali ọni ọmọshi ni a kwhẹsẹ, eẹ li, ''Bhe!'' Ọni okyiamẹ ọa gbe kwu, ọ bhale, ọni ọ sheda nono ọli, ọ bhale a mọ amẹ Ayẹmhẹ da apfuẹ ni a vha fali ota a shi. ¹⁸ Mhi gwu khasẹ ọgbọ kwu ni ọ suọ eni ingmemhi ni e laa oni ebe emeni a laa mẹ ena: Ọni ọ laa khyi maa, Ishinẹgba ọ rhọ ma osoli ni a kẹkẹ shi oni ebe ona nali. ¹⁹ A kha mẹ ọni ọ rhue ukpamhi ingme ogwho eni ingme ena le, Ishinẹgba ọ laa rhue wẹ oni orhẹ inyele ali oni ẹvhọli ni o pfuasẹ oyọ vhi odẹa. Ni a kẹkẹ shi oni ebe ona. ²⁰ Ọni ọ pfi ọtsẹlẹ shi eni ingme ena ọọ li, ''Iyọ lọ! Mhi kẹlẹ laa bhale.'' Itsẹ! Bhale, Ọnọmhuẹyẹ Ijesu! ²¹ Ivhẹlemhi Ọnọmhuẹyẹ Ijesu o nu ọgbọ kwu la vho. Itsẹ.