¹ Mhi ke me aghyiukọ ọgwho ọ te idane kpiale ekẹ, ọ nwu ugoji omii ni o vha mhọli ukpẹsẹ mhọ obọ ali ududumhi igha. ² Ọ ke nwu ọni ududumhi ẹlamhi ni ọ ze ipfua ali ughyia ẹnyẹ ni ẹlẹ, ni ọ kyili okhyio, a fali ọli elemhi ikpe agbẹlẹ egbhọ igbe. ³ Ọọ pfi ọ lo elemhi oni omii ni o vha mhọli ukpẹsẹ, ọ gwese ọli shi vhọ ọ pfi ẹnwu nwu ọ. Rhẹmhi a liyọ mẹ ọ khi ishọyọ ọ ke gwe dobẹ ghagha agbọ apfishi neni eni ikpe eyọ e rha gba. O kha ke dọsẹ a gwe la wolo li abọa ukwukwu ẹrhẹghe. ⁴ Mhi ke mẹ itekwu eghyie eni a rhi izemhi na khi e sọ unu ẹzọ, wẹwẹ li e shitọ vhọ. Mhi gwe mẹ avhagwhu eni a kyiolo ukhomhia rharhi oni ọtsẹlẹ Ijesu ali ingmemhi Ishinẹgba. E vha lama gbega ni ọni ẹlamhi akọ ali ọni arhọkhọkhọ ma, ali ilama myie oni ishẹfẹ ọni ẹlamhi shi anukpo ali obọ. E lieliẹ egbe bhẹ vhi agbọ, ea nu Ikiristi le eghyiele ikpe agbẹlẹ egbhọ igbe. ⁵ Eni e kpọẹ ni e gwhulo e vhaa vue nee oni ẹrhẹghẹ sẹkẹnẹ eni ikpe agbẹlẹ egbhọ igbe e gba. ona khi itiegwhivule ikyiatsolo. ⁶ Izọtena ali ipfuasẹ khi uwi ọni ọgbọ ọyọ ni ọ mhọli obọ shi itiegwhivule ni ikyiatsolo! Egwhuli utozeva o vhaa mhọli izemhi obodẹ iọgbọ enana. E laa kyili eni e kpeda ugamhi Ishinẹgba ali Ikiristi e nu ọli le eghyiele ikpe agbẹlẹ egbhọ igbe. ⁷ Eni ikpe agbẹlẹ egbhọ igbe e kha ke gba, a laa wolọ okhyio abọa a rhue ọ vhi ogba igwhumha ni ọ la lase. ⁸ Ọọ la laa je elase kee lẹẹ ghagha iọgbọ opfi enenene ukhomhi ekagbọ, ọọ koko Igọgi ali Imagogi gba shi okhọli. E bububu abhi ekhashẹ ni e la elemhi okwu. ⁹ E pfi gasẹ asha ni iọgbọ ni e myie Ishinẹgba suọ e la, ẹvholi ni o ghọli Ishinẹgba. Ama erhali e rhọ te idane kpiale a tosẹ wẹa. ¹⁰ Ọni okhyio ni ọ lẹlẹ wẹ, a pfi ọli lo ọchẹ erhali. asha ni a pfi ọni ẹlamhi akọ lo, ali ebolẹ ighagha. A la laa rhi ẹchọ na wẹ shi ota ali iyọse ẹlẹnagbọagbọ. ¹¹ Mhi ke mẹ utekwu eghyie opfopfo ali ọni ọ shitọ vhọ. Ekẹ ali edane e welia, ama e vha mẹ asha jẹ. ¹² Mhi mẹ eni e gwhulo, shi esue shi ekhale, e mugha odalo oni utekwu eghyie, eni ebe a gweghyie wẹa. Oni ebe inyele. A ke rhi emeni a kẹkẹ shi oni ebe sọ eni e gwhuloa unu ẹzọ, ikanya ni e gbe ni a kẹkẹ shi ebe li a te sọ wẹ unu ẹzọ. ¹³ Okẹ o rhi iọgbọ ni o gbolo lase. egwhi ali owerhẹ e rhi eni e gbolo lase, aa rhi emeni ọgbọgbọ ọ li sọ ọli unu ọli ẹzọ, ¹⁴ Aa pfi egwhuli ali owerhẹ lo ẹlamhi erhẹ. ona khi egwuli utozeva, ugbilimhi owerhẹ. ¹⁵ Ọni a vha sheda mẹ eva ọli vhi elemhi oni ebe agbọ, rhẹmhi a pfino wẹ kwulo ugbilimhi owerhẹ