¹ Abhi ena kwu e ke rhọ dọse a lẹ mhi ke sokwu ingmemhi ni oo ngme abhi irhuli iọgbọ ni e bububu vhi elemhi aleghyie eẹ li, ''Ekweghogo. imhiepfuese, ikiki, ali izemhi Ishinẹgba eyẹ li ọ mhuẹ. ² Igwezọ ọli rhẹmhi o li tatata o vha mhọli ighagha, rharhi khi ọ she gwu ọni ududumhi aghaba ọyọ ezọ ni o rhi idetsia ighaba pfuẹhẹ ukhomhi ekẹ kwa. Ọ she wali oliẹ shi ọlia egamhẹ ọli. ³ Utozeva e gwe eẹ li, Ekwheghogo! Eni ewọli ni ea tosẹ ọlia rhẹmhi ea shele tututu elenagbọagbọ.'' ⁴ Eni ejọ uye ali ane ali eni elamhi akọ ane e tarhugwhu e gbega ni Ishinẹgba ni ọ shitọ oni ukhomhi utekwi eghyie. E li ẹẹ li, ''Itse. Ekwheghogo!'' ⁵ Urhuli o ke rhọ te elemhi oni eghyiele ngme lasele, ọọ li, ''A chichi Ishinẹgba eyẹ, vhẹvhẹ egamhẹ ọli kwu, vhẹvhẹ ni vhaa nulishi ọli, shi ekeke she eni e fu.'' ⁶ Mhi ke gwe sokwu emeni e liabhi irhuli iọgbọ ni e bububu, e tono gbugbu abhi okẹ nofu ọa na, o gwe vanọ abhi ikpala, sọse gbalalala: Ekwekhogo! Rharhi khi Ọnọmhuẹyẹ Ishinẹgba nọfu nẹẹ li ọ le eghyie. ⁷ Vha dobẹ eyẹ ghẹlẹ egbe e nwu eyẹ khi eyẹ rhi ikiki nali rharhi khi oni izude ọni Omyi Oke o she rhamhi, rharhi khi ọni ọkpotso ni ọ laa mhọli ọli ọ she nwunegbe shi ekẹ.'' ⁸ A shi rhi imasha nali khi ọ rhi ede ni ea pfuasẹ gbogbogbo ni e somhote kwhẹ rharhi khi ode opfopfo ni o somhote li a rhọ khọkhọ igwabhagbe eni e myie Ishinẹgba suọ). ⁹ Ọni aghyiukọ ọọ li, ''Kẹkẹ ona: izọtena khi uwi ọni a lu shi izuode oni Oke.'' Ọọ gwe ẹẹ mẹẹ, ''Ena khi egbegbe ingmemhi Ishinẹgba,'' ¹⁰ Mhi tarhugwhu nali khi mhi gbega nali, ama ọọ mẹẹ, ''Imhẹli mẹ yọ! Ọgamhẹ nabhi ghyiẹ ali eni e myiesuọ mhi kyia ni e lama shi Ijesu vhọ. Gbega ni Ishinẹgba, rharhi khi ingmemhi Ijesu khi ayẹmhẹ ingme ogbhagbha.'' ¹¹ Mhi ke mẹ khi idamhida o gweghyiea, mhi kee fẹẹ mhi rhọ mẹ akachi opfopfo! ọni ọ nya ọli lẹẹ lu Isuesọ ali ingmaghyie. Ẹzọ ni o pfuasẹ li ọẸ gwu li ọ rhọ ẹẹ khọli okwhẹ. ¹² Ikpalo ọli rhẹmhi e liabhi ẹlamhi erhẹ, irhu eghyiele e vọ ọli ukhomhi kwu. ọ mhọli eva ni ọ kẹkẹ shi egbe ni o kyila khi lọgwho li ọ le yẹsẹ ọli. ¹³ Ọọ sọ awulu ni o sọ elemhi ọlia, eva ẹli lẹ lu ingmemhi Ishinẹgba. ¹⁴ Ichoja ni e la aleghyie Ishinẹgba e shele ikachi rhẹ khali oli, e rhi ede epfopfo ni e somhote kwhẹ, ede ni ee pfuasẹ pẹpẹpẹ. ¹⁵ Ọfẹdo ni o nwunwunwu o la vhi unu ni ọ rhẹẹ khọli eni ẹvholi, ali orhẹ akwhuli ni ọ rhọ laa ke mhasẹ ni agbọ.’’ Ọ mise ikpamhi erhẹ enyọ ofu Ishinẹgba nọfu nẹẹ. ¹⁶ Ọ she kẹkẹ eva shi awulu ọli ali ekhyikhyi ọli, ''OGHYIE Ni Ọ MHỌLI ENI IGHYIE KWU. ¹⁷ Mhi mẹ aghyiukọ ni ọ mugha elemhi ọwọli. ọọ ke rhi urhuli ni o zezeze nyalu ipfele ni ee fiala idamhida. Ọọ wẹẹ, ''Vha bhẹ, khi vha koko gba khẹ uliemhi Ishinẹgba. ¹⁸ Vha bhale a le ẹlamhi eni ighyie, elamhi eni e rhi iọgbọ ẹẹ khọli okwhẹ, ẹlamhi ijegbe eni ekhale, ẹlamhi ikachi ali eni ea nya wẹ, shi igwhumha ali epfuegbe, shi esue ali ekhale.'' ¹⁹ Mhi ke mẹ oni ẹlamhi akọ ali eni ighyie oni ekẹ agbona ali ichoja wẹ. Rhẹmhi e nwunegbe abhi ee li nwu okwhẹ nu ọni ọ nya ọni akachi ali ichoja ọli vule. ²⁰ A ke nwu ọni ẹlamhi ako ali ebolẹ ighagha ni ọ gbee inyaloa ali ighagha ni e ghagha eni myie ishẹfẹ ọni ẹlamhi akọ ni e gbega ni arhọkhọkhọ ma kwuno ẹlemhi erhẹ ali asha ni ugbhele ofu e lẹẹ to. ²¹ Ọni ọ nya akachi ọ rhi ọfẹdo gbolo eni e kpọlea. Ipfele kwu e rhi elamhi wẹ le.