¹ Ọni aghyiukọ ọgwho elemhi eni ighyiukọ oshila ni e nwuno itasa mhọ obọ ọọ bhale bhuli mhẹ le ọọ mhẹ, ''Bhẹ, mhi laa rhẹẹ khasẹ iliopfua ọni ukpokpomhi aghaba ni ọ shitọ ukhomhi amẹ nebu. ² Lẹ li enighyie ni e la ukhomhi ekagbọ e nu gbe ighaba, ali ọni ọ she rhi onyọ ighaba ali idetsia ni oni agbona da.' ³ Ọni aghyiukọ ọ ke la elemhi Ayẹmhẹ rhue mhẹ je apata, Mhi ke mẹ khi ọkpotso ọgwho ọ shitọ ukhomhi ẹlamhi akọ ni ọọ lilẹ eva ipfininua e vọ vhi ijegbe, ọni ẹlamhi akọ ọ zẹ ikhomhi ishila ali ekphẹ igbe. ⁴ Ọni ọkpotso ọ rhi itsua ni e ghyiẹ lilẹ kwhẹ a rhi igolu gbega ẹẹ nali, ali echẹ ni e nweloe, ali emeni e gaa somhọte. Ọ nwu ukolo igolu mhọli obọ ni o vọ ijajamhi itsua ni e nwu ijiomhi ni e kyili ikanya idetsia ali ighaba ni ọọ gbe. ⁵ A kẹkẹ eva ọli shi ọ vhi anukpo ni o mhọli ikpamhi ingmemhi ogbhagbha: ''IBABELỌNI NOFU, NI O KYILI INYỌ IGHABA ALI INYỌ ETSẸKẸ KWU NI E KYILI ITSẸBỌ.'' ⁶ Mhi mẹ khi ọni ọkpotso ọ she da ọlia eni e myie Ishinẹgba suọ ali ọlia eni a gboloa shi ingme Ijesu. Abhi mhi ke rhọ mẹ oli, abọ e ke sha mhẹ. ⁷ Ama ọni aghyiukọ ọ ke ẹẹ mhẹ, ''See abọ e ke li sha ẹ? Mhi laa ngme khasẹ ẹ emeni ọni ọkpotso ọyọ ọọ ngme ali ọni ẹlamhi ako ni ọ tsua ọli (ọni ẹlamhi ni ọ zẹ ikhomhi ishila ali ekphali igbe). ⁸ Ọni ẹlamhi ako ni u mẹ khi ọ nyele eyọ ọ vha nyele nena, ama khi ọ she laa te elemhi oni omii lasele ni o vha mhọli ukpẹsẹ. ishọyọ ọ vha li pfusea, eni a vha kẹkẹ eva wẹ shi ebe agbọ ni a te to oni agbọ ona ekẹ le ena, oo laa nya wẹ aloa ni e mẹ ọni ẹlamhi akọ ni ọ nyele eyọ, rharhi ọ kpọ nyele, ama ọ vha ke gwe nyele nena, ama ọ she laa bhẹ. ⁹ Ona o rhi ọtsẹgbhẹ sato ọ. Khi eni ikhomhi ishila eyọ e kyili ekpha ishila ni ọni ọkpotso ọ shitọ. ¹⁰ E gwe kyili enighyie oshila . enighyie oshie e she de, ọgwho o khyie la vhọ, ọni ọ ke kpọẹ ọ vha bhale ne: ọ kha bhẹ, ukwukwu ẹrhẹghẹ li ọ le laa la vhọ. ¹¹ Ọni ẹlamhi ni ọ kpọ nyele, ni ọ vha gwe nyele nena, lẹ khi oghyie ọzolale: uwi enighyie oshila, ọ laa li opfua. ¹² ‘’Eni ekphali igbe ni u mẹ, wẹwẹ khi eni ighyie ogbe ni e vha khyie mhọli eghyiele wẹ nee, ama e laa mhọli izemhi abhi enighyie elemhi ọkwulọkwu ogwho gboghyie ọni ẹlamhi ako. ¹³ Ee laa zẹ udu ogwho, e ji izemhi wẹ abọa ni ọni ẹlamhi akọ. ¹⁴ E nwu okwhẹ nu ọni Omyi Oke vule. ama ọni Omyi Oke a li eni ọ nyalu ali eni ọ zẹ, ali eni e gwabha rha khali ọ e laa nwu wẹ le, rharhi khi lẹ khi Ọnọmhọli eni e mhọli, ali oghyie enighyie. ¹⁵ Ọni aghyiukọ ọ ke nu mhẹ ngme, ''Eni amẹ nu mẹ, ni oni aghaba ọ shitọ lẹ khi agbọ, akwete iọgbọ, ẹvholi ali irhuli ọdọdọda. ¹⁶ Eni ekphẹ igbe ni u mẹ eyọ, wẹwẹ ali ọni ẹlamhi akọ e laa kee bishi elemhi ọni aghaba. E laa rhi oya lu ọli e banọ ọlia, e pfuse ọlia, e rhi erhẹ tosẹ ọlia nyanyanya. ¹⁷ Ishinẹgba ọ shẹ rhi ọli shi wẹ udu khi e rhọ khyiẹli emeni ọ mhasẹ khi e laa lama rhi izemhi wẹ ni ọni elamhi akọ, khi ingmemhi Ishinẹgba e rhọ tsẹ. ¹⁸ Ọni ọkposto ni u mhẹ eyọ lẹ khi ọni udumhi oni evholi ni o mhasẹ a ni enighyie ni e la ukhomhi ekagbọ.