Ikhomhi 6 Ikoritiasi ni ozeva
1
Abhagwhoyọ, abhi eyẹ li nu Ishinẹgba gbe akanya kwugbe, eyẹ lema vhẹ khi imhẹ vha myie ivhẹlemhi Ishinẹgba shi apfuẹ.
2
Rharhi khi ọọ ngme, “khi ẹrhẹghẹ ewela mhi rhi esọ shi vhẹ ekẹ, ali ẹrhẹghẹ imyiepfuese mhi kpaghyiẹ vhẹ obọ. “Ghe, ghe, oni ẹrhẹghẹ ewela khi ona, ghe, ghe, ẹrhẹghẹ imyiepfuese khi ona.
3
Eyẹ vha pfi ọzuodẹ shi ọgbọkhọgbọ odẹ, rharhi khi eyẹ vha nono khi akanya Ishinẹgba ni eyẹ a gbe o ke kyili oni o nwu gba.
4
Onochi, ikanya ni eyẹ gbe li eyẹ te rhi egbe eyẹ khasẹ, khi egamhẹ Ishinẹgba li eyẹ kyila. Egamhẹ ọli li eyẹ kyila te ikpa irhegbemyie, ọtomhẹ, osoli, ọnwunọ.
5
Igbemhi, ilo igha, iyoyo, ikanya ni e ze, ikwovhesẹa, elemhi okyiamhi.
6
elemhi ichama, iyẹsẹ, irobọnwidu, ivhẹlemhi, te ikpa Ayẹmhẹ Ni o pfuasẹ, eyẹ she rhi ighọli eyẹ khasẹ khi egamhẹ Ishinẹgba li eyẹ kyia.
7
Egamhẹ ọli li eyẹ kyia elemhi ingmemhi ingmaghyie, elemhi izemhi Ishinẹgba. Shi obita ali ọgobọ itsua okwẹ ipfuasẹ li eyẹ kyia.
8
A rhi ekpẹ ni eyẹ a vha rhọ ni eyẹ rhẹmhi eyẹ a gbe akanya Ishinẹgba, a ka eyẹ a chichi eyẹ. Eẹ khi rhẹmhi eyẹ a gbe ighagha ama eyẹ kyhiele mugha ingmaghyie.
9
Rhẹmhi eyẹ a gbe akanya abhi eni a vha yẹsẹ ama a gaa yẹsẹ eyẹ onaghyie. eyẹ a gbe akanya abhi eni e laa gwhulo---u waa mẹ khi eyẹ khyie nyele. eyẹ a gbe akanya abhi eni a rhi ẹchọ a shi ingmobe ni e li, ama a vha gbolo eyẹa.
10
Eyẹ a mẹ ipfuẹchudua vhi oni akanya, ama eyẹ khyiele a ghẹlẹ ẹrhẹghẹ kwu. Eyẹ liabhi enanya, ama eyẹ rhi ebubu iọgbọ pfue. Eyẹ liabhi eni e vha mhọli ẹtsẹkẹ pẹẹ, ama ẹtsẹkẹ kwu li eyẹ mhọli.
11
Eyẹ she ngme ingmaghyie kwu khasẹ vhẹ, Ikọrhitiansi, udu eyẹ o she gweghyiea gboo.
12
Eyẹ vha nwu ayẹmhẹ vhẹ gba, isamhi vhẹ li o nwu vhẹ gba.
13
Nenaa a rhọ ngme kwu egbe vhọ, rhẹmhi nu vhẹ a ngme abhi ivhiẹ--- vha gweghyie idu vhẹa gboo.
14
Imhẹ nu eni e vha myiesuọ toma. mhi gyhi alekwugbe ni eni e pfuasẹ ali eni e vha pfuasẹ e mhọli ni egbe? Laa mhi gyhi alekwugbe ni ufulọ ali aloebi e mhọli?
15
Mhi gyhi alamanegbe ni Ikiristi ali okhyio e mhọli ni egbe? ọa liyọ, mhi gyhi alamanegbe ni ọni ọ myiesuọ ali ọni e vha myiesuọ e mhọli ni egbe?
16
Mhi gyhi alamanegbe ni apfẹ ughamhi Ishinẹgba ali owa ikwhumhi e mhuẹ ni egbe? Rharhi khi eyẹ khi apfẹ ughamhi Ishinẹgba ni ọ nyele, abhi Ishinẹgba ọ le li ngme ọli eyọ ni ọ rhọ ẹẹ li. “Mhi laa nu wẹ la, mhi nu wẹ a kyia. Mhi laa kyili Ishinẹgba wẹ, e kyili iọgbọ mhẹ.”
17
Elemhiyọ, “Te wẹ iteteva lasele, khi u la ikpa ẹ,” Ọnọmhuẹyẹ l ọ ngme yọ. “Imhẹ rhi obọ chi emeni e vha pfuasẹ, mhi laa chi ẹ mama egbe.
18
Mhi laa kyili ita vhẹ, vha ke kyili ivhiẹ imọse ali ivhiẹ ikpotso mhẹ, “Ọnọmhuẹyẹ ni ọ fu nẹẹ li ọ ngme yọ.