Ikhomhi 5 Ikoritiasi ni ozeva
1
Eyẹ yẹsẹ khi owa ni eyẹ nyele ukhomhi ekagbọ o kha gwọghọa, eyẹ mhọli owa ni o te obọ Ishinẹgba bhale. O kyili owa ni a vha rhi abọ ma, ama apfẹ ni ẹlẹnagbọagbọ ni o la aleghyie.
2
Oni owa ona li eyẹ laa vyiẹ evyiẹ idukunu, ni eyẹ rha kpokpo khi eyẹ kẹ tsua owa ni aleghyie kwu egbe.
3
Ona o vha gwhẹ eyẹ rharhi khi eyẹ kha tsua ọli kwu egbe, eyẹ vha gwe la irhumheba.
4
Ingmaghyie lọ, abhi eyẹ li la oni owa ona ena, rhẹmhi eyẹ a vyiẹ evyiẹ idukunu, rharhi khi o nwu eyẹ egbe. Eyẹ vha nono khi imhẹli eyẹ rhọ ọli kwu egbe, Onochi, eyẹ a nono khi eyẹ rhọ kwu egbe, khi emeni ea gwhu o kẹ to emeni e vha gwhu luẹ.
5
Ọni ọ nwuno eyẹ egbe a shi eni ẹtsẹkẹ ena lẹ khi Ishinẹgba, ni ọ rhi oni Ayẹmhẹ ni eyẹ khi o kyili ishobọ obodẹ emeni ea bhẹ.
6
Iyọ vha kee dobẹ idu zeze vhẹ ẹrhẹghẹ kwu. Vha yẹsẹ khi eyẹ kha nu oni ijegbe la apfẹ, eyẹ tanya ni Ọnomhuẹyẹ.
7
Rharhi irhọshiọ ọli eyẹ rha kyia, a khi emeni a mẹ ẹloe.
8
Iyọ eyẹ mhọli irhegbeda, o chi khi eyẹ tanya ni ijegbe eyẹ, eyẹ nu Ọnomhuẹyẹ la apfẹ.
9
Eyẹ she rhi ọli kyili emeni eyẹ na kwhu, eyẹ la apfẹ ọa liyọ eyẹ vha la apfẹ, eyẹ rhi egbe nwu ọ.
10
Rharhi khi eyẹ kwu eyẹ la laa tomugha odalo utekwu igwẹzọ Ikiristi, ishọyọ ọgbọgbọ ọ myie ifọta ni e kyili iyi ọli ni ọ gbe elemhi oni ijegbe, e kyili enaghyie e kyili enebe.
11
Elemhiyọ, vha yẹsẹ ulishi Ishinẹgba, eyẹ a wẹna iọgbọ. Emeni eyẹ kyila Ishinẹgba ọa mẹ ọli gboo. mhi sa khi o she li ga idu vhẹ ẹloe.
12
A khi rhẹmhi eyẹ ke gwe a gwu na vhẹ khi vha kẹ mẹ eyẹ abhi iọgbọ aghyie. Onochi, rhẹmhi eyẹ rhẹ vhẹ a khasẹ emeni e rhẹ vhẹ rhi eyẹ a kee gha, khi vha rhọ dobẹ sọ eni e rhi opfiegbe a gha ni o vha kyili emeni e la udu.
13
Eyẹ vha mhọli ẹgbhẹ rharhi Ishinẹgba lọ, eyẹ kha rhọ shi ẹgbhẹ eyẹ rhọ ẹbghẹ rharhi vhẹvhẹ.
14
Rharhi ighọli Ikiristi li ọa tono eyẹ abọ, rharhi khi eyẹ mẹ ọli mẹ: khi ukwhumhọgwho li ọ gwhua ni iọgbọ kwu, elemhi iyọ iọgbọ kwu li e ke gwhua eyọ.
15
Rhẹmhi Ikiristi ọ gwhua ni iọgbọ kwu , khi eni e nyele e ke gwe nyele ni egbe wẹ, Onochi, khi e nyele ni ọni ọ gwhua ni ọ gwe vule.
16
Rharhi ona, te nena vu eyẹ vha gwe rhi otsonagbọ a gwu iọgbọ ezọ, o kha rhẹ kyia khi eyẹ kpọ yẹsẹ Ikiristi rhọ te oni odẹ ona. eyẹ vha gwe rhọ te oni odẹ ona a gwu iọgbọ ẹzọ.
17
Elemhiyọ, ọgbọ ọ kha la elemhi Ikiristi, ọgbọ ogbọ li ọ ke kyila. ẹtsẹkẹ nejọ e dọsẹ a lẹ. Ghe, ghe, enegbọ li e ke kyila.
18
Obọ Ishinẹgba li ena kwu e te bhale. Ọ rhi eyẹ nu Ikiristi sheshe, ọ she rhi akanya irhọsheshe ni eyẹ.
19
Oyọ khi, rhọ te ikpa Ikiristi li Ishinẹgba ọ te nu iọgbọ rhọ sheshe, ọ vha ke gwe lolo ingmobe wẹ shi wẹ egbe. Ọ she rhi akanya irhọsheshe mhọli eyẹ obọ.
20
Iyọ a she zẹ eyẹ to ẹloe Ikiristi, abhizẹzẹ khi rhẹmhi ọ te ikpa eyẹ tsua olema. rhẹmhi eyẹ a lema vhẹ, rharhi Ikiristi: “Vha nu Ishinẹgba rhọ sheshe!”
21
li ọ rhi Ikiristi lasẹ obo shi ingmobe eyẹ. Iẹ ọ vha li ingmobe gwhe. Irhẹmhi ọ khyiẹlẹ ona khi eyẹ kẹ kyili eni e igwabha gbe rhọ khali Ishinẹgba te ikpa ọli.