Ikhomhi 4 Ikoritiasi ni ozeva
1
Ishinẹgba ọ te ikpa ivhẹlemhi ọli rhi akanya onana ni eyẹ, imhẹli eyẹ dobẹ abọ sha eyẹ.
2
Onochi, eyẹ she khyie odẹ ogbhagbha ali omama. eyẹ vha nyele inyele ighagha wẹ khi rhẹmhi eyẹ rhi abọ kpẹghẹ, kpẹghẹ nwu oni ingmemhi Ishinẹgba. Khi eyẹ rhi udu aghyie rhọ khali iọgbọ kwu ukpẹloe Ishinẹgba.
3
Ama usomhi ingmemhi Ishinẹgba o kha gwese, eni ea li opfua li o gwese na.
4
Obodẹ Ingme wẹ, Ishinẹgba onagbona ọ she gwese wẹ idu khi e ke myie suọ. Rharhi ona, li o vha rhọ dobẹ wẹ a mato mẹ oni ufulọ ingmemhi Ishinẹgba ni o kyili ikiki Ikiristi, ni o kyili arhọkhọkhọ Ishinẹgba ma.
5
Rharhi khi a khi egbe eyẹ li eyẹ rha tsabọ, ama Ijesu Ọnọmhuẹyẹ, eyẹ kyili egamhẹ rharhi Ijesu.
6
Rharhi khi Ishinẹgba li ọ ngme ni ọọ li, “Ufulọ o la laa ke gẹẹ vhi elemhi ublili.” Ọ she gẹẹ kwu eyẹ vhi idu, khi ọ rhọ rhi ufulọ oni iyẹsẹ ikiki shinẹgba gẹẹ rhugwhu orhalo Ijesu Ikiristi.
7
Ama eyẹ mhọli oni ẹpfue ona shi agege ekhe, iyọ o ke rhọ khasẹ gboo khi Ishinẹgba li ọ mhuẹ izemhi otọgbeo a khi eyẹ.
8
Eyẹ a mhọli ọtomhẹ ẹrhẹghẹ kwu, ama o vha pfusẹ eyẹa, Eyẹ a mẹ ọshabọ ama abọ e vha sha eyẹ.
9
A zẹ okwhẹ kpẹsẹ eyẹ, ama eyẹ vha chi egbe gwhe oshimhi. A nwu eyẹ baba ekẹ, ama eyẹ vha li opfua.
10
Ẹrhẹghẹ kwu eyẹ tsua egwhuli Ijesu shi egbe a kyia, khi a kẹ ke mẹ agbọ Ijesu vhi ijegbe eyẹ.
11
Elemhi agbọ eyẹ kwu li eyẹ rhọ la okhẹna egwhuli rharhi Ijesu, ishọyọ khi a kẹ kee mẹ agbọ Ijesu vhi egbe eyẹ.
12
Rharhi ona, egwhuli oa kyia eyẹ vhi ukhomhi, ama agbọagbọagbọ o la vhẹ egbe a gbe ikanya.
13
Ama eyẹ mhọli ayẹmhẹ irhọshiọ abagwhoyọ abhi o li la akẹkẹshekẹ: “Mhi lama shi vhọ, iyọ mhi ngme,” Eyẹ li lama shi vhọ, iyọ eyẹ li ngme.
14
Eyẹ yẹsẹ khi ọni ọ nwu Ọnọmhuẹyẹ Ijesu vule, ọ li laa nwu eyẹ ma ọli vhi egbe vule. Eyẹ yẹsẹ khi ọ la laa nwu eyẹ ali vhẹvhẹ koko bhẹ vhi odalo ọli.
15
Ẹtsẹkẹ kwu rharhi vhẹvhẹ lọ, khi abhi ivhẹlẹmhi o li ga agbọ kwu egbe, iyọ li e li laa kee rhi ikphẹmhi rhi ikiki a kee ni Ishinẹgba.
16
Iyọ abọ e vha sha eyẹ. o kha rhẹ kyia khi ijegbe eyẹ e rhẹ lia kẹnaa, ayẹmhẹ eyẹ ọa kee mela onogbọa shi vhọ ogbẹlẹ kwu.
17
Oni ukwukwu ẹrhẹghẹ ona, eni ẹchọ na khẹrhẹkhẹrhẹ ena rhẹmhi ea nwuno eyẹ egbe shi ududumhi ikiki ni ẹlẹnagbọagbọ ni o khọ dala emeni e gaa khọ nẹẹ kwu.
18
Rharhi khi eyẹ vha bino ẹtsẹkẹ ni a mẹ ẹloe, ama ẹtsẹkẹ ni a vha mẹ ẹloe, Rharhi khi emeni eyẹ a mẹ ẹloe ukwukwu ẹrhẹghẹ li ea la vhọ, ama ẹtsẹkẹ ni a vha mẹ ẹloe ẹlẹnagbọagbọ li ea la vhọ.