Ikhomhi 7 Ikọritiasi ni ozeva
1
Eni e gwhẹ mhẹ, abhi o ke rhọ kyila khi eyẹ mhọli oni ishobọ ona, eyẹ rhi emeni e vha pfuasẹ shi ipfuasẹ vhi elemhi ijegbe ali ayẹmhẹ eyẹ. Eyẹ rhi ulishi Ishinẹgba na kee kwhu ipfuasẹ.
2
Vha rhi udu ogwho rhọ khali ẹyẹ! Eyẹ vha khyiẹlẹ ọgbọ onobe. Eyẹ vha gbe ọgbọ wẹ khi rhẹmhi eyẹ li ọgbọ le.
3
A khi rhẹmhi ẹ khi mhi rhi ona pfuẹchẹ vhẹ eva. Rharhi mhi she kpọ ngme khi ingmemhi vhẹ o la eyẹ vhi idu, khi eyẹ gaa gwhu eyẹ gwe gaa nyele kwugbe.
4
Mhi mhọli irudunya otọgbe rhọ khẹ vhẹ, mhi gwe rhẹ vhẹ a gha. Udu o zeze mhẹ. Oghẹlẹ o gaa vọ mhẹ udu ni eyẹ rhẹrhẹ la ọtomhẹ.
5
Abhi eyẹ rhọ bhẹ vhi Imẹsidonia, eyẹ vha mhuẹ isheshegbe. Onochi, irhẹmhi a zẹ okwhẹ ẹẹ kpẹsẹ eyẹ odẹ khi odẹ kwu, o ke pfi ulishi shi eyẹ vhi iteteva.
6
Ama Ishinẹgba, ni ọa zeze ọgbọ ni abọ esha udu, ọ rhi ibhale Itatọsi zeze eyẹ idu.
7
A khi ibhale Itatọsi lọgwho o zeze eyẹ idu. Li shi izezudu ni Itatọsi ọ te obọ vhẹ mhẹ. Ọ gwu khasẹ eyẹ ighọli ni vha mhọli, shi oya ali ipfiẹgbueshi ni vha mhọli na mhẹ. Irhẹmhi ghẹlẹ ghẹlẹ.
8
O kha rhẹ kyia khi ebe na mhi kẹkẹ ghyi vhẹ khi o vha rhi egbe nwu vhẹ, imha vyiẹ ikharhọ. na mhi rhẹ mẹ khi ebe mhẹ khi o pfi oya na vhẹ. ama khi ukwukwu ẹrhẹghẹ li egbe vha le laa nwu vhẹ.
9
Nenaa egbe li e ke a nwu mhẹ, a khi rharhi khi o khekhe vhẹ egbea, rharhi khi oni ikhekhegbea o rhi inwulieliẹ na vhẹ. Osoli Ishinẹgba lẹ vhaa mẹ egbe, vhavha mẹ osue kwa rharhi eyẹ.
10
Rharhi oya Ishinẹgba li o rhi inwulieliẹ a bhale ni o rhi imyiepfuese ni ikharhọ o vha la bhẹ. Osoli oni agbona, abhabhi o rhẹ li, egwhuli li ọa pfi.
11
Vha bino gwhe ukpokpomhi inyakwa ni oni osoli Ishinẹgba ona o pfi na vhẹ. Vha mẹ ukpokpomhi inyakwa ni vha mhuẹ ni o rhọ khasẹ khi vha mhọli emeni vha li. Vha mẹ abhi o li to vhẹ egbe, ulishi ni o nwu vhẹ, ali ududumhi ọnwegbe ali abhi vha li nono khi a khyiẹlẹ ọli te odẹ! vha rhọ khasẹ khi vhavha mhọli emeni vha yẹsẹ vhi oni ingme ona.
12
Ama rhẹmhi kẹkẹ ebe ghyi vhẹ, ama a khi rharhi eni e gbegọ, wẹ khi rharhi ọni ọa mẹ ẹchọ shi igbegọ ni ọ gbegọ. Rhẹmhi eyẹ kẹkẹ khi eyẹ rhọ khasẹ vhẹ ukpẹloe Ishinẹgba ipfiẹgbueshi ni vha mhuẹ ni eyẹ.
13
Ena li o rhi eyẹ mhọdu. Ni e zeze eyẹ idu, irhẹmhi oghẹlẹ o vọ eyẹ idu rharhi Itatọsi’, rharhi vhẹvhẹ kwu vha nwu ayẹmhẹ ọli mela onogbọa.
14
Na mhi rhẹrhẹ rhẹ vhẹ gha khasẹ ọ, vhavha rhi omama nwu mhẹ. Odẹ ovhese, abhi emeni eyẹ gwu khasẹ vhẹ e le li kyili ingmaghyie eyọ, iyọ li inyanọ ni eyẹ rhẹ vhẹ nyanọ khasẹ Tatọsi o she rhọ khasẹ khi olẹmhi o vha la vhọ.
15
Ighọli ni Itatọsi ọ mhọli na vhẹ li o fu nẹẹ, abhi ọ li sa lẹẹ to isuesọ vhẹ, ali abhi vha li rhi ulishi ali ibamhijẹjẹjẹ tsẹ ọli mekyia.
16
Mhia ghẹlẹ rharhi khi mhi rhi egbe nya vhẹ pfuse.