¹ مین سال پونزدهم فرمونرواییتیبریوسِ قیصر،اوسو که پنتیوس پیلاتُس والی یهودیه بی،هیرودیس حاکم جلیل،گُوش فیلیپُس حاکِمِ ایتوریه وتراخونیتیس، لیسانیوس حاکم آبیلینی ، ² وُ حنا وُقیافا هم کاهِنون گَپه بییِن، کَلوم خدا مین بیابون وِیحیی ،کُرِ زکریا،نازل وُوی. ³ اوسو یحیی وِهمه جاهای اردن ایرَه وُ وِمردم نصیحت ایکِرد که سی آمرزیدنِ گناهاتون توبه کنین وُغسلِ تعمید بِگِرِن. ⁴ چونو که مین کتاب اِشعیای نبی پیغُمبَرنوشته وُوی که:«صدای هو که مین بیابون فریاد ایکِشه، رَهه سی خداون آماده کنین! جادنه سیش هُواربسازین! ⁵ همه ی کُه و کَمَرا و تپه ها تخت ایبون؛رَهها ناراست ،صاف و جاده ها ناهُوار ،هُوار ایبون. ⁶ اُوسونه که بشر ایبینِن که خدا چطُوری نجاتشون ایدِه» ⁷ یحیی وِاو جماعتی که سی تعمید گرِدَن طیش اِوِیِن ،ایگو:«ای مارونِ خوش خط وخال ،کی وِایشا گوده که ایتِرین زِغَضَوی که خدا ایفِرِسته سیتون فِرار کُنین؟ ⁸ پَ نتایجِ خووِ تووَتون بیارین وُ وا خوتون نگوین که: بُو ایما ابراهیمه.ِ‌سی یو وِایشا ایگوم، خدا قدرت یُونه داره که زِ ای بَردا سی ابراهیم اولاد راست کنه. ⁹ زِهمی حالا تیشه وِ ریشه درختا زیده وُویده. هر درختی که ثمرِ خو نده ایبُرِنِش وایوَنِش مین تَش.» ¹⁰ مردم وِش پرسیدِن، پَ وا چه بکنیم؟ ¹¹ جواو دا ،هر کی که دوتا جووه داره، وِ هو که نداره بده.وُهر کی که خوراک داره هم همی کارِبکنه.» ¹² وُ باجگیرون هم سی تعمید اوِیِن بی تِیش تعمید بِگِرِن، وِش پرسییِن، ای استاد ایما وا چه بکنیم؟ ¹³ وشون گو: زیادتر از او چیزی که قراره زِمردم بگِرین، نستونین. ¹⁴ سپاهیون هم وِش پرسییِن گويِن،ایما وا چه بکنیم؟ وشون گود، وِکسی ظلم نکنین وُوِکسی تهمت نزِنین وُ وِحقوق خوتون راضی بووین. ¹⁵ وُ اوسو که مردم در مورد یحیی هی فرک ایکِردِن که یو مسیحه یا نه، ¹⁶ یحیی وِهمشون توجه کِرد وگود ، مو ایشانه وا اُو تعمید ایدُم ، ولی یکی تواناتر زِمو ایاهه که مو لیاقت یونه ندارُم که بند نعل های هونه واز کُنُم. هو ایشانه وا روح القدس و تَش تعمید ایده. ¹⁷ هو غربال خُشِن وا دست گِرِِده وُخرمنشِن پاک کِردِه، گندمشِن مین انبارِش ذخیره ایکُنه وُکَهنه مین تَشی که هیچ وقت کور نیبوهه ایسوزنه. ¹⁸ یحیی وا نصیحتاش ،خبر خوشِن ایرسوند وِمردم. ¹⁹ ولی هیرودیس حاکم ،سی یو که هیرودیا،زینه گُوش ،وُسی یو که شرارتا دیه که کِرده بی ،یحیحی مواخذَش کرده بی، ²⁰ یحیانه کِرد زندون وُ چونو بی که یه خطا دیه اِوِرد سر خطاها خوش. ²¹ اوسو که همه قوم تعمید گِرِن وُعیسی هم تعمید گِرِه بی دعا ایکردَ، آسمون گُشِست ²² وُروح القدس وِهیوَت یَه کموتری اِوِی وِلَم ، وُ صدایی زِآسمون بلند وَِوی که گو:«تو کُرِ عزیزِ مونی که زِت راضییُم». ²³ عیسی دوربلا سی سال بی که ،خدمتش شروع کِرد . وُ مین فرگ مردم، کُرِ یوسف ایدونستِن ،وُ یوسف کُرِهالی بی، وُ هالی ²⁴ کُرِ متات، کُرِلاوی ،کُرِملکی ،کُرِیتا ،کُرِیوسُف ، ²⁵ کُرِمتاتیا، کُرِآموس ،کُرِناحوم، کُرِحسلی، کُرِ نجی، ²⁶ کُرِمات، کُرِمتاتیا، کُرِشَمعی، کُرِیوسف، کُرِیهودا، ²⁷ کُرِیوحنا ،کُرِریسا، کُرِزروبابل،کُرِشِئَلتیئیل ، کُرِنیری ، ²⁸ کُرِملکی،کُرِاَدی، کُرِقوسام، کُرِاِلمادام، کُرِعیر، ²⁹ کُرِیوشَع، کُرِاِلعازار، کُرِیوریم، کُرِمَتات، کُرِلاوی، ³⁰ کُرِشمعون، کُرِیهودا، کُرِیوسف، کُرِیونام،کُرِالیاقیم، ³¹ کُرِمِلیا، کُرِمنا،کُرِمتاتا،کُرِناتان، کُرِداوود، ³² کُرِیسا، کُرِعوبید،کُرِبوعز، کُرِسلمون، کُرِنَحشون، ³³ کُرِعمیناداب، کُرِرام،کُرِحصرون، کُرِفارص، کُرِیهودا، ³⁴ کُرِیعقوب، کُرِاسحاق، کُرِابراهیم، کُرِتارَح،کُرِناحور، ³⁵ کُرِسروج، کُرِرِعو،کُرِفِلِج، کُرِعِبِر، کُرِشِلَخ، ³⁶ کُرِقینان، کُرِاَرفَکشاد، کُرِسام، کُرِنوح، کُرِلَمِک، ³⁷ کُرِمَتوشالح، کُرِخنوخ،کُرِیارَد، کُرِمَهَلَئیل، کُرِقینان، ³⁸ کُرِاَنوش، کُرِشیث، کُرِآدم،کُرِخدا.