¹ Ia na gauna ana, nidra sa lelevu edra sa lotu, edra sa qai di,o odra a vulagi ni veimatanitu tani ve edra Iperiu, ni sa maqa ni nanumia o odra Yada e na vu'u ni vivota ni yau ina veisiga. ² O odru a lewe tiniarua dru sa soqoni edra vata a lewe levu dra sa lotu, qa aya,e maqa ni dodonu me tou biutia a vosa ni Alou,qa qaravia a teveli. ³ Omudou taciqu dou digitainia mai e vitu a tamata mai vei emudou oya ilai ni Sinai ena yalo Tabu, ei na vu'u me tou lesi edru ina ca'aca'a ai. ⁴ Ia oi tou a gumatua sara e na masu, ei na vunautainia a vosa. ⁵ Sa re ve edra tauco'o a lewe vuqa a vosa ai:edra sa qai digitai Sitiveni, e tila tamata sa Sinai ena vabauta ei na Yalo Tabu, ei Filipi, ei Pirikoro, ei Nikamori, ei Taimoni, ei Parimina, ei Nikola, a tamata lotu va Jiu mai Anitioki. ⁶ Edra sa vatu ni edru ina odru mata ai apositolo,dru sa qai taba i edru ina gauna dru sa masu ina. ⁷ Sa qai gumatua na vosa ni Alou ;qa sa valevutainia sara a edra wiliwili o odra sa lotu mai Jerusalemi ;qa sa lelevu leqa ga a bete edra talairawarawa i na vabauta. ⁸ Ia sa sinai ena vabauta ina kaukauwa o Sitiveni sa qai vele'e eso a vivaurabutai ina ca'aca'a mana levu ina edra maliwa a tamata. ⁹ Sa qai tucadra eso mai na odra vale ni lotu, a odra yaca odra na serei ei edra a ai Kirini eso,ei edra ai Alekisadria qa so leqa qa so mai Silisia ei Esia, edra sa vileti ei Sitiveni. ¹⁰ Edra sa maqa ni qarava rawa a ona vu'u ei na Yalo a vosa ina o oya. ¹¹ Edra a qai dia lo mai a tamata eso, edra aya, "Eitou a rogoi oya ai ni a vosa vacacatai Mosese ei na Alou." ¹² Edra a vauqeti edra a tamata, ei odra a matua, ei edra a vunivola edra a lao vakaukauwa vei oya, tari, edra dia ve edra mataveilewai. ¹³ E dra a tarogi edra a duveibeitai vaseseni, e dru aya, a maqa ni mudu a tamata ai ni a vosavacacatai a ti'ina tabu ai ei na vunau. ¹⁴ Ni eitou a rogo ni aya, ena varusa a ti'ina ai o Jisu a ai Nasereci, ena vuicia sara ai valavala a soli vei eda o Mosese. ¹⁵ Ia ve edra tauco'o a notu i na vale ni veilewai nidra vaigavia matua, edra a igavia odra mata ni a tautauvata ei a mata ni agilose.