¹ E tila tamata a yacana o Ananaiasa,ei a watina o Safaira,a volitainia a vanua. ² A vunitainia eso a ena i voli (e ila leqa ga a watina), a sa dia eso a taucia ina odra la ai apositolo. ³ A sa aya o Pita, "Ananaiasa e vaevei ni a vasinaiti a omu yalo o setani mo seni vei oya yalotabu, mo vunitainia eso ai voli ni vanua? ⁴ E maqa li ni omu ga ni se bere ni volitai? ia ni sa voli tai devu, o a maqa be a li ni veitaliatainia? e vaevei ni o a vananumia ina vei a ai e na lomamu? O a maqa be'a ni seni vei odra tamata, oya seni ga ve eya Alou. ⁵ Ia ni a rogo a vosa ai o Ananaiasa e a bale sobu, a ciba e dra a dala valevu ina odra tauco'o a rogo a vei a ai. ⁶ Edra  a lao mai mada a cauravou a solegi oya, a colati oya ituba qa bulutia. ⁷ Ia ni a devu e tolu be a aua,a qai curu waqe o watina,e maqa ni ila a sa yaco. ⁸ A tarogia o Pita, "Aya mai vei au se mudru sa volitainia a vanua e nai lavo se maqa? A sa aya o oya, io, e va a ga oya. ⁹ A qai aya o Pita ve eya, e na i vei ni mudru a lomavata mo mudru vatovolea vaca a yalo ni Turaga?igavia a tu e tuba a odru ia odru a buluti watimu, dru na colati io leqa ga i tuba. ¹⁰ A qai bale sobu sara i na ona la, a ciba dru a curu waqe a gone tagane , qa igavia ni a ciba tu,dru a colatia waqe, qa bulutia ina ru'u i watina. ¹¹ Edra a dala valevu i na, odra tauco'o ai soqosoqo lewe ni lotu, ei odra vataliga edra a rogo a vei a ai. ¹² A sa vele'e, ai vataila'ila ei na a veivaurabuitai e vuqa ena odra liga ai apositolo ve edra tamata edra a no loma vata tauco'o ena varada oi Solomoni. ¹³ Ea maqa e dua vei odra a vosa doudou me to vata ei odra ;a varo'oro'otai edra o odra a tamata. ¹⁴ A sa vaiuritai valevu vei oya turaga a tamata eso edra vabautia edra lelevu a tagane ei a yalewa leqa ga. ¹⁵ Edra a di odra ina, edra a tauvimate ina veigaunisala,edra vaotori enai oto'oto lelevu ei na i oto'oto lalai, me varurugi eso ve edra a yaloyalo i Pita ni a lao waqe ina. ¹⁶ Edra lelevu leqa ga a lao mai ina vei oro  vavolivoliti Jerusalemi, edra  di waqe tamata edra tauvimate, ei odra a vararawatai odra yalo velavela eso dra a vabulai va tila ga. ¹⁷ A qai tu cadra a bete levu, ei odra tauco'o edra notu vata aya,odra ai toani oi Setoki, edra a sinai ena civo. ¹⁸ Edra a vesui odru ai apositolo ma biuti edru i na vale ni veivesu. ¹⁹ Ni qai bogi mai a dolavia a ta'ari ni vale ni veivesu e tila agilose ni Turaga, ma di edru waqe i tuba. ²⁰ Dou lao a la i tu e na vale ni soro, sa aya ve edra tamata a vosa tauco'o ni bula ai. ²¹ Ia ni dru a rogo, edru sa curu  i na vale ni soro, ni ida a roaroa, vatavuvuli. A lao mai a bete levu, ei odra edra a dau notu vata aya, edra a soqoni edra vata e na mataveilewai, ei odra tauco'o a  matua a driadria i Isireli, odra  leqa eso ina vale ni veivesu me di odru mai. ²² Odru a ovisa ma lai vaunei edru mai qa sa maqa ni unei edru i valeniveivesu,qa dru lesu leqa mai me dru mai aya, ²³ "Eitou sa une a valeniveivesu ni sogo butu tu qa dra tucae tu ina odru a yadra na mata ni ta'ari,io ni eitou sa dolavia,eitou sa maqa ni une e dua ni tu iloma." ²⁴ Ia ni dra a rogo ai tu'u'tu'u, O odra turaga ni vale ni soro ei odra leqa ga a bete turaga, edra a idroa ina se a tubu be'a vaevei a ai. ²⁵ A qai lao mai e tila qa aya, "igavia! O dru a tamata dou a biuti odru i na vale ni veivesu edru a tu e na vale ni soro, a vatavulici odra tamata." ²⁶ E qai lao a Turaga ei odru a ovisa a di odru mai, ia dru a maqa ni vele'e vaqaqa nidru a dala va'i odra tamata, de dra vaviri'i odru i na vatu. ²⁷ Ia ni dru a di odru mai, edru a vatura ena odra mata i na mataveilewai, qa tarogi odru a bete levu. ²⁸ Eitou a maqa be'a ni varota matua vei emudou," Mo dou uwa ni vatavuvuli e na yaca ai?igavia, dou a vasinaiti Jerusalemi ena omudou vavuvuli, dou a naita leqa ga me eitou tarogi ina ve dra a tamata ai." ²⁹ Ia o Pita ei edra a apositolo dru sa saumia,"Eda dodonu me varo'oro'otainia a Alou mai na ro'ovi edra no a tamata. ³⁰ A Alou odra tamada oya di Jisu cae mai,oya io ma valiligi oya qai mate. ³¹ A turaga sa vacerecerei oya qa biti oya na ona liga matau me luve ni veivabulai,me solia a veivutuni vei edra a ai Isireli,qa vosotia odra valavala ca. ³² Eimami a vadinadina ni a tauco'o ai,ni sai oya ga a yalotabu,a Alou oya sa solia a ,a vei edra oya sa vabauti oya." ³³ Ia nidra a rogo edra a civo valevu, edra a bose medra vamatei edru. ³⁴ A qai tucadra e tila ena edra maliwa a mataveilewai, a Farisi, o Kamelieli a ona yaca, a vu-ni-vunau, a rogorogo re ve edra tamata tauco'o, a aya me di valailai ga ituba o odru ai Apositolo, ³⁵ A qai aya ve edra, "Miau a tamata ni Isireli,dou varorogo sara mai vare  na a sa aitai ve edra a tamata ai ³⁶ Ni a tubu ca'e i mada o Cuta, a dau aitai oya me alevu, edra a lai tovata aya tamata eso, edra a wili vata edra a lewe va bea a drau ;a qai vamatei  oya ai ei odra tauco'o, edra a talairawawa vei oya, edra a vasesei, oti waqe. ³⁷ A devu ai a qai tubu cae o Jutasa a ai Kalili e na gauna a volai ina a tamata, edra a lewe vuqa a di tani o oya medra muri oya :a rusa leqa ga o oya. ei edra vatila ga edra a talairawawa vei oya edra a vasesei. ³⁸ Ia ai, au aya vei emudou, dou uwa soti ni uti odru a tamata ai se na ca'aca'a ai ena varusai ga. ³⁹ ia e va, a mai vei oya Alou, dou a maqa ni varusai rawa, de dou unei bea ni dou a vivala ei na Alou. ⁴⁰ Edra a qai yalovata aya:ia nidra a tarogi odru ai apositolo, a saoci, edra a varota matua ve edra medra uwa sara ni vosa e na yacai Jisu edra a qai serei odru me dru lao. ⁴¹ Ia ni dru a lao tani waqe e matadra a mataveilewai, edru a re , ni dru a yaga medru vacacani e na vu'u ni ona yaca. ⁴² ia ena vei siga tauco'o e na vale ni soro, ei na vivale tauco'o, edra a maqa ni mudu ni vatavuvuli qa vunautaini Jisu ni oya a Karisito.