¹ Ia o Joni ei Pita ena odru vosa no ve edra tamata,ma lao waqe ve edru odra bete levu ei odra turaga ni vale ni soro vata ei edra lala oi Setoki. ² Edra ma civo baletia o Joni ei Pita ena odru va vulici odra tamata, qa vunautainia leqa ga a ona tu cadra leqa ga mai na mate e na vu'u i Jisu. ³ Madra a vesu'i edru qa biuti edru ina vale ni veivesu ena taranavi qa yacovia roaroa. ⁴ Ia madra lewe levu a tamata madra rogo ai vunau qa dra qai vabautia ;madra lewe lima be'a udolu a tagane walega ⁵ Na siga tarava madra soqoni vata i na Jerusalemi odra turaga ei odra a qase vata ei edra a vunivola. ⁶ Anasa a bete levu e a notu ina, ei Kaiafa, ei Joni, ei Alekisada ei odra tauco'o mataqali bete levu. ⁷ Edra qai di Pita mai ei Joni qa dra biuti edru na edra maliwa qa dra vatarogi edru, a kauakuwa cava se na yacai cei mudru vele'e ina a ai? ⁸ Sa qai sinai o Pita i na Yalo Tabu,qa aya ve edra,omiau a turaga a tamata, ei mi'au a odra qase i Isireli. ⁹ Ei rua tarogi na ca'a ca'a re mai ve eya a tamata loiloi, se cava a qai bula ina; ¹⁰ Omi'au ila tauco'o ei odra leqa ga Isireli, ni yacai Jisu Karisito a ai Nasareci, oya mi'au a vaotia ina kauvelatai, o oya a vatu cadra tainia leqa a Alou mai na mate, io ena vu'una ga sa tu ina ai oya e na omiau mata qa sa vabulai. ¹¹ Jisu Karisito oya a vatu cadra ,catia dau tara vale sa qai yaco me vadei ina yavu ni vale. ¹² Sa maqa bula e na vu'u i dua tani leqa, ni sa maqa e dua leqa a yaca e ru'i lomalagi, sa soli ve edra tamata, me rawa ina bula. ¹³ A gauna madra sa igavia ina a odru doudou o Pita ei Joni, ni dra a ila leqa ga edru a maqa ni vu'u, se tamata vuli,edra a urabui ina;nidra sa qai nanumia nidru ma notu vata ei Jisu. ¹⁴ Ia nidra sa igavi eya a tamata ma sa vabulai, ni sa tu vata ei edru,qa dra sa maqa ni vatitiqa tai nia rawa. ¹⁵ Dra sa qai vatalai edru tani mai na vale ni bose dra sa qai bosei edru va ai edra ga. ¹⁶ A cava me da vele'e ve edru a tamata ai? nidra sa ila o odra tauco'o sa notu i Jerusalemi, ni a tila ca'aca'a mana levu dru sa vele'e,qa da maqa ni vatitiqa tainia rawa. ¹⁷ Ia de na a'i tai valevu ve edra tamata, me da vasala taini edru ga,nidru na civoti sara valevu edru vavulicia leqa e dua yaca ai vei dua tamata. ¹⁸ Dra qai tarogi edru leqa mai,qa vasala taini edru medru uwa sara ni vosa se veivavulici ina yacai Jisu. ¹⁹ Sa qai vosa o Pita ei Joni qa dru aya ve edra, Vatau ga vei "Emiau e dodonu be'a e na mata ni Alou me eirua varorogo vei mi'au qa maqa vei eya Alou. ²⁰ Ni sa dredre vei eirua, me eirua uwa ni aya na veia eirua a igavia se rogo. ²¹ Ia nidra sa maqa ni une e dua a medru civoti ina, edra sa qai vosa udru'udru ve edru,qadra a qai serei edru medru lao ena vu'udra a tamata ni dra varo'oro'otainia Alou ina vu'u ni a tauco'o dru sa vele'e. ²² Ni o oya tamata ma vala ve eya ca'aca'a mana ai sa bula ina, ma sa yabai vasagavulu. ²³ Ia nidru sa serei ina o Pita ei Joni dru sa qai lao ve edra ai lala qa aya ve edra, a ma aya ve edru a bete levu ei odra a matua. ²⁴ Na gauna madra sa rogo ina ai,dra sa qai lomavata qa dra qolou vainia cae a odra domo ina masu ve eya Alou. "Omiau Turaga," edra aya, Omiau a bulia lomalagi ei na vuravura ei na waidui, ei na a tauco'o ga sa tu ina. ²⁵ Ena gusu i Tevita omiau tamata omiau ma aya,a dau civo a vei matanitu e na vu'u ni cava, sa va nanumia a wale o odra a lewe ni vanua. ²⁶ Omiau ma aya,a Tui ei vuravura, edra soqoni vata ei edra a Turaga medra vivala ei Jiova ei na ona Karisito. ²⁷ Ia o Eroti ei Ponitio Pailato ei edra vi matanitu, ei edra Isireli, edra a soqoni vata mai i naoro ai medra vivala vata eya omiau yalo savasava o Jisu, o oya omiau a lumutia. ²⁸ Medra vele'e tauco'o a vei a omiau ma lesia , me tautauvata a omiau kaukauwa ei na omiau na'i. ²⁹ Ia, turaga miau igavia a odra vosacivocivo,qa solia ve edra a omiau talatala, medra doudou valevu nidra aya a omiau vosa. ³⁰ Omiau sa dodo no, a omiau liga me ia a veivabulai me vala ga leqa ga ai vata'ila ila ei na a veivaurabuitai,ina yaca ni luvei miau yalosavasava o Jisu. ³¹ Ia nidra a masu devu,qai yavalati a vale madra a soqoni vata tu ina dra sa qai dui vasinaiti tauco'o ena Yalo tabu,qa dra doudou ina nidra aya a vosa ni Alou. ³² Ia odra tauco'o sa vabauta edra sa loma vata qa yalo vata qa maqa ni dua e aya me ona duadua ga sa tu ve eya, edra sa tauena vata a ona i yau yadudua. ³³ Sa levu odra kaukauwa ai Apositolo, nidra aya sa tu cadra leqa ga mai na mate a Turaga o Jisu,qa sa guti edra valevu o odra tauco'o ga. ³⁴ Ni sa maqa e tila ve edra a dravudravua ;qo odra tauco'o ga edra sa tauena vata vanua se vivalevale, edra a voli tainia, qa dra sa dia mai ai sau ni a edra sa volitainia. ³⁵ Qadra biutia ina odra la ai apositolo:sa qai votai ve edra yadudua me tautauvata ga odra dui dravudravua. ³⁶ O Josese leqa ga odra sa vayacania ai apositolo me o Panapasa (a ena i balebale a gone ni vacegu)a luvei Livai a ai Kipiro. ³⁷ O oya taueni dua vanua,qa volitainia,qa dia mai e nai sau,qa biutia i na odra la ai apositolo.