¹ Sa qai lao cae o Pita ei Joni ina vale ni veitavai, ena auwa ni odru masu, ena i a ciwa ni auwa. ² Sa qai dua a tamata loiloi mai na ete i tinana sa colati voli me dra vaotori oya ena vale ni veitavai sa vatoai o lagilagi me ere ani loloma vei edra sa curu i vale ni soro. ³ Ni sa qai une Pita ei Joni ni dru sa varau curu na vale ni veitavai, sa qai ere ere me dua a ani loloma. ⁴ E dru sa qai va une oya va matua qa dru aya vei eya. Unei eirua mai. ⁵ Sa qai vaunei edru va gumatua de dru Solia mai vei oya e tila a. ⁶ Sa qai aya vei eya o Pita "A siliva vata koula e maqa vei eirua, ia a ga sa tu vei eirua eru na solia vei io: E na yacai Jisu Karisito a ai Nasareci mo tu cae qo lao. ⁷ Sa qai Tauria a ona liga matau qa tubera cae sa qai vakaukauwa tainia a ona la me tu cae. ⁸ Sa qai lade qa tucae qa vei ovuyai qa curu vata ei edru i vale ni soro, sa qai lao qa va ro'o ro'o tainia a Alou. ⁹ E dra sa qai unei oya ni sa lao voli qa va ro'o ro'o tainia a Alou. ¹⁰ E dra sa qai ila ni oya ai e dau dabe toa na mata ni vale mai lagilagi ina vale ni soro me dau ere ani loloma. edra sa qai rere qa dra urabuitainia a vei a sa yaco vei ea. ¹¹ Sa qai tauri Pita ei Joni o oya tamata loiloi, sa qai va bulai, era sa qai ovu tauco'o ga mai a tamata vei edru i na varada oi Solomoni, era sa qai urabui tauco'o ga. ¹² Sa qai unei edra o Pita qa aya vei edra "E mudou a ai Isireli a cava dou sa Urabui ina ena vei a ai se cava mudou sa va unei ei rua ina? Se kaukauwa cava edru vasatainia me bula rawa ina? ¹³ A Alou i Eparama ei Aisake ei Jekope a odra alou a oda qase sa varo'o ro'o tai oya a luvena o Jisu, o oya dou a solia waqe dou a lai beitai oya vei Pailato ni ma sa lewa oti me sere. ¹⁴ Dou a beitai oya a yalo savasava o oya yalo dodonu, qo dou masuta me soli vei emudou e dua yalo ni dau laba. ¹⁵ Qa dou vamate a vunibula, o oya a vaturi eya ca'e leqa a Alou mai na mate, ia eitou sa vadinadina ina  ai. ¹⁶ I na vabauta ena vu'u ni ona yaca, sa vakaukauwa tai ina o oya qa dou sa une ni sa are vei emudou qa soli odra vei emudou a bula. ¹⁷ Au  ila ni dou a vele'e tu e na loma ca qa maqa ni ila  leqa ga ina o odra a omudou turaga. ¹⁸ A ari sa varaitainia oti a alou ena odra gusu a Parofita nia mate a Karisito sa qai va yacora ina. ¹⁹ O oya mo dai qai veivutuni qa saumai mai na omudou i valavala ca, me bo'oci ina a omudou valavala ca me yaco ina vei emudou a vacegu ni turaga. ²⁰ O oya a talai Karisito, ia o Jisu a varautai rawa i mada veiemudou. ²¹ O oya e dodonu me lao ga mai lomalagi me yacovia a gauna e na vele'e leqa ina a tauco'o qa vosa ina a Alou vei edra a ona Parofita Yalo savasava ena gauna ma'awa sara. ²² Sa dina sara sa tovole'e o Mosese ena vatubura cae vei emudou o Jiova e dua mai vei edra a we amudou e dua Parofita me tautauvata ei au, dou na qai dau rogoci oya. ²³ Ena qai vasinai o oya vayadua e maqa ni rogo a vosa ni Parofita. ²⁴ O odra tauco'o a Parofita  mai vei Samuela qai veitaravi sobu ei edra tauco'o ga edra parofisai tainia oti ai. ²⁵ Oi emudou leqa ga a luveni Parofita ei na luve ni Alou me yaco vei Eparama, ena alougata a vei mataqali e vuravura tauco'o ina omudou awa. ²⁶ Sa qai tala mai a luvena a alou me liutai emudou ni sa vabulai emudou oti mai na omudai valavala ca.