¹ Io ena gauna ana sa vele'e o Eroti a tui me vararawatai eso vei edra a soqosoqo lewe ni lotu. ² E sa vamatei Jemesa a taci Joni ena selewau. ³ Io ni sa igavia sa gutia o odra a Jiu, sa qa tari Pita leqa ga. Io ni sa gauna ni ana madrai sa maqa ni valeveni. ⁴ Qa ni sa tauria, sa biu i na vale ni veivesu, solia ina mata-sotia medra yadravi eya qa sa nanumia me di vei edra a tamata, ni sa oti a ana vata ni lao-sivia. ⁵ Io o Pita se biu noga i vale ni veivesu, io edra sa dau masulai ni eya no vei eya a Alou o odra a soqosoqo lewe ni lotu. ⁶ Io ni varau o Eroti me di ea mai, e na bogi ana sa moce o Pita ena edru maliwa e lewe rua a sotia, e sa vesu ena sinucodo e rua, edra sa tu a enai vatawa e na mata ni ta'ari, medra yadravia a vale ni veivesu. ⁷ Qa igavia, sa dua a agilosi ni Turaga e lao mai, qa sa cila waqe a rarama i na vale ni veivesu, qa sa vatucaetainia, qa aya, "Vatotolo mo tucae". E sa lutu tani mai iligna a sinucodo. ⁸ Qa sa aya vei eya a agilosi, "Dara a omu i sulu qo dara a omuivava qo muri au mai." ⁹ E sa curu waqe o oya, qa sa muri eya qa maqa ni ila ni dina a'a sa vele'e a agilosi, e nanuma ga ni igavia no a raivotu. ¹⁰ Ia ni dru sa sivi edru a matai ni vatawa ei na arua, edru sa yaco i nai sogo kaukomea sa basia i naoro; e sa tadola ga vatai  eya vei edru qa dru sa lao sara i tuba, qa sivia e dua salevu, qa sa qai lao tani vasauri vei eya a agilosi. ¹¹ Io ni sa qai ilai yalona o Pita, sa aya, "Au saqai ila dina saraga, ni sa tala mai a ona agilosi a Turaga, e sa vabulai au mai na liga i Eroti, mai na odra ina'i tauco'o a ai Jutia". ¹² Io ni sa vananumia no, sa yaco o oya ina vale i Meri a tinai Joni, a ona yaca leqa ga o Marika edra sa lewe levu edra sa soqoni vata ina me masu. ¹³ Io ni sa tu'itu'i o Pita, nai sogo ni matamata ni oro, sa qai lao e dua vada me varorogo a yacana o Rota. ¹⁴ Io ni sa ila a domo i Pita, se maqa mada ni dolavia ai sogo qa sa marau, qa ovu sara iloma qa aya ni sa tu o Pita ena matamata ni oro. ¹⁵ Qa dra sa aya vei oya, "O sa lialia". Io sa vadinadina no oya ni tauvata ga. Edra sa qai aya, "Rai ona agilosi." ¹⁶ Io e tuitui no ga o pita, qa ni dra dolava, edra sa gavia qa dra sa idacala. ¹⁷ Qa sa vatabataba ve odra o oya me dra varorogo qa sa aya vei edra ni ma di oya mai na vale ni veivesu a Turaga. Qa aya, "Lai aya vei Jemesa, qa vei odra leqa ga a veiweani."Sa qai lao va tii'iti'i o oya, qa lao ina dua vanua tani. ¹⁸ Io ni sa siga mai, e maqa ni lailai a odra idacala a sotia, se sa lao bea i vei o Pita. ¹⁹ Io ni sa vaqarai oya o Eroti, qa maqa ni gavia sa tarogi edra a vatawa, e sa aya medra vamatei. Qa sa lao sobu o Eroti mai Jutia i Sisaria, qa notu ina. ²⁰ E sa civo valevu o Eroti vei edra a ai Taia ei Saitoni, edra sa qai loma vata qa dra lao mai vei oya, io ni dra sa rawai Pilasito, o oya sa lewa a vale ni moce wei Eroti, me vu'ei edra, edra sa masuta a veiguti, ena vu'u ni a sa di mai a edra mai na ona vanua a tui. ²¹ Io ni sa yaco a siga dru sa louci, sa qai vaisulu o Eroti ena sulu vaturaga, qa sa notu enai dabedabe vaturaga, qa vunau vei odra. ²² Sa qai ela vaini oya odra tamata, "Sa domo ni Alou sa maqa ni domo ni tamata." ²³ Qa sa yaviti oya vasauri e dua a agilosi ni Turaga, ni maqa ni varo'oro'otai ina a Alou o oya qa sa ani oya a baca qa mate. ²⁴ Io sa tubu ga a vosa ni Alou qa levu sara mai. ²⁵ Qa dru sa lao leqa mai Jerusalemi o Panapasa ei Saula, ni dru sa vaotia a ca'aca'a, qa dru sai di Joni, a ona yaca leqa ga o Marika.