¹ O odra a apositolo ei edra a veiwe'ani mai Jutia edra sa rogocia vta ei odra leqa ga matanitu ni dra sa rogo leqa ga a vosa ni Alou. ² Ni sa lesu ca'e leqa mai i Jerusalemi o Pita, edra sa tava'i oya tu mai o odra sa cilivi me dra veileti vata ei oya ³ .Edra sa aya vei oya, "O a lao vei edra a maqa ni cili o qai lai ana vata no ei edra!" ⁴ Sa qai vamacala vamatalalai o Pita vei edra, ⁵ "Au ma masumasu no mai na oro levu o Jopa: au qai igavia e dua a raivotu, e dua a siti levu ma lutu mai vuravura ina kona vava, e la'o sobu no mai lomalagi qa vadodonu no mai vei au. ⁶ Ni'u saga me'u vadi'evia, au qai une ni dra tu ina a manumanu yavai va tauco'o ni vuravura, a manumanu ila, a manumanu sa dau qasi voli ei na manumanu vua tauco'o ga. ⁷ Au ma qai rogo e dua domo ni  ma aya mai vei au, ''Tucae, Pita mo vamate, qo ania!" ⁸ Au sa qai aya, "U'a a oqu Turaga, ni sa maqa a'a tabu se maqa ni savasava sa lutu mai ina oqu gusu ina dua siga. ⁹ Qa sa rogo leqa vei au a vosa mai lomalagi, "A'a sa vasavasavata'inia a Alou, me ua ni tautauvata e'ina a tabu. ¹⁰ Sa ca'a vatolu a'a ai,sa qai di tauco'o leqa i lomalagi. ¹¹ Qo gavia, e lewe tolu a tamata sa qai lao ina vale au ma notu ina, edru ma talai mai Sisaria vei au. ¹² E sa aya vei au a Yalo tabu, meu lao vata ei edru, me ua ni veiba a lomaqu.Qa eitou sa lao vata leqa ga ei edru a veiwe'ani  e lewe ono, qa eitou curu ina ona vale a tamata ana. ¹³ Qa sa aya ve eitou o oya, ni ma igavia a agilosi ina ona vale, qa aya vei eya, "Lai Jopa, me la'ovi Samoni, a ona yaca leqa ga o Pita. ¹⁴ O oya ena aya vei i'o a vosa ona bula ina, ei odra tauco'o a omu lewe ni vale". ¹⁵ Io niu sa teivu meu vosa, sa yaco vei edra a Yalo Tabu, me tauvata ei eda a ena ivate'ivu. ¹⁶ Au sa qai nanumia a vosa ni Turaga, ni sa aya "O oya sa dina qa veipapitasota'i o Joni ina wai, io dou na papitaisota'i ena Yalo tabu". ¹⁷ Io ni sa qai solia vei edra a Alou ai solisoli me tauvata ei eda sa vabauta a Turaga o Jisu Karisito, o cei o au, meu tarovia rawa a alou?" ¹⁸ Io nidru sa rogoca ai, edra sa varorogo. Edra sa varo'oro'otainia a Alou qa aya, "Sa dina sa qai solia a Alou vei odra leqa ga a veimatanitu tani a veivutuni medra bula. ¹⁹ Io o odra sa veila'oya'i e na veivacacani sa tubu ena vu'u i Sitiveni, edra sa lao ga i Finaisi ei Kipiro, ei Anitioki, edra qai aya a vosa vei edra tauco'o a Jiu. ²⁰ Eso vei odra edra ai Kipiro ei Kirini, ni dra sa yaco i Anitioki, edra sa vosa vei odra edra sa vulagi mai na veimatanitu tani, edra sa vunauta'inia a Turaga o Jisu. ²¹ E sa notu vata ei edra a liga ni Turaga, edra sa lelevu ina a vabauta, edra sa sauma'i mai vei eya a Turaga. ²² Sa qai yaco a edra itu'utu'u ve edra soqosoqo lewe ni lotu mai Jerusalemi, qa dra sa talai Panapasa, me lao sara i Anitioki. ²³ Io ni sa lao o oya qa igavia a ca'aca'a loloma ni Alou, sa marau ina, qa sa vunaici edra tauco'o, medra abitia a Turaga ina loma e gumatua. ²⁴ Ni sa tamata re o oya, esa sinai ena Yalo tabu ei na vabauta, qa sa lewe levu ina a tamata sa vaiurita'i vei eya a Turaga. ²⁵ Sa qai lao o Panapasa i Tarisu me vaqarai Saula. ²⁶ Io ni sa igavia, sa dia i Anitioki. Qa sa dua yabai tauco'o edru dau soqoni vata ina ei edra soqosoqo lewe ni lotu, qa dra lelevu edru sa vavulica. Ia mai Anitioki edra sa vatoai i mada o odra me toani i Karisito. ²⁷ Io ena gauna odra sa lao mai ina eso a parofita mai Jerusalemi i Anitioki. ²⁸ Qa sa tuca'e e dua vei edra, a ona yaca o Akapo qa aya, e ma vavuna a Yalo tabu, ni na yaco mai muri a dausiga levu ena vanua tauco'o.A'a ari sa yaco ina gauna sa tu ina o Kilotiu. ²⁹ Io edra sa lewa o odra sa lotu medra solia yadua a odra ani loloma, me tauvata ga a'a dra sa dui rawatia, vei edra a veiweani edra sa notou mai Jutia. ³⁰ E dra sa vele'e leqa ga ve'ana, qa vatalai Panapasa ei Saula medru dia vei edra a qase.