¹ E dua a tamata mai Sisaria o Kolonia a ona yaca, a odra turaga a mata sotia sa vayacani va Itali. ² A tamata dau lotu o oya,qa dau rereva'inia a Alou ei odra tau co'o a ona lewe ni vale, sa dau solia valevu a ani loloma vei odra a tamata, qa dau masu no vei eya a Alou ena veisiga. ³ Sa igavia o oya ina raivotu, ena aciwa ni yaua, edua a agilosi ni Alou ni sa curu vei oya, qa sa aya vei oya, "i Konilio". ⁴ Ia ni sa vaigavia sa rerevainia, qa aya, sa "enaivei a oqu turaga?" Sa qai aya vei oya, a omu masu eina omu ani loloma sa lao cae ina mata ni Alou mo nanumi ina. ⁵ Ia mo tala eso a tamata i Jopa, me laovi Saimoni, a ona yaca leqa ga o Pita. ⁶ Sa notu vata o oya ei Saimoni  a imatai ni uli ni manumanu, sa tu imatasawa a ona vale; qa na aya vei i'o o oya a'a dodonu mo vele'e. ⁷ Ia ni sa lao tani a agilosi qai vosa vei Konilio, sa qai aciva e lewe rua a ona lewe ni vale, qa dua a sotia sa dau lotu, qa dua vei'odra sa dau qaravi oya. ⁸ Ia ni sa aya vei odru a'a tauco'o, sa talai odru sara i Jopa. ⁹ Ia ena roaroa, ni dru sa lai tu ina gaunisala, qa sa volea inaoro, sa cabe ca'e idelani vale o Pita me masu ena i'a ono ni yauwa. ¹⁰ Qa sa mata ana sara, qa domonia a'a e ania, ia ni dra sa varau no, sa igavia a rai votu, ¹¹ sa igavia lomalagi ni sa tawase rua tu, qa sa dua a'a sa lao sobu mai vei oya, sa tautauvata a tilovi levu e bu'i tu a ena yasa va'va qa sa uti sobu mai ivuravura. ¹² Qa sa notu ina a manumanu yavai va ni vanua na ena veimataqali tauco'o, vata manumanu ila, eina veia sa dau qasi voli vata ei odra manumanu vu'a. ¹³ Sa qai rogo mai vei oya a vosa: "Tucae,Pita, mo vamatea qo ania". ¹⁴ Qa sa aya o Pita,"Meu ua a oqu turaga, niu a maqa ni ania a'a sa tabu qa tawa savasava". ¹⁵ Qa sa lao varua leqa vei oya a vosa, "a'a sa vasavasava tainia a Alou, me ua ni  tautavata a'a e tabu". ¹⁶ Qa sa ca'a vatolu a'a ai; sa qai di cae leqa i lomagi. ¹⁷ Ia ni sa taqaya no a lomai Pita, se cava ai balebale ni ona iga, sa tarogia a vale i Saimoni o odru a tamata ma tala o Konilio, qa dru sa tu ina matamata ni oro. ¹⁸ Qa dru sa aci, qa tarogia, se sa notu eri o Samoni qa ona yaca leqa ga o Pita, se maqa. ¹⁹ Ia ni sa va'asamatainia no a ona tadra o Pita, sa aya vei oya a yalotabu, "Gavia, e dru lewe tolu a tamata dru vaqarai io no. ²⁰ Mo tuca'e qo lao sobu, io' mo lao vata ei edru, io me ua ni veiba a mu yalo,baleta niu sa talai edru waqe". ²¹ Sa qai lao sobu o Pita vei odru a tamata, qa aya; "Gavia, oyau ga ai dou sa vaigavia no, a cava a vuni mudou lao mai?" ²² Qa dru sa aya, sa dua agilosi yalo savasava sa varaita'inia vei Konilio, e dua turaga ni valu,a tamata yalo dodonu, qa rereva'inia Alou, qa sa rogorogo re vei edra ai Jiutia tauco'o, me laovi io, mo mai lao ina ona vale, qa me rogoca vei io a vosa o oya. ²³ Sa qai acivi edru mai o oya, qa vacequi edru. lo ena roaroa sa lao vata ei edru o Pita, qa sa lao vata ei so a weadru mai Jopa. ²⁴ Ia ena bogi rua dru sa curu i Sisaria.S warai edru o Konilio, qa sa sa vasoqoni edra oti a ai ona vata ei odraa we'ana dina. ²⁵ Ia ni sa curu o Pita, sa warai oya o Konilio, qa sa cuva sobu i na ona la, qa varo'oro'o vei oya. ²⁶ Qa sa vatuca'etai oya o Pita, qa aya, "Tuca'e, au sa bau tamata leqa ga o'au". ²⁷ Qa dru sa veivosai, qa dru sa qai curu i loma, qa sa igavi edra lewe levu ni dra sa soqoni vata mai. ²⁸ Sa aya ve edra o oya, "Dou sa ila ni a tabu vei oya a ai Jutia me notu vata, se me veiqati aya a tamata sa matanitu tani" Qa sa varaita'inia vei au a Alou meu ua ni aya vei dua ni tabu se maqa ni savasava. ²⁹ O oya ga ai au ma lao  mai ina qa maqa ni veileti, niu sa laovi waqe, qau taroga ina se cava dou laovi au waqe ina. ³⁰ Qa sa aya o Konilio, "Sa qai oti ga e va bogi au ma lolo qa yacovia mai ina a  yaua a'i; ena i'a ciwa ni yaua au ma masu no ina oqu vale, qa gavia, ni dua tamata e tu noqu mata e vaisulu lumilumisa. ³¹ Sa aya, 'I konilio, sa rogo a omu masu, qasa vananumi ina a omu ani loloma e na mata ni Alou. ³² O oya ai mo qai talai i Jopa, qo laovi Saimoni mai, a yacana leqa ga o Pita, sa notu no o oya ina vale wei Saimoni ai matai ni uli-ni-manumanu mai matasawa, ni sa lao mai o oya, ena vosa vei io". ³³ O oya ga ai au sa talai sara ina vei io. lo o sa tamata re nio sa lao mai. Eimami sa qai notu tauco'o ina mata ni Alou me eimami vorogoca a'a tauco'o ena aya vei emami a Alou. ³⁴ Sa qai vosa o Pita, qa aya, "E dina au sa qai ila ni sa maqa ni digita'i odra vailoa a tamata ni Alou. ³⁵ Io ena veivanua tauco'o e are vei oya, odra e rerevai oya, qa valavala re". ³⁶ Ai vavuvuli sa aya o oya vei odra a luvei Isireli, qa sa vunautai na veilomani ena vu'u i Jisu Karisito, o oya ga a turaga vei odra tauco'o. ³⁷ Ai vavuvuli ana dou sa ila, ma vunauta'i mai Jutia tauco'o, ma sa tei'vuta'i mai Kalili, ni sa oti a papitaiso ma vunau ta'a o Joni. ³⁸ Ni sa lumuti Jisu a a'i Nasareci a Alou ena Yalo Tabu ei na kaukauwa. O oya e lao voli qa dau ca'ava a are, qa sa vabulai odra tauco'o ma vararawatai odra a tevoro, ni sa notu vata ei na Alou. ³⁹ Io eitou sa yaco me eitou lai wasea a'a tauco'o e vele'e o oya ina odra vanua a a'i Jutia, mai Jerusalemi leqa ga. O oya edra sa vamatea nidra sa vataqaria ina dua acu. ⁴⁰ Sa vatuca'eta'i oya a Alou ena i'a tolu ni siga, sa qai varaita'i oya ca'e, ⁴¹ e maqa vei odra tamata tauco'o ga, vei edra ga e digita'inia i mada a Alou, me dra dau aya vei eitou. Io eitou ma ana qa somi leqa ga ni sa tuca'e mai na mate o oya. ⁴² Io sa varota vei eitou me eitou vunau vei odra tamata, qa ivadinadina nio oya ga ma lesia matai a Alou me lewai odra a bula ei odra mate. ⁴³ O oya edra sa dau aya tauco'o ga profita, ena bo'oci ina vu'u ni yacana a odra ivalavala ca, a tamata tauco'o ga edra sa vabauti oya. ⁴⁴ Ni sa aya a ona vosa ai o Pita, sa lutu a Yalo Tabu vei odra tauco'o e rogoca a vosa. ⁴⁵ Io o odru sa vabautia, sa lao vata mai ei Pita, edru sa urabui, ni sa tasove a Yalo Tabu ivei edra leqa ga edra sa matanitu tani. ⁴⁶ Ni dru sa rogoci edra ni dra vosata'inia a vosa ni veivanua tani, qa va ro'oro'o tainia a Alou. saqai aya o Pita, ⁴⁷ "Sa dua be'a tamata e rita ni solia a wai, me ua ni papitaisotaisota'i edra a tamata ai, edra sa rawatia a Yalotabu me tautauvata ei eda?" ⁴⁸ Sa qai varoti edra medra papitaisota'i e na yaca i Jisu Karisito. Edra sa qai vamasuti eya me notu leqa ei edra i na vica leqa siga.