¹ Ia o Saula sa aya no a vosa vacivocivo ei na ona saga no me va awabo'otai vadua o odra sa lotu vei oya Turaga, a sa lao vei oya a bete levu, ² Sa tarogia vei oya ai vola, ina valenisoro mai Tamasiko, eva'a e une eso edra vabautia a Sala (Lotu Vakarisito), se tagane se yalewa me vesuia qa di mai i Jerusalemi. ³ Ena ona lao no, sa volea sara me yaco waqe i Tamasiko ,vasauri sa cila vavolivoliti oya e dua a rarama qa lao vakadodonu mai lomalagi. ⁴ A sa bale sobu ina o oya ina somo, e dua a domo sa qai rogo o oya ni vosa mai vei oya qa aya , "I Saula, I Saula, a cava o sa vacacani au ina?" ⁵ Sa aya o oya, "O cei oi omiau Turaga?" sa aya a Turaga, oi au o Jisu o oya o sa vacacania. ⁶   E saumia mai vei oya a Turaga, "Mo tucae qo lao ina oro levu, ena qai aitai mai vei io a a mo vele'e." ⁷ O odra a tamata edra lao vata no ei oya, edra sa maqa ni cavutia rawa e dua a vosa, edra rogo no a domo, ia na tamata ga edra sa maqa ni une. ⁸ Sa qai tucae mai na somo o Saula, na gauna me dolavia ina a ona mata sa maqa ni qai dua a a me igavia rawa. Ia edra sa tauria ga a ona liga qa di oya i Tamasiko. ⁹ E siga tolu ona maqa ni une rawa e dua  a, e maqa leqa ga ni bau ana se somia e dua na bilo wai. ¹⁰ E dua a tamata e tisaipeli dina, sa notu mai Tamasiko a yacana o Ananaiasa, sa vosa vei oya a Turaga ena raivotu, qa aya, "I Ananaiasa," sa qai saumia waqe o oya, "Oi au ai Turaga." ¹¹ Sa aya vei oya a turaga, mo tucae qa lao ina gaunisala sa vatoai o dodonu, qa la'i igavia ene vale i Jiutasa e dua na tamata o Saula a ai Tarisu e masumasu no ina. ¹² "Ena ona raivotu sa igavia oti ina o oya e dua a tamata a yacana o Ananaiasa, sa lao mai vei oya sa qai tabai oya ona liga, sa yaco ina me iga  ona mata" ¹³ Sa aya o Ananaiasa, Turaga sa levu a tamata edra aya vei au a tamata ari, ena ona dauvararawatai edra no a tamata lotu mai Jerusalemi. ¹⁴ "Sa solia leqa ga vei oya a dodonu o oya a bete levu, me vele'e ga a e mata vele'e vei edra sa lotu no vei emiau ena vanua ai." ¹⁵ Ia sa aya vei oya Turaga, mo laovi oya, ni sai oya a tamata au sa digitainia, me na dia a oqu yaca ina veimatanitu tani, ivei edra a tui, tauvata leqa ina vei edra a mataqali i Isireli. ¹⁶ "Au na qai vataila vei oya a levu ni a rarawa ena lao curuma ena vu'u ni oqu yaca." ¹⁷ Qa sa lao o Ananaiasa, qa curu i vale, qa sa tabaia na ona liga, qa aya, a weaqu Saula, a Turaga o Jisu, oya sa lao mai veio na gaunisala qo ma lao mai ina, qa sa talai au mai, mo iga rawa, qa mo vasinaiti na yalo tabu. ¹⁸ Qa sa lutu vasauri mai na ona mata edua a me tautauvata a vari ni i'a:qa sa iga rawa sara oya ;qa sa tucae qa papitaiso tai. ¹⁹ Ia ni sa ana oti sa qai kaukauwa sa tucae.Sa qai notu vata edra a tisaipeli na vica vata a siga. ²⁰ Sa maqa ni wawa leqa o Saula ena ona vunautai Karisito ena vei vale ni lotu, ni sai oya a Luve ni Alou. ²¹ O odra rogoci oya sa dua a a odra urabui, dra aya, "E maqa ga ni o oya ai a dau vatotogani odra, na dau masuta no a yaca e vunautai no ai mai Jerusalemi, ai na'i vata no ga oya e lao mai ina ei ena ona veivadonui a bete levu me mai vesu eso?" ²² Ia sa toso ca'e no ga a kaukauwa ni ona i vunau ei na ona vayavalati odra a Jiu edra notu mai Tamasiko, ena ona aya vei edra ni sa Karisito o Jisu. ²³ Ni sa oti e vica a siga edra sa buia lo a Jiu medra sa vamatei oya. ²⁴ Ia a bu'i vere ai sa ila o Saula. Edra sa dauyadravia a veimatamata ni oro ena siga ei na bogi, medra vamatei oya. ²⁵ O odra a tisaipeli edra sa qai di oya na bogi qa la'i valutulututai oya sobu ina taudau ni bai ena dua a ato levu. ²⁶ Ni sa lao mai me mai notu i Jerusalemi o Saula, sa vatovole sara o oya me la'i maliwai odra a tisaipeli; ia edra sa rerevai oya tauco'o ga, ni dra maqa ni vabautia ni sa dua leqa ga a tisaipeli o oya. ²⁷ Ia o Panapasa sa qai maroroi oya qa di vei odra ai apositolo, qa vamacalatai vei edra a ona igaiga vei oya a Turaga ina salevu, ei na veia sa aya baleti oya, tauvata leqa ga ina ona vunautai vadoudou a yaca I Jisu mai Tamasiko. ²⁸ Edra sa qai la'i notu vata i Jerusalemi, ena veivanua edra lakovia e lao vata ei edra o oya. ²⁹ E vunautai vadoudou a yaca ni Turaga o Jisu, e vosatai odra a veileti vata ei odra a Jiu edra vosatainia a vosa Vakiriki, ia edra sa buia leqa ga a vere mesa vamatei o oya. ³⁰ Ni ra sa rogo ai soqosoqo lotu nai nai ca ai, edra sa qai di oya sobu i Sisaria me sa vasuai lesu leqa i Tarisu. ³¹ Edra sa qai notusautu qa vatatatai cae, ai soqosoqo lotu tauco'o mai Jutia, Kaleli ei Samaria. Edra segata medra rerevainia a Turaga ena odra bula ena veivakaukauwatai ni Yalo Tabu, sa qai vaiuritai no mai ina o odra sa lotu. ³² Sa dau veilaoyai o Pita ena veiyasana me dau veisio vei edra sa lotu, e  la'i siovi odra leqaga sa lotu no mai Lida. ³³ Qa sa une ina e dua Tamata o Inia ona yaca, sa oto tu ga i na mocemoce qa yabai walu, ni sa tauvi oya mate sautaninini, ³⁴ Qa sa aya vei oya o Pita, Inia, sa vabulai io o Jisu Karisito :tu cae, qa vivigia a omu i mocemoce, qa sa tu cae sara oya. ³⁵ Qa dra sa une tauco'o edra sa tu mai Lita ei Sarona, ia edra sa saumai mai vei oya Turaga. ³⁶ Qa sa tu mai Jopa edua sa lotu Tapaica a ona yaca, a enai balebale Tokasa :sa dau oga sara lewa ai ena ca'aca'a re, ei na ca'aca'a loloma sa dau vele'e no ³⁷ Sa yaco a gauna ana, sa tauvi mate o ya :qa sa ciba :ia ni dra sa vasilimia oti, edra sa vaotoria i na dua ai taba lomani vale i cae. ³⁸ Ia ni sa voleati Jopa ei Lita, qa dra sa rogo odra sa lotu ni sa notu i na o Pita, qa dra sa tala e lewe rua vei oya, me vamasuti oya me vatotolo sara mai vei edra. ³⁹ Sa qai ia o Pita qa lao vata ei edru, ia ni sa tadu oya, edra sa di oya i na taba loma ni vale i cae:qa sa tu volea vei oya odra Yada tauco'o ga, qa dra sa tagi, qa vata'ila ai curucuru e so, ei na sulu e so ma cula o Tokasa, ni se bula vata ei edra. ⁴⁰ Qa sa va talai edra tauco'o o Pita, qa sa teiduru, qa masu ;qa sa vui i na yago, qa aya, "Tapaica, tu cae. qa sa cevatia ona mata :ia ni sa unei Pita, sa qai tu cae oya. ⁴¹ Qa sa dodoia ona liga, qa tuberi oya cae ;ia ni sa tarogi edra tamata lotu ei edra yada, sa varaitai ni oya  ni sa bula. ⁴² A ai sa ilai mai Jopa tauco'o ;qa dra lewe levu sa vabautia a Turaga. ⁴³ Qa dra notu bogi vuqa oya mai Jopa ei Saimoni a mata ni uli ni manumanu.