¹ Naomi kokughamba kwangumwenyendi eshi, mwanange ghombuyama, mbadi naroghera kukushanena dyango ghuturumuthe mo ndi nopodiyo eshi yoyihe yikare thiwana kukoye ndi? ² Boazi oyu ghakuta hambuyama waya ghuruwana nagho ne, mbadi mukadiko dyetu ndi? Mone, aye ne ghana kuyerutha mavumbukiro pathindanda thendi ghuthiku ghodyarero. ³ Yodiyo, yoghane noshupate thiwana noyende kuthindanda ene mbadi ghuka kudimukithe ghothinda koyo katughuru, kate ghaka mane kudya nokunwa. ⁴ Opa shogha karare ne kakwate dighano eshi mupi ghana kurara podiyo munyima ghumuyendere nokashupura makuha ghendi ghokarare nowe momo. Kukona ghaka kutongwere eshi yinu munye shokatende. ⁵ Ruthi ne ghahuthire kwaNaomi eshi; nakaruwana yoyihe ghuna ghamba. ⁶ Kemo ghayendire kuthindanda nogha kuthire marawero ghangumwenyendi agha ghamupire. ⁷ Opa Boazi ghamanine kudya nokunwa, mutjima wendi ne washambererire nogha yendire ghakarare kumbadi dhothirambo thoghuheke ghomavumbukiro. Ruthi gheyire kawana-wana nogha shuture makuha ghaBoazi naye kokurara. ⁸ Hakumine pakatji koghuthiku katatughuru ne ghatetukire nogha pirukire omu ghamonine eshi mbuyama ghanarara kumaghuru ghendi! ⁹ Ghepurire, Yowe dye? Ghahuthire eshi yame Ruthi, mupikoye ghombuyama. Ture mupikoye mumoko ghoye yoyishi yowe keho ghomukadiko dyange. ¹⁰ Boazi ne ghaghambire eshi; Mwanange ghombuyama Fumu Nyambi ngogha kufiyere. Ghuna ruwana thinu thoghunongo kupiterera pamutango, yoyishi mbadi ghuna kuthu hangaghu ghana yikare eshi muhepwe endi mutungi. ¹¹ Pano mwanange ghombuyama, wayapa! Mbona ruwana yoyiheya eyi ghuna ghamba; yoyishi wahe hatungi homumbara dhange ne hana dimuka eshi owe ne ghombuyama mwene. ¹² Mughushemwa, ame ne nomwapoye ene poghadi mwapoye popepi-pepi kupiterera me. ¹³ Rare momuno ghuthiku ghu no pamathiku-thiku ngeshi gharuwane thiruwana thamukadiko ne ngo ghuwa ghatende kemo. Ene ngeshi mbadi shogha yiruwane, kukona niyiruwane kenge yikara eshi Fumu Nyambi ne shime muyumi. Rare kate mathiku-thiku. ¹⁴ Ruthi ne ghararire kumaghuru ghaBoazi kate mathiku-thiku. Ene ghapindukire makwathiku ghomurughura oku shime mbadi wakukona kunongonona thishwi thamunu yoyishi Boazi ne ghamutongwerire eshi ngo mbadi hayidimuke hanu eshi oyu mbuyama ne ghaneya kuthindanda. ¹⁵ Ndani Boazi ne kokuninga eshi rete mwaye ghoye noteye. Opa ghatendire kemo, Boazi ne kokumeta makopi kwoko-fotji ghomavumbukire nogha tera mumwaye nogha mutengenekire. Boazi ne kokayenda mumbara. ¹⁶ Opa ghana kumine Ruthi kwangumwenyendi ne ghamwipure eshi; Ngepi edi ghuna karuwana mwanange ghombuyama? ¹⁷ Ruthi ne ghapitiremo yoyihe eyi ghana kamuruwanena katughuru ya nogha twikere kughamba eshi agha mafendera kwoko-fotji gha ne ghodiyo ghana kanipa eshi mbadi naroghera kuhuka nyara-nyara kwangumwenyange. ¹⁸ Naomi ne kokuninga Ruthi eshi, kare momu kate wakudimuke eshi ngepi yina kuyenda yoyishi katughuru ya ne mbadi shogha turumuthe kate ghakumithemo yinu yi dyarero.