¹ Boazi ne ghayendire kudikorogho nogha kahungumanine. Kapupi kamanana mwapendi ne gheyire nogha muningire ghahungumane, katughuru yu ne naye ghahungumanine ndani ² Boazi ghethire hatutughuru hohakuru mumbara nogha waningire nagho hahungumane; nagho hahungumanine. ³ Boazi ne kokughamba kwamuyendhendi kughunyonga wendi eshi; Naomi oyu ngakahuka katunda kuMoabi ne kuna kughuritha dyango dyaElimelek ghomukurwange nakupwa. ⁴ Naghayara kukuthonyena podiyo eshi ghudighure paghutho dhawakuru wange. Ngeshi ghuna himi kudiyovora, dishimbe ene ngeshi mbadi humi kudiwana ne, nitongwere podiyo eshi nidimuke eshi noyofotji temba kushwayitha ko we no noye nidi. Nakatughuru ne ghaghambire eshi nakudishimba. ⁵ Boazi ne kokughamba eshi; Mudiyuwa edi wakughura dipya di kushwagha munyara dhaNaomi ne wakona kushimba naRuthi mbuyama gho muMoabite, aye ne mudidhi, mukupindutha dina dyamukakupwa noghupingwa. ⁶ Muyendhendi ne ghahuthire; Mbadi nakuyishimba kupira kwipitha ghupingwa wange. Shimbe keho ghupingwa wange ghukare ghoye, yoyishi mbadi shoni kone kuyiyovora. ⁷ Ethi ne thothitjo pathihuru huru muIsreali kuhatera ghupingwa nomatjindjithero ghoyiwana. Mukwipura kehe yino, munu ghana kuhurura makuha nokugha tapa kwamuka maparaghumbo ghendi no ethi ne thitjo mukuturithapo makuyuvero ghopa thina muragho. ⁸ Yodiyo, muyendha Boazi ne ghaghambire eshi; yighure ghothinda nogha shuture makuha ghendi. ⁹ Boazi ne kokughamba kwawakuru nombunga dhawanu eshi; Amwe ne mwashupi pasha dyarero eshi naghuru yoyiheya eyi yakarire yaElimelek noyoyiheya yaKilion naMahlon kutunda munyara dhaNaomi. ¹⁰ No karo Ruthi mbuyama gho muMoabite diyekango dyaMahlon, nakumushimba ghakare mbuyama wange, podiyo eshi nipinduthe dina dyamukakupwa noghupingwa nokaro eshi maghana dyakudhongono kerera mwawamina nodikorogho dyodyango dyendi. Dyarero ne mwashupi! ¹¹ Hanu waheya awa hakarire padikorogho nawa kuru, haghambire eshi; Yaghushemwa twashupi. Fumu Nyambi ngo tende mbuyama oyu ghaneya mundhugho dhoye ghakare yira Rachel naLeah, hawadi awa hatendire ndhugho dhaIsreali; ngo yikutomboke mu Ephrathah nokuyuka muBethlehem. ¹² Ndhugho dhoye ngodhi kare yira dhaPerezi, oyu Tamar ghatendiire kwaJudah kupitera mohekuru eshi Nyambi ghombo ghakupa noyu mbuyama ghana. ¹³ Boazi ne ghashimbire Ruthi noogha karire mbuyama wendi. Hakarire pofotji noNyambi ghawa fiyere mukuwana mwana ghokatughuru. ¹⁴ Hambuyama haghambire kwaNaomi, Fumwa kwaFumu Nyambi, Oyu ghakarire noye mukupira mukadiko ene koyu mbutu ne dina dyendi ngodiyuke muEsreali ghomuhe. ¹⁵ Ngogha kare muhangedheri ghomoyo nomatowaritho ghoghukurupe ghoye, yoyishi ngumwenyoye, oyu ghakuhaka ne gharikanya kupiterera hana hotutughuru kwoko-wadi, nga muwana. ¹⁶ Naomi ghashimbire mwanuke nogha muturire mudiva dyandi nokumu pakera thinga. ¹⁷ Hambuyama haka maparaghumbo ne hamutire dina ghuninga eshi; Mwana ghokatughuru ngawana Naomi. Hamutire eshi Obed, oyu ghaka karire wiha Jesse ghowiha David. ¹⁸ Awa ne hana hoka waPerezi, Perezi ne wiha Hezron, ¹⁹ Hezron ne wiha Ram, Ram ne wiha Amminadab. ²⁰ Amminadab ne wiha Nahshon, Nahshon ne wiha ²¹ Salmon oyu ghana karire wiha Boazi, Boazi ne wiha Obed, ²² Obed ne wiha ne wiha Jesse naJesse ne ghana karire wiha David.