¹ Naomi ghakrire namwapa didhiko dyendi, katughuru ghomushwi mudiko dya Elimeliki nodina dyendi ne Boazi. ² Ruthi ghomuka Moabite ghaghambire kwaNaomi; tango niyende nika gugure eyi yathiyara mudipya. Mbona kuthu keheyu mboghani hafera . Naomi ghahuthire eshi, yende mwanange ghombuyama. ³ Ruthi ne ghayendire ghaka gugure eyi yathiyarire mudipya munyima dhokukesha. Yahokokire eshi ghakakumine kudipya dyaBoazi ghomu kadiko dyaElimelek. ⁴ Mumone, Boazi ne muBethlehemu ghakatundire nogha ghambaire eshi; Fumu Nyambi ghakare nenu. Hamu huthire eshi; Fumu Nyambi ngogha kufiyere. ⁵ Ndani Boazi ne ghoghepure eshi yidye mupiterithi wenu mwakeshi? Mushengeteya wadye yu? ⁶ Mupikendi oyu ghakarire eshi mupiterithi wawakeshi, ghahuthire eshi; oyu ne mushengeteya omu Moabite oyu ngakeya na Naomi kutunda kuMoabi. ⁷ Ghana nikumbera eshi ghagugure munyima dhawa keshi eyi yina waghura kwawa keshi, ghaneya momuno kutunda mathiku-thiku kate popano ngambi kemo eshi ghana turumutha kapupi kamanana mundhugho. ⁸ Podiyo Boazi ghatongwere Ruthi eshi; Yoyi ghutegherera kukwange we mwanange ghombuyama ndi? Perere poye eshi ghushwaghe mudipya dyange eshi ghuyende mwawa mweya. Nanene kare momu noruwane nawa pikangeke hoha mbuyama. ⁹ Toperere meho ghoye momu hana kukesha hatutughuru nokuthe hambuyama hamweya. Mbadi narawera hangaghu ghana eshi mbadi ghakundame yirama yoye ndi? Ngeshi dikuwane dinota ne yende mukandimbe komeyu nokanwe meyu agha hana veti hangaghu. ¹⁰ Ruthi ne ghakuvamine paghutho waBoazi nogha ghambire; Pashanye ghuna kunongopera nothinga kukwange me nomutunda kure? ¹¹ Boazi ne ghahuthire eshi, hana nikura mbudhi koyoyiheya eyi waruwana kutunda apa ghakuthiya didhiko dyoye. Wathiya wiho nanyoko, endi wathiya ditunga dyokakoghatji koye nowakutha ngumwenyoye mukeya kohanu awa wapira kudimuka. ¹² Fumu Nyambi ngogha kufiyere kuyiruwana yoye. Ngo ghuwane ndjambi dhokuyara kwaFumu ghoNyambi waIsreali omu ghuna wana mondo mwene. ¹³ Ndani Ruthi ne kokughamba eshi, ngoni wane ghuwa mumoye, muhona wange yoyishi ghuna nihengaghura noghuna nongopa kukwange ngambi kemo eshi mbadi nomukadidhiko dyawapikoye. ¹⁴ Pamaruvedhe ghamweya, Boazi ghethire Ruthi nogha dye yidya nokunwa vinyu. Ghahungumanine pambadi dhawa keshi nogha mupire ghuroto nogha dire kate ghekutire nokuthiya po. ¹⁵ Apa ghemanine ghatnge kugugura, Boazi ne gharawere hatutughuru ghana eshi hamuthiye ghagugure nomuyidi yohasha, perere pagho eshi hamushwahure. ¹⁶ Nokaro hamu tetere mutwi dhomagovo mwene ogha hana tura mumashaka noha ghamuthiyere ghagugure nombadi hamupatere. ¹⁷ Aye ne ghagugure mudipya di kate runguro. Ndani ghapurire magavo ghoyi ghagugure nokukutha thimetitho ne yira mafendera makumi mawdi nomahatu. ¹⁸ Ghadhamunine nogha yendire mumbara. Ngumwenyendi ne ghaka monine eyi ghana gugure. Ruthi karo ne ghashwayithire ghuroto ghokuyotha oghu wakathiyarire ko nogha ghutapire kwangumwenyendi. ¹⁹ Ngumwenyendi ne ghaghambire kukwendi eshi; Kupi ghuna kashekwerera dyarero nokupi ghuna karuwana? Katughuru yu ghana kakara nothinga kukoye ngo gha pwe kufiyera. Ruthi ne kokutanga ghamutongwere yokuhatera kwakatughuru oyu ghakara nodipya oku ghana karuwana. Dina dyendi ne Boazi. ²⁰ Ngumwenya munu ne kokughamba eshi; Nyambi ghoFumu ngogha mufiyere oyu ghana piri kushwayitha ghuhunga wendi kwawafu nawa yumi nokatughuru yo ne ghumweya ghopawa kadiko dyetu nomukomononi. ²¹ Ruthi ghoka Moabite ne kokughamba eshi; Yaghushemwa ghana nitongwera eshi nikare pepi noha ngaghu ghana wendi kate hakumane kukesha. ²² Naomi kokughamba kwangumwenyendi eshi thiwana kengeyo eshi ghuyende noha ruwani wendi hohambuyama podiyo eshi maghana shoha kutjitjupithe mudipya dimweya. ²³ Aye ne ghakarire pepi nawa ruwani waBoazi podiyo eshi ghagugure magavo gho mavumbukiro noghaye ne ghatungire nangumwenyendi.