¹ Ene mumayuwa ghoghuhura mboyina hokoka eshi dirundu dyondhugho dhaFumu Nyambi ne mbodina pu kutendurura yira Fumu ghomarundu ghamweya. Mboghana pu kukugha kumarundu ghamweya nawanu ne mbohana poposha yira rware kutamba kudirundu di. ² Matunga ghomengi mboghana yendi nokughamba eshi tuyende kudirundu dyaFumu Nyambi, kundhugho dhaNyambi waJacob. Mboghana tuhongo mandhira ghendi nombotuna yendi mumandhira gha. Kutunderera kuZion kate kuJerusalemu, muragho dhaNyambi mbohana dhikuthu. ³ Mboghana theki hanu hohengi nomboghana tokora kuhatera matunga ghomengi agha ghadi kokayenda. Mbohana pumura yimende yagho kushungu-shungu nokudhura ghutwe ghomaghonga ghagho. Matunga mbadi mbogha kurwitha endi hakudeghure nothitambo thoyita. ⁴ Nane ne, mbohana hungumana keheyu pavinyu wendi muthitondo thoghukuyu. Noyofotji temba oyu mbogha wayapitha, yoyishi diywi dyaFumu Nyambi ne dina ghamba. ⁵ Hanu ne kehe yu kuna kukutha hanyambi wagho ene muruvedhe ro ne hanu waheya mbohana karera Fumu Nyambi kuroruheya nororuheya. ⁶ Mudiyuwa dyo no agha ne medhero ghaFumu Nyambi, mboghana ghongawedha harema waheya nowa hayevura nowa nanyandekire. ⁷ Mbona pirura harema nombohana kara hanu wangenowa hatjidha mumatunga ghongcamu; Ame Fumu Nyambi mbona wa raghura padirundu dyaZion kate kuroruheya. ⁸ Kukwenu mwe mwatunonga twange, dirundu dyamwana Zioni ghombuyama, kukwenu mwe ne ghuraghuri oghu wakarirepo ne mbona ghumuhuthera, yoyishi amwe ne mwahatera kughufumu ghohana Jerusalemu hombuyama. ⁹ Pano keho, pashanye ghuna kugherera nokakugho kokakuru? Mbadi mudi nafumu ndi? Hahengaghuri wenu ne hapira po ndi? Eyi ne yomuna kudirera yira mbuyama oyu ghana yu ghadi muyiruwana ndi? ¹⁰ Mudi mutjitju yira mbuyama oyu ghana kuyovoroka, amwe mwahana hombuyama waZioni, yira mbuyama muyiruwana. Mbomuna yendi panunda dhombara nokatunga mumapya nokayenda kuBabylon. Mbohana pu kukomonona. ndani Fumu Nyambi ne mboghana washwayitha munyara dhawa nyathi wagho. ¹¹ Pano keho ne matunga ghomengi ghana kughongawedha kumurwitha; awo ne kuna kughamba eshi ngogha pwe kwipitha; meho ghetu ngogha mone thineghidhidho thaZion. ¹² Mbadi hadimuka yighayara yaFumu Nyambi, endi hatjwathane marongekero ghendi, Aye ghana kuwa ghongawedha yira muputero ghomahangu agha hana kutwara kuthindanda. ¹³ Wimane noyeruthe we mwana Zioni ghombuyama, mbona tendi manyiha ghoye yira yikuvo nombona tendi dihamba dyoye yira thikuvo. Mboghuna hoghorora hanu hohongi nokuthotera ghuyi wagho podiyo eshi ghuwa rete kwaFumu Nyambi noghushwi wagho ne kwaNyambi muvareki ghokaye.