¹ Pano keho ne mwiye pofotji mudyango dyomarwero, mwahana wawa kayita! Yita ne hayiturapo kuwitha twe! No mburo hapumithire hatheki ha Isreali pathindjumu. ² Ene we Bethlehem Ephrathah, ngambi kemo eshi we ne ghomumbiru mumako ghaJuda, mushwagherera moye ghofotji mboghana raghura Isreali nokutunda kumatamekero no Aye ne kuroruhe. ³ Nyambi mboghana wapa kate mbuyama yu ghadi muyiruwana ghakuyovoroke nohamina hokuthiyarako ne mbohana thighuka kwaIsreali. ⁴ Mbogha nemana nokukunga mutanga wendi mumangcamu ghaFumu Nyambi, mufumwa dhodina dyaFumu Nyambi. Mbohana thiyara nomboghana yuveka mukaye kokaheya. ⁵ Mboghana tupa thiraro. Ngeshi haka Assyrians heye mudyango di nongeshi ghaha tjaghura kwimanganyena twe ne mbotuna wafafedhekera yikandho kwoko-wadi yawakungi nawa piterithi kuwemanganyena. ⁶ Awo ne mbohana kungu dyango dya Assyria nodimende nokumengeneno ghodyango dyaNimrod. Mboghana tughamwena kwaAssyria ngeshi mboheye mudyango dyetu nokwingena mumirurwani dhetu. ⁷ Yiruhupwa yaJacob ne mboyina kara mumbirikatji kohanu wetu, yira mume kutunda kwaFumu Nyambi, yira mvura pamuhonyi oghu ghuna kupira kutaterera munu nombadi hatatereranga mwana munu. ⁸ Yiruhupwa yaJacob ne mboyina kara mumatunga, mwawanu hohengi noyira nyime mukatji koyiyama yomumuthitu noyira dihepa mumutanga ghondjwi. Ngeshi ghengena mukatji kadho, aye ne ghana kudhi reketa nokudhi tetaghura muyipindhi no noyofotji temba ghokukona ghadhi ghamwene. ⁹ Dyoko dyenu ne mbona diyeyura mukuwitha hanyathi wenu nombomuna wahanyaghura. ¹⁰ Mboyina hokoka modiya diyuwa, agha ne medhero ghaFumu Nyambi eshi mboghana hanyaghura po mbi dhenu nomatemba ghenu. ¹¹ Nokaro mbona hanyaghurapo mambara ghenu nokuwitha maghundhi ghomatanarithero ghenu. ¹² Mbona hanyaghura po ghurodhi mudyango dyenu nombadi mbomukara nawa moni yodhimupepo. ¹³ Mbona yipitha yitjwandjo yenu nomaghundhi ghenu ghomawe. Mbadi mbomukarera hanyambi hombango. ¹⁴ Mbona dhuru maghundhi ghonyambi wenu ghodina dyoAsherah nomambara. ¹⁵ Mbona hutha mukudhongonano mughupata noghukenya kamatunga agha ghapirire kuniterera.