¹ Nakughamba eshi muteghere amwe mwapiterithi waJacob noharaghuri waIsreali; Mbadi ghuhunga kukwenu kudimuka ghuhungami. ² Amwe mwa nyenga ghuhunga ene ghomwa haka ghuyi, amwe muna kuremadheka hanu nokushwayitha nyama kuyishokora. ³ Amwe karo muna kudya nyama dhawanu nokuboborora yitumba yagho, kutjora yishokora nokuyitetaghura mupindhi-yipindhi, yira nyama yu hana tura mupoto. ⁴ Ndani amwe mwapiterithi ne mbomuna direra kwaFumu Nyambi ene mbadi mbogha muhutha. Mbogha nondeka thishwi thendi kukwenu paruvedhe ro pamurandu eshi mwatenda maharwero. ⁵ Fumu Nyambi ne kuna kughamba eshi; kukwenu mwe mwapumbi amwe muna kuyongaritha hanu wange, no ngeshi ghumweya ghana wapa yinu hadye awo ne hana kushana thiraro. Ene ngeshi mbadi ghana wapa thokudya, awo ne hana kukara noyita nendi. ⁶ Yodiyo, mbadina kara dithiku kwenu nombadi mbomu mona; mboghuna kara ghuthiku podiyo eshi maghana mbomu tenda mafweno ghenu. Diyuwa mbodina tokerera pawa pumbi nodikokore mbodi nawa mbandukera. ⁷ Hamakanga ne mbohana fu kuhonyi, nohamoni yopa mupepo nagho mbana pu kushwahura. Waheya mbana yandhera tunwa twagho yoyishi mbadiko dihuthero kwaNyambi. ⁸ Ene kukwange ne nayara napepo waFumu Nyambi, nayara mughuhungami nomungcamu mukutongora kwaJacob maharwero ghendi nokwaIsreali diharwero dyendi. ⁹ Mutegherere keho kuyinu yi, amwe mwapiterithi homundhugho dhaJacob, namwe mwaraghuri homundhugho dhaIsreali, amwe mwanyatha ¹⁰ ghushemwa nokuyipitha yoyiheya eyi yahungama. Ghomuna kutenda Zion nothinyinga naJerusalemu noghumbango. ¹¹ Hapiterithi wenu ne kuna kughatura nowidhi noha pristeri wenu ne kuna kuhonga ghutaterera paro. Hapumbi wenu ne kuna kutenda mafweno no masherenyi. Amwe ne kupiruka kwaFumu Nyambi nokughamba eshi; Fumu nane mbadi netu ghadi ndi? Mbadiko ghushatani showiye kukwetu. ¹² Yodiyo, pamurandu wenu, Zion ne mboghana kara yira dipya edi hapurura naJerusalemu ne yira thirambo thomawe nodirundu dyotembeli ne mbodina kara yira dyango edi yangambwera yipumbu.