¹ Apa hayuvire hanyathi waJuda naBenjamin eshi awa ngaha katunda kughupika ne kutenda ndhugho dhaFumu ghoNyambi wa-Esreali. ² Awo ne hahenyene Zerubbabel nawa manduraghumbo ghodiko, nohana ghambire eshi; Turuwane pofotji pamurandu eshi natwe tuna himi Nyambi wenu notwa kudjambera kutunderera apa ghaka tushimbire fumu wa-Assyria ghodina dyo Esarhaddon oyu ghaka turetire mudyango di. ³ Ene Zerubbabel, Jeshua nawa mayami mudiko ne hahuthire eshi; Mbadi shotu ruwane nenu mukutenda ndhugho dhaNyambi ene pithetu vene shotu tende ndhugho dhaFumu Nyambi wa-Esreali, thika dyodi ghaturawere fumu Cyrus waPersia. ⁴ Popo hanu awa hatungire mudyango diya hatangire kureta woma mwawa Juda; haretire didhongera mukwipitha thiruwana thokutenda ngirishe. ⁵ Haruwere manyinga mughudhindo kwawa piterithi hondhango hakashere yiruwana, thika dyodi hayiruwanine mumayuwa ghaCyrus nomughuraghuri waDarius ghofumu waPersia. ⁶ Kumatamekero ghoghu piterithi wa-Ahasuerus ne hatjangire mbapira dhokurundera hanu awa hatunga muJuda naJerusalem. ⁷ Mumayuwa gha-Artaxerxes ne Bishlam, Mithredath, Tabeel nawa yendhagho hatjangire mbapira kwafumu Artaxerxes waPersia. Mbapira dhi ne hadhi tjangire mundimi dho thi-Aramic nodha pwire kutoroka mu-Aramaic. ⁸ Rehum ghomukuru wawa shurundate naShimshai ghomu kamarukwaro ne hatjangire mbapira kwafumu Artaxerxes kuhatera Jerusalem. ⁹ Kutamekera kwaRehum mukuru wamashurundate, Shimshai muka marukwaro nawa yendhagho hoha ghaturi nawa ruwani hamweya mughuhurumende, haka Persia, hatutughuru homu-Erech naBabylon nawa tutughuru hoku Shushan, haka Dehavite na-Elamite ne hatjangire. ¹⁰ Hakupakerere nawanu hongcamu nawa kamakuto hoku-Osnapper haturire hanu mughupika noha katungire mu Samaria nohanu awa hatungere kumikunda dhopepi norware. ¹¹ Ethi ne thidamu-damu thombapira edhi hatumine: Kwafumu Artaxerxes, hatuturu hohapikoye kupiterera rware hana kutjanga eshi; ¹² Fumu ne ngogha dimuke eshi waya haJuda ngahana shwagherera kukoye ne hana twimanganyena muJerusalem omu hana kutenda mbara dho ndwa noghushatani. Awo ne hamana dirapa dyomawe nohana tameka kuroghuthura matatekero. ¹³ Pano keho ne tuna himi fumu ghadimuke eshi, ngeshi hamane kutenda dhi mbara nodirapa ne mbadi shoha tapange mutero nondupu, eyi ne mboyi nayipitha kashete kafumu. ¹⁴ Pamurandu eshi atwe ne twawana makwatithithoko ghumumbara dhafumu, mbadi ngayi moneka ghuwa kukwetu mukumona yinu eyi yakureta dinyatho kwafumu, podiyo tuna kutuma nokudimukitha fumu. ¹⁵ Eshi shane mbapira dhawakuru ghoye noghuna kudimuka eshi mbara ne dhawa nyathi nombodhina tjitjupitha fumu nomikunda dhendi. Adho ne dharetire maghukuktu kwawa mafumu nomikunda. Dhakarire ndjima-ndjima dhawa nyathi thiku dhina kapita. Pamurandu ghoyinu yi ne dhapwire kuhanyaghura po. ¹⁶ Tuna kudimukitha fumu eshi; ngeshi mbara dhi ne dhipwe kutenda nodirapa dipwe nadyo, mbadiko ghurawero ghoye kumikunda edhi dhakarera kumbombwa dhorware. ¹⁷ Fumu ne ghana huthire mbapira dhi: KwaRehum mukuru ghomashurundate naShimshai ghomu kamarukwaro nawa yendhagho nawa heya muSamaria nawaheya awa hatungere kumikunda dhokumbombwa dhorware; Eshe, "Thiraro thikare nenu. ¹⁸ Mbapira edhi mwanitumene ne hadhini torokere nokudhini toyera. ¹⁹ Muragho ne yame naghu turithirepo noha shanine noha wanine eshi thiku dhina kapita ne mbara dhi ne dhemanganyene mafumu, dhakarire dhawa nyathi noghuyi ne wakariremo." ²⁰ Pakarire mafumu ghongcamu agha gharaghure Jerusalem nomangcamu ghomikunda dhodhihe edhi dhatungera kumbombwa dhorware ne dhatapire ndupu nomutero kukwagho. ²¹ Pano keho ne muturepo muragho podiyo eshi hatutughuru wa ne hashayeke kutenda mbara, kate popa nakaturerapo muragho. ²² Mukoneke eshi mbadi mupomokithe yinu yi, Pashanye muna kutawedhera yinu yi yikure nokareta mayongarithero ghomakuru kughufumu? ²³ Apa hatoyire marawero ghafumu paghutho dhaRehum, Shimshai ghomuka marukwaro nawa yendhagho, popo hatambukerere kuyenda kuJerusalem nokathineneka haJuda hashayeke kutenda. ²⁴ Thiruwana thokutenda ndhugho dhaFumu Nyambi ne themanine muJerusalem kate mwaka ghoghudi mughupiterithi wafumu Darius wawa Persia.