¹ Mukoghonda koghu kwoko-wadi munyima dhopa haka hukire kumambara ghagho, hanu hapongire pofotji yira munu yofotji muJerusalem. ² Jeshua ghomwana Jozadak nawa minendi hoha pristeri naZerubbabel ghomwana Shealtiel nawa minendi ne ghemanine noha tendire thinyaku thaNyambi wa-Esreali mukutupura ndupu dhokutumekera thika dyodi yapwa kutjanga mumuragho waMoses katughuru waNyambi. ³ Ngambi kemo eshi woma wakarire mumwagho, pamurandu ghohanu awa hatunga mumatunga gho. ⁴ Hatendire memaneno ghothinyaku noha Hatupwerepo ndupu dhokutumekera kwaFumu Nyambi, muyambo ghokutumekera ghomathiku-thiku nogho runguro. Hakarire nothirika thothinyaku, thika dyodi yapwa kutjanga nokuyamba muyambo ghokehe diyuwa kukutha thivarero nothitjo thoyiruwana yomudiyuwa. ⁵ Munyima, hatupure muyambo ghokehe diyuwa nondupu dhokaghonda kokapya nomiyambo dhoyirika yaFumu Nyambi eyi hapongore nokehe yu ngahimanga kutupura muyambo kwaFumu Nyambi. ⁶ Hatamekire kutupura muyambo ghokutumekera kwaFumu Nyambi mudiyuwa dyokutanga mukaghonda koghukwoko-wadi, ngambi kemo eshi matamekitha ghongirishe ne mbadi ghapwire kutateka. ⁷ Hatapire manyinga kwawa tendi mayugho ghomawe nokwawa yuwi, hatapire yidya, yinwa, maghadhi kwawanu hoku Sidon nawa ka Tyre, haka rete yitondo kutunderera kuLabanon no kudikuruviya dyaJoppa, thika dyodi ghawa rawere fumu Cyrus ghoku Persia. ⁸ Mukaghonda koghuwadi mumwaka ghoghuwadi munyima dhopa hakeyire kundhugho dhaFumu Nyambi muJerusalem, Zerubbabel ghomwana Shealtiel naJeshua ghomwana Jozadak nawa minagho wahe hoha pristeri nawa levi, nawahe awa hakahukire kashwagha kughupika nokeya kuJerusalem hatamekire noyiruwana. ⁹ Awo ne hatapire ngcamu kwawa levi kutamekera myaka makumi mawadi kokuyeyura hapiterithe yiruwana mundugho dhaNyambi. Jeshua nohanendi, nawa minendi, Kadmiel nohanendi hana hoka waHodavial nahana Henadad nawanawo, nawa minagho waheya ne hakukwatire pofotji hakare pitaghutho ghoyiruwana yondhugho dhaNyambi. ¹⁰ Hatendi matungo ne hatatekire ngirishe dhaFumu Nyambi. Eyi ne yaningithire hapristeri hakare muyishupata yagho nomarumbendo nawa levite ghohana Asaph hakuyire Fumu Nyambi noyishika, mukukutekera Nyambi thika dyodi ghawa rawere fumu David wa-Esreali. ¹¹ Hembire ghukugha nomatumero kwaFumu Nyambi, pamurandu eshi Aye ne muwa, noghunungo wendi ne wakara kuroruheya kwawa Esreali. Hanu waheya ne hakuyererire nokakugho kokakuru, yoyishi ne matamekitho ghondhugho dhaFumu Nyambi ghapwire kutenda. ¹² Ene hapristeri, haLevite nawa manduraghumbo hohakurupe awo ne monine ngirishe dhokutanga, yawaningithire hadirire thikuma pakumona matamekitho ghondhugho dhi ghana pu kugha tenda. Ene wingi wohanu ne hakugherere noyishamberera. ¹³ Paghuhura, hanu ne yawakangire kunongonona yishamberera kutunderera mukayoghototo kawanu awa hadirire, hanu ne hadirire nokakuwo koyishamberera yoyikuru nomuyoyo ghu ne wayuvikire kokayenda.