¹ Ndani hapumbi Haggai naZechariah ghohana hoka wa-Iddo, hapumbire mudina dyaNyambi wa-Esreali kwawaJuda awa hatungire muJudea naJerusalem. ² Zerubbabel ghomwana Shealtiel naJeshua ghomwana Jozadak hemanine nohatamekire kutenda ndhugho dhaNyambi muJerusalem nawa pumbi awa hawa kwatithireko. ³ Tattenai ghonguvuru kumikunda dhokumbombwa dhorware, Shethar-Bozenai nawa yendhagho heyire nokunepura eshi; "Yidye ghana mupa muragho eshi mutende ndhugho nokumanitha dirapa? ⁴ Nagho hahuthire eshi; Hadye mena wawa tutughuru awa hana kutenda thiruwana thi? ⁵ Ene meho ghaNyambi ne ghatopere pawa mayami hoha Juda nohanyathi wagho ne mbadi hakonine kuwa shayekitha. Awo ne hataterere mbapira hakudhitume kutunda kwaDarius nomarawero haka ghawa huthere. ⁶ Edhi ne mbapira dhodamu-damu edhi Tattenai ghonguvuru ghomikunda dhokumbombwa dhorware naShethar-Bozenai nawa yendhagho homu mikunda dhokumbombwa dhokurware, edhi hatumine kwafumu Darius. ⁷ Hatumine mbapira, mukutjanga yinu yi kwafumu "Thiraro thikare noye." ⁸ Ghayi dimuke fumu eshi tuna yendi kumukunda waJudea kundhugho dhaNyambi shokuru. Adho ne hadhi tenditha nomawe ghashokuru nomitambo edhi hatenditha dirapa. Yiruwana ne kuna kuyendapo thiwana nomanyara ghagho ne kuna kutombora yiruwana yi. ⁹ Tuna kepura hakuru wagho eshi; Yidye ghamupa ngcamu dhokutenda ndhugho nodirapa? ¹⁰ No shime tuna kepura mena ghagho, podiyo eshi notuwa dimukithe kukoye; mena ghawa tutughuru awa hana kupiteritha ne ghapwa kutjanga. ¹¹ Awo ne hana kahutha ngeno, Atwe ne twapika Nyambi ghomudiwiru nomuve no atwe ne kuna kutendurura ndhugho edhi hatendire pakare-kare hamafumu wetu hongcamu noha dhimanine. ¹² Ene pamurandu eshi hakerekando wetu ne hapatithire Nyambi ghomudiwiru, ghawa tapire munyara dhaNebuchadnezzar fumu wawa kaBabylon haka Chaldean, oyu ghana hanyaghure ngirishe dhi nokushimba hanu kuBabylon. ¹³ Ngambi kemo, mumwaka ghokutangerera wafumu Cyrus waBabylon, ghaturithirepo muragho mukuna tendurura ndhugho dhaNyambi. ¹⁴ Fumu Cyrus ne ghakahuthire yiruwanitha yongorondo nosiliveri eyi yakarire mundugho dhaNyambi eyi ghana shimbire fumu Nebuchadnezzar nokayitura mungirishe dhomu Babylon. Fumu Cyrus ne ghayi tapire kwaSheshbazzar oyu ghaneyire eshi nguvuru. ¹⁵ Ghamu tongwerire eshi; Shimbe yinu yi nombo kayiture mungirishe dhomu Jerusalem. Ndhugho dhaFumu Nyambi ne dhikapwe kutenda. ¹⁶ Ndani oyu Sheshbazzar ne ghakeyire noghana tamekire kutenda matatekitho ghondhugho dhaNyambi muJerusalem no awo ne hatanga nothiruwana thi ene mbadi dhapwa kutenda. ¹⁷ Pano keho ngeshi yina kumoneka thiwana kwafumu, ngoha fukunye mughushwi wafumu pamweya kukona kuwanamo muragho kutunda kwafumu Cyrus, oghu gharawere matendwerero ghondhugho dhaNyambi muJerusalem. Nafumu ne ngo mboghana tutumena keho matokwero ghendi.