¹ Nayi ghayarire mumutjima wange yoyiheya yi, podiyo eshi niwane ghukenu wayo: Eshi hahungami, hanyanyami noyiruwana yagho ne munyara dhaNyambi yakara. Ene hanu ne mbadi hadimuka eshi yinu munye yina wataterera ruhakitho endi thinyenganyi. ² Yinu yoyiheya ne kwiya yira thinu thimweya: Thinu thofotji ne kuhokoka kwawa hungami nawa yiharuri; kwawa hunga, hakushuki nawa hanyata; Koyu ghakudjamberanga nokoyu ghapiranga kukudjambera. Thika dyodi yidi kwawa hunga, nawa yiharuri kemo. Oyu ghokushimba medhero thika yoyu ghayapa medhero. ³ Oghu ne ghushatani oghu wahokokanga mukaye; eshi thinu thofotji ne kuhokoka kwawaheya. Yaghushemwa, mitjima dhohanu ne dhayara ghushatani; Ghupuku ne moghudi mumutjima dhagho apa hana kupara. Munyima dhoyi, hana kuyenda kwawafu. ⁴ Ene hasha koyu ghakuhatithera kwawa yumi, pamurandu eshi poghadi makurupero. Mbwa ghomuyumi ne hasha kupiterera nyime ghokufa. ⁵ Hayumi ne hadimuka eshi mbohana fu; ene hafu ne mbadiko eyi hana kudimuka nombadi hadi karo nomuyangu, nombadiko ethi hana kuvuruka. ⁶ Awa hahakire, awa hadhimbire noyi harumbere yoyiheya yawa dhongonoka. Mbadiko karo ethi mboha kuhatithera muno mukaye. ⁷ Yende kadye yidya yoye noyishamberera nokanwe vinyu ghoye nomutjima ghokushamberera; Nyambi ne ghatambura kare yiruwana yoye. ⁸ Kenithe yishupata yoye nowethe maghadhi mutwi ghoye. ⁹ Pare ghushamberera nambuyama oyu wahaka mumayuwa ghoye ghomaheya, ghoyipara yoye yokupira mudyo eyi ghakupa Nyambi muno mukaye, yoyishi oko ne koka mbenene wawana noyiruwana eyi watenda muno mukaye. ¹⁰ Kehe yi dina kuruwana dyoko dyoye, yiruwane keho nomangcamu ghoye ghomaheya; yoyishi mbadiko yiruwana, maghano noghudimuki ngambi ghunyanyami muyipiro omu ghuna kutamba. ¹¹ Napirukire nona monine muno mukaye: Mushupu ne mbadi wakatjova, endi ndwa kwawa kangcamu, endi yidya kwamunyanyami, endi ghushwi kwawa kakutjwathana, endi kutapa maghuwa kwawa kamanongwahu; Ene ruvedhe nokambenene ne kuhokoka kwawaheya. ¹² Munu karo ne mbadi ghadimuka ruvedhe rwendi: Yira thi oyu hana kwata mudikwe, yira yinyunyi eyi hana kwata muthiraha; yodiyo, hana wahanu ne hana kuwa muyiraha yoruvedhe roghushatani ngeshi oku yina wawera. ¹³ Namonine karo ghunyanyami muno mukaye eshi ghukuru kukwange. ¹⁴ Pakarire thitata nawa tutughuru hohapu hatungamo; nafumu ghongcamu ne ghahomokere thitata thi nokuthi dhingumwetwedha ghatende thiraha thishokuru. ¹⁵ Ene ha waninemo muhepwe gho munyanyami nopa ghunyanyami wendi gha ghamwene thitata thothiheya. Ene noyofotji temba yu ghakavurukire muhepwe yu. ¹⁶ Ndani ghona ghambire eshi; "Ghunyanyami ne hasha kupiterera mangcamu. Ngambi kemo eshi ghunyanyami wamuhepwe ne haghunyathire, noyighamba yendi ne mbadi hayiyuvire." ¹⁷ Yighamba yamunyanyami eyi ghana ghamba muthipore ne kuyuveka kupiterera kukuyerera kwamuraghuri gho mwawayero. ¹⁸ Ghunyanyami ne hasha kupiterera yirwitha yomuyita ene muharuri ghofotji ne kwipitha maghuwa ghomengi.