¹ Ndhi dhokufa ne kuningitha munde ghunuke, muyero naye ne kurikanyitha ghunyanyami nodikuto. ² Mutjima wamunyanyami ne kudyoko dyendi dyorudyo ene mutjima wamuyero ne kurumoho. ³ Ngambi apa ghana kuyenda mundhira ye muyero, ghana pumbwa ghunyanyami. ⁴ Ngeshi mupepo wamuraghuri ghuna kwimanganyena, wathiya thiruwana thoye. Yoyishi ghuporothi ne kuturumukitha murandu dhishokuru. ⁵ Poghudi ghushatani oghu namonine mukaye, makwirero ghokushwagha kwamuraghuri: ⁶ Hayero ne hadi muyipura yishokuru ene hashwi ne payipura yopamuveve. ⁷ Namonine hapika hana kuyendera pambi ene hama fumu ghana ne kuna kuyenda pamuve yira hapika. ⁸ Kehe yu ghokuthima dikwina ne mboghana wera mo nokehe yu ghokubomona dikuma ne mbothina mukumeka thighodhi. ⁹ Kehe yu ghokubonyona mawe ne mboghana muremeka mawe nokehe yu ghokutetaghura yikunyi, naye mboyina muremeka yikunyi. ¹⁰ Ngeshi kamo ne kafu, nombadi hana kukatwepitha, ghakona keho kuruwanitha mangcamu ghendi ghomengi ene ghunyanyami ne kureta mutombo mwene. ¹¹ Thighodhi ne kukona thikumeke ngeshi mbadi hana thuyu, shamuyoyo ne naye kemo. ¹² Yighamba yomukanwa kamunyanyami ne yinongo ene miromo dhamuyero ne mbodhina mungambwera. ¹³ Matangero ghoyighamba yokutunda mukanwa kendi ne yoghuyero nomaghoyero ghoyighamba ne noghupuku mo. ¹⁴ Muyero ne kwingipitha yighamba nombadiko ghokudimuka eshi yinu munye yina kurandako. Yidye shogha mutongwere eshi yinu munye shoyiye munyima dhendi? ¹⁵ Yiruwana yamuyero ne kumughayitha nombadi ghadimuka ndhira dhokutamba kuthitata. ¹⁶ Toko-toko kukwenu mwaditunga ngeshi fumu wenu ne mwanuke noha mafumu ghana ghenu ne kutameka yirika yokukushambereritha mathiku-thiku! ¹⁷ Fiyaghudhi kukwenu mwaditunga ngesgi fumu ne dikuto nomaghano noha mafumu ghana ghenu ne kukushamberera paruvedhe rokuroghera, pamangcamu mbadi mughudakwi! ¹⁸ Pamurandu ghoghuva matungo ne ghana kwipa nopamurandu ghonyara dhodjengu ndhugho ne dhina kupayaghuka. ¹⁹ Thirika thokukushamberera ne kuthitenda haka heke novinyu ghokukushamberitha ene masherenyi ne dihuthero dyoyinu yoyiheya. ²⁰ Perere poye eshi ghukute fumu, ngambi muyighayara yoye; Mbadi wakona kukuta mutungi, ngambi mungonda dhoye dhokurara; thinyunyi thomu mupepo kukona thishimbe diywi dyoye nothinyunyi thomuwiru kukona thikumithe mbudhi.