¹ Vukumene yidya yoye mumeyu, yoyishi mboghuna yiwana munyima dhomayuwa ghomengi. ² Tape maghamweno kohanu kwoko-wadi ngambi hanu kwoko-hatu; Yoyishi mbadi ghuna dimuka eshi ghushatani ghongepi ghudi mukaye. ³ Ngeshi mavuyi ne ghana yara mvura, agho ne kurokitha mvura pakaye; endi thitondo thiwere kuGhucuma ngambi kuMbunda. Mudyango momo thina wera ne mombo thikara. ⁴ Oyu ghokurorera mupepo ne mbadi mbogha kuna no keheyu ghokurorera mavuyi ne mbadi mbogha kesha. ⁵ Thika dyodi wapira kudimuka mayira ghomipepo, nongepi edi yakuranga yishokora mudira dyoyu ghadi nombutu; Yodiyo, mbadi wadimuka yiruwana yaNyambi oyu Ghatenda yoyiheya. ⁶ Mathiku-thiku ne kune mbuto dhoye nokurunguro ne tende kemo, yoyishi mbadi ghuna dimuka eshi yipi yakurogha, oyi endi yiya endi yoyiheya ne mboyina kara yiwa. ⁷ Mughushemwa, munyenge ne ghuwa, nowa monekeranga ghuwa thikuma kwadiho mukumona diyuwa. ⁸ Ene ngeshi katughuru ne ghapara myaka dhodhingi nokushamberera modho dhiheya dhi, ene ghavuruke diyuwa dyomakokore, yoyishi mbohana kara hengi. Yoyiheya yi yina kwiya ne yapira mudyo. ⁹ Shamberere mungaghu oku we ne shime ghomurereya ninge mutjima ghoye ghukushambererithe oku we ne ghomurereya; Yende omu ghuna kukutwara mutjima ghoye nomu munyenge ghomeho ghoye. Ene dimuke muyoyiheya yi, Nyambi ne mboghana kutwara kundhango. ¹⁰ Yodiyo, shwayithe toko-toko mumutjima ghoye, noshupure ghushatani, yoyishi wanuke nomangcamu ghapo ne yapira mudyo.