¹ Vuruke Muvareki ghoye mumayuwa oku we ne ghomurereya, kughutho ghokwiya mayuwa ghomaghukukutu nomyaka ne dhina kokera apa mboghamba eshi; "Mbadiko eyi yina kuni shambereritha:" ² Apa didi diyuwa nomunyenge, kaghonda nonungwedhi, shime mbadi yina tokera nomavuyi ne mbadi ghana dhongonoka munyina dhomvura. ³ Mudiyuwa edi mboha tutuma hakungi hondhugho nohaka mangcamu mboha kuvame; Apa haka kupura mboha shayeka pamurandu eshi hapu no awa hakengereranga pamakende mboha dhimana. ⁴ Ngeshi makorogho ne hana ghayandhera mumambirikatji, nomughuma ghokutwa ne kwishi-kwishi; Apa mbogha pinduka ghumweya kumughuma ghothinyunyi nawa mbuyama waheya hoyishika mboha waghurumune. ⁵ Shime karo hana yapa ghure nomaghukukutu ghomundhira; apa thitondo thombuyo thina shwaghanga mitemo no apa mbathi-mbathi ne ghomuremeghena nokurura mawero. Munu ne kuyenda kudighumbo dyendi dyororuheya no haka thidiro hana kuyenda mumambirikatji. ⁶ Vuruke Muvareki ghoye kughutho ghokukasha mughodhi ghoSiliveri endi mabonyokero ghothinwitho thongorondo. nothinwitho thodikende mbothipwe kupayura kurware endi dikosho dyokutjokera kudithima. ⁷ Ndani rukungu ne mboruna hukera karo kumuve oku rwashwayire: Mupepo ne mboghuna huka kwaNyambi Oyu ghaghutapire. ⁸ Yapira mudyo, dyoghana kughamba muyaghuri. "Yoyiheya, yapira mudyo." ⁹ Nomukuwedhererapo, pamurandu eshi muhongi ne munyanyami, ghahongire hanu manongwahu, kemo aye ne ghadheghetere nokurikanyitha nokurongeka thiwana mathaghano. ¹⁰ Muyaghuri ne ghashanine kuwana yighamba yokurogherera noyoyiheya eyi yapwire kutjanga yahunguma noyaghushemwa. ¹¹ Yighamba yamunyanyami ne yira dikokodho noyighamba yakakukuhonga ne yira dimboha edi hana pamarera thiwana, eyi ghatapa mudithi yofotji. ¹² Mwanange ghokatughuru, pwe kunyangadhekera kuyinu yimweya. Maturitheropo ghomambapira ghomengi ne mbadiko ghuhura wayo nomandunda ghokukuhonga ne kughayitha yirama. ¹³ Tuyuve keho ghuhura ghoyinu yoyiheya: Yape Nyambi nokutekere marawero Ghendi. Eyi ne yoyi tumbukera yamu yomuheya. ¹⁴ Nyambi ne mboghana reta yiruwana yoyiheya kundhango. Yoyiheya yoghudhindo ne mboyina shwagha, yikare eshi yihunga endi yaghushatani.