¹ Yidye munyanyami? Yidye yu ghadimuka mapathwerero ghoyinu? Ghunyanyami wakatughuru ne kuningitha rupara rwendi rutwedhime noghuporothi ghorupara rwendi ne kukutjindja. ² Nakughamba eshi kutekere marawero ghafumu, pamurandu ghomedhero ghenu kwaNyambi. ³ Mbadi mwakona kutambukerera kuyakunuka kukwendi. Mwemanganyena ghuyi, aye ne kutenda yoyiheya yokumu kugha. ⁴ Oku yidi yighamba yafumu ne kodhidi ngcamu; no yidye ghokukona ghaghambe kukwendi eshi, "Yinu munye ghuna kutenda?" ⁵ Kehe yu ghokukutekera marawero ghendi ne mbadi mbogha ghengena mumaghukukutu nomutjima wamunyanyami ne kukona-kona yoyiheya ruvedhe nomatetero ndhango. ⁶ Pamurandu eshi kukehe thinu ne porudi ruvedhe nomatetero ndhango, ngambi kemo eshi ghuyi wawanu ne kukuwedherera thikuma. ⁷ Aye ne mbadi ghadimuka eshi yinu munye mboyi hokoka; yidye keho shogha mutongwere ruvedhe munye mboyi hokoka? ⁸ Mbadiko yu ghadi nongcamu pamupepo mukushwenena mupepo nombadiko yu ghadi nongcamu kudiyuwa dyoyifa. mbadiko kambenene komashutukero kuyita yo, noghushatani ne mbadi mboghu yokora awa hakutura mumwagho. ⁹ Yoyiheya ne nayimonine, nona thotere mutjima wange kukehe thiruwana ethi hana kutenda mukaye: Parudi ruvedhe rumweya kwamunu gharaghure ghumweya kumashinyihero ghendi. ¹⁰ Ndani namonine mahoreko ghamuyi, oyu gheyire nokuna yakunuka kughupongoki nohanu ne havuramine muthitata omu haruwanene ghuyi wagho. Noyi karo, yapira mudyo. ¹¹ Pamurandu eshi matetero ndhango ghoyiruwana yoghushatani ne mbadi ghokutambukerera; yodiyo, mutjima ghohana hotutughuru wawanu ne wayara mukutenda ghushatani. ¹² Ngambi kemo eshi muharuri ne kuharura yikandho dithere nomayuwa ghendi ne ghana kurepa ene ghushemwa, nadimuka eshi mboyina rogho kwawa hayapa Nyambi, awa hamukutekera. ¹³ Ene mbadi mboyirogha kwa thiharuri nomayuwa ghendi ne mbadi mbogha repa, eyi yidi yira mudhidhimbi, pamurandu eshi mbadi ghakutekera Nyambi. ¹⁴ Poyidi yokupira mudyo eyi yahokokanga mukaye, pohadi hahunga awa hana kukuwanekera noyinu eyi yaroghera hayiharuri; shime karo kohadi hayiharuri awa hana kukuwanekera noyinu eyi yina roghera hahunga. Naghambire eshi noyi karo yapira mudyo. ¹⁵ Nawedherere payishamberera, pamurandu eshi munu mbadiko eyi ghadi nayo muno mukaye yokudya, kunwa nokushamberera; eyi ne mboyina karerera mumwendi mumayuwa ghendi ghomaheya agha ghamupa Nyambi pano pakaye. ¹⁶ Apa naghayarire mumutjima wange eshi nidimuke ghunyanyami nokumona yiruwana eyi hatendanga muno mukaye, ngambi kemo eshi kwaghumweya ne mbadiko kurara ghuthiku nomutenya. ¹⁷ Ndani ghona momine yiruwana yaNyambi, eshi munu ne mbadi wakukona ghadimuke yiruwana yoyiheya eyi haruwana muno mukaye. Ngambi ngepi ghana kuruwana munu eshi hayidimuke, ene mbadi yakona; shime karo, ngambi ngepi ghana kukondja katughuru ghomunyanyami eshi hayidimuke ene mbadi yakona.