¹ Dina dyodiwa ne dyapiterera munde ghondhiro nodiyuwa dyoyifa ne dyapiterera diyuwa dyomushamurukero. ² Hasha kuyenda kudighumbo dyothidiro, mbadi yira wakuyenda kudyango dyothirika thoyishamberera. Oghu ne ghoghuhura wakatughuru ghomuheya nohayumi ne mbohana yitura mumitjima. ³ Toko-toko ne dhapiterera mune; rupara rokukasha ne kuturitha mutjima ghukare hasha. ⁴ Mutjima wamunyanyami ne mundhugho dhothidiro ene mutjima wamuyero ne mundhugho dhoyishamberera. ⁵ Hasha kuyuva makonekithero ghamunyanyami, mbadi yira wakutegherera dimbo dyamuyero. ⁶ Yira kucanda komighunga edhi dhina kupya mupoto, dyowapitura mune wamuyero. Nayo karo yi ne yapira mudyo. ⁷ Mughushemwa, mapethero ne ghepitha thitambo thamunyanyami nokwidhera ne kwepitha mutjima. ⁸ Ghuhura ghothinu ne wapiterera matangero ghatho nomadhidhimekero ghopa mupepo ne ghapiterera makununekero ghopa mupepo. ⁹ Mbadi wakona kutambukerera mumupepo ghoye ghupate, ghupata ne waturumuthera mudiva dyamuyero. ¹⁰ Mbadi wakona kughamba eshi; "Pashanye ghana karera mayuwa ghokare eshi hasha kupiterera ghano?" Mbadi ghunepura noghunyanyami kuhatera yinu yi. ¹¹ Ghunyanyami ne ghuwa pamurandu eshi yira ghupingwa nomoyidi yiyeramo mowa hana kumona diyuwa. ¹² Ghunyanyami ne mangandekitho, thika dyodi ghakara masherenyi eshi mangandekitho ene ghuwa ghomanongwahu ne ghunyanyami ghokutapa moyo kowa hadi nagho. ¹³ Thotere yiruwana yaNyambi: Yidye ghokukona ghaghorore eyi ghatendire Nyambi yapeta? ¹⁴ Shamberere mudiyuwa dyomaghuwa ene thotere diyuwa dyomaghukukutu: Mughushemwa, Nyambi ne ghatorora yofotji thika ghumweya, podiyo eshi munu mbadi shogha dimuke eyi yakwiya munyima dhendi. ¹⁵ Namonine yoyiheya mumayuwa ghange ghokupira mudyo: Poghadi muhungami ghokufera mughuwa wendi nopoghadi muyi ghokupara rure mughuyi wendi. ¹⁶ Mbadi wakona kukumona ghothinda ghupongoki endi ghunyanyami: Pashanye shokupaghere ghothinda? ¹⁷ Mbadi wakona kukara ghushatani noghuyero ghushokuru: Pashanye shofere kughutho ghoka kuma mayuwa ghoye? ¹⁸ Ghuwa thikuma eshi ghukwaterere yino, nombadi wakona kuyakunutha nyara dhoye koyimweya; oyu ghayapa Nyambi ne mboyina mukunduruka yoyiheya. ¹⁹ Ghunyanyami ne kutanaritha hanyanyami kupiterera haraghuri dikumi hothitata. ²⁰ Mbadiko muhungami pano pakaye ghokutenda ghuwa nombadi ghaharuranga. ²¹ Shime karo, mbadi wakona kutura kumutjima kehe yi hana kughamba hanu, pamurandu eshi ghuredhu wakuyuve mupikoye ghana kukukuta. ²² Pamaruvedhe ghomengi, wadimuka nowe ghothinda eshi wakutanga hamweya. ²³ Yoyiheya ne nayidimuka paghunyanyami. Naghambire eshi: "Mbona kara ghunyanyami;" ene kayenda yakarire nange. ²⁴ Thika dyodi yakara yinu eshi kayenda nomughudhungi ghushokuru, Yidye shogha yiwane? ²⁵ Naturireko mutjima wange nidimuke, nifukunye nonishane ghunyanyami nothitambo thoyinu yi, mukudimuka ghuyi wawayero endi dyayero noghupuku. ²⁶ Nayiwanine eshi ghururu kupiterera yifa, mbuyama ghomutjima yira yiraha nomakwe ghashatani, oyu gha kara nomutjima yira ghuketanga. Ene oyu ghakugha Nyambi ne mboghana mupoghoroka ene thiharuri ne mboghana ru muthiraha thambuyama yu. ²⁷ "Eyi ne yona wanine," dyoghana kughamba muhongi. Kuwedherera thinu kuthinu thimweya podiyo eshi ghuwane thitambo. ²⁸ Eyi ne yodiyo shime ghuna kushana mudhimu wange ene mbadi nina kuyiwana: Nawanine katughuru yofotji mwawanu diyovi ene mbuyama mwawano ne mbadi namuwaninemo. ²⁹ Mughushemwa, yimweya ne yino eyi nawanine: Nyambi ne ghatendire munu noghuyi ene hayeradheka yithinganyeka yoyingi."