¹ Poghudi ghushatani namonine muno mukaye nowa yara mwawanu. ² Katughuru oyu Nyambi ghapa ghushwi nodikuto, no mbadiko ethi ghana pumbwa ko yoyiheya eyi ghana kurumbera; Ene Nyambi ne mbadi ghana kumupa ngcamu mukudya ko ene ngumbi ne ghana kudjabwana ko. Eyi nayo ne yapira mudyo noyira dihamba dyoghushatani. ³ Ngeshi katughuru ghawana hana dithere nogha para rure ene mbadi ghana kwikuta maghuwa nombadi ghapwa eshi hamuhoreke, nakumona eshi hasha kwa mbutu yu ghafera mudira mbadi pofotji nakatughuru yu. ⁴ Aye ne kwiya murupe rokupira mudyo nokuhuka mudikokore nodina dyendi ne dyapwa kungambwera mudikokore. ⁵ Ngambi kemo eshi mbutu ya mbadi ghamona diyuwa endi ghatjwathane kehe yi ene mbutu yu ne ghawana maturumuthero kupiterera katughuru ya. ⁶ Ngambi ngo gha pare myaka mayovi mawadi ene mbadi ghamona maghuwa. Mbadi waheya kutamba kudyango dyofotji ndi? ⁷ Yiruwana yamunu yoyiheya ne yakanwa kendi ene ngambi kemo eshi mudhimu wendi ne mbadi wekuta. ⁸ Maghuwa munye ghokuwana munyanyami kwamuyero? Maghuwa munye ghokuwana muhepwe ngambi ngogha dimuke eshi ngepi dyokuyenda paghutho dhawayumi? ⁹ Hasha kumwedhi ghomumeho kupiterera yirumbera yomudhimu. Nayo yi ne yapira mudyo, noyira wakutjidha mupepo. ¹⁰ Kehe thi thakarapo ne thapwa kuta dina, yapwa kudimuka eshi oyu ne munu; mbadi wakukona kukukanyeka noyu ghakara nongcamu. ¹¹ Apa keho yidi eshi yinu yoyingi ne yengipitha yokupira mudyo, ngepi edi shogha kare munu eshi ye ne hasha? ¹² Yidye oyu ghadimuka eshi yipi yaroghera munu muyipara yendi, mumayuwa ghendi ghomaheya ghokupira mudyo, agha ghapita yira mudhidhimbi? Yidye oyu mbogha mutongwera eshi yinu munye mboyi hokoka munyima dhendi?