¹ Yende nodikuto ngeshi oku ghuna kuyenda kundhugho dhaNyambi; no henye pepi ghuyuve, mbadi yira wa kutenda muyambo wawayero, yoyishi awo ne mbadi wa kudimuka eshi hana tendanga ghushatani. ² Watambukerera nokanwa koye nowatawedhera mutjima ghoye ghughambe kehe yinu kutambukerera paghutho dhaNyambi. Nyambi ne mudiwiru no owe ne mukaye; Yodiyo, tepure yighamba yoghe. ³ Yirota ne kweyanga pamurandu ghoyinu yoyingi nodiywi dyamuyero ne kudidimukera kuyighamba yishawingi. ⁴ Ngeshi ghuna tapa medhero kwaNyambi, warangapa kugharuwera, Aye ne mbadimo maghuwa mwawa yero ene ruwere eyi watapire medhero. ⁵ Hasha mbadi wakwedha, kadi pofotji nokwedha ene kokukanga kugharuwera. ⁶ Waningitha kanwa koye kaharurithe yirama yoye, endi noghambe kwamupika Nyambi eshi; "Ghaya ne makwirero." Pashanye shomupatithere Nyambi kumedhero ghenu ghoyishavina nokwipitha yiruwana yonyara dhenu? ⁷ Muwingi ghoyirota nowingi ghoyighamba ne nayo yapira mudyo ene yape Nyambi. ⁸ Ngeshi ghumone rupetho rwawa hepwe, matjorero ghondhango nogho ghuhungami mumikunda dhenu, yinu yi ne yamutetura; pamurandu eshi pohadi hapiterithi awa hana kuwa kengerera. ⁹ Mukuwedherera po ne, yiyeramo yomudyango ne yawaheya; ngambi fumu naye ghana kupwa kukorera mudipya. ¹⁰ Oyu ghahaka Siliveri ne mbadi mboghekuta kukara noSiliveri ngambi oyu ghahaka ghushwi eshi ghakuyuve marikanyeno keho kuyiyeramo yendi. Nayo karo mbadiko mudyo. ¹¹ Ngeshi ghushwi ghawingipa, awa hana kuyidya ne nagho hana kwingipa; Yiyeramo munye kwawa thinda, shimengwa kuyimona nomeho ghagho. ¹² Turo twamunu ghomutoghoro ne tutowi, yikare eshi ghadye ghupu ngambi yoyingi; ene ghushwi wamunu ghomutungi ne mbadi wakumuningitha gharare thiwana. ¹³ Poghudi ghushatani ghushokuru namonine mukaye; Ghushwi ghokupungura hathinda ne kuwatwara kumayongarero ghagho hathinda. ¹⁴ Ene ghushwi gho ne hana kaghuyongaritha mughumbondo; no paka wana mwana ne mbadi ghadi karo noghushwi munyara dhendi. ¹⁵ Thika dyodi ghashwayire mudira dyanyina, thiheha dyombogha huka, kuyenda dyodi gheyire. Mbadiko ethi mbogha shimba payiruwana yendi, eyi mbogha shimba munyara dhendi. ¹⁶ No eyi nayo ne ghushatani ghushokuru, thika dyodi gheyire, dyombo ghayenda. Yiyeramo munye keho shogha wanemo oyu gharuwanene mupepo? ¹⁷ Mayuwa ghendi ghomaheya ne ghadire mudikokore no gha karire notoko-toko dhishokuru noghupata. ¹⁸ Eyi ne yona monine, ghuwa kwamunu mukudya nokunwa nokudjabwana maghuwa ghoyi gharuwanena muno mukaye mumayuwa ghoyipara yendi pano pakaye, eyi ghamupire Nyambi eshi ghupingwa wendi. ¹⁹ Thika kwakehe munu oyu ghapire Nyambi ghushwi, shime nogha mupire mangcamu mukudya kughushwi ghu, ghawane ghupingwa wendi nokudjabwana kayuywa kendi, yoyishi eyi ne yitapera yaNyambi. ²⁰ Mbadi mbogha vuruka mayuwa ghoyipara yendi; pamurandu eshi Nyambi ghamuhuthera noyishamberera mumutjima wendi.