¹ Ndani ghona hukire nokughayara rupetho oru hana kutenda muno mukaye: Mone, maruhodhi ghowa hana kupetha ene mbadi hadi namuhengaghuri kowa hana kuwapetha ne hadi nongcamu ene wo ne mbadiko muhengaghuri wagho. ² Yodiyo ne nakuyire hafu, awa hapirapo kare kupiterera awa hana kupara shime. ³ Ene ngambi kemo, waheya mbadi hapiterera oyu ghapira kukarapo panganyi; Oyu ghapira kumona ghuyi oghu haruwana muno mukaye. ⁴ Namonine karo eshi yoyiheya yiruwana noyiruwana yomanongwahu ne yakara yirumbera yamukamapara-ghumbo. Nayo karo yapira mudyo noyira wakutjidha mupepo. ⁵ Muyero ne ghahonya moko ghendi noghana kudya yirama yendi. ⁶ Ene hasha nyara dhina kuwana yiyeramo kupitera muyiruwana yothipore, mbadi pofotji nonyara dhokuyereka kutjidha mupepo. ⁷ Napirukire nona monine yokupira mudyo muno mukaye: ⁸ Poghadi oyu ghakara pithendi, mbadiko muyendhendi, mwana ghokatughuru ngambi minendi ghokatughuru ene mbadiko ghuhura ghoyiruwana yendi endi meho ghendi ghekute ghushwi. Ene mbadi wakukwipura eshi; "Yidye oyu nakuruwanena nokukushweneka nothinda kumaghuwa?" Nayo karo yi ne yapira mudyo noyira thipiro ethi hapira kuthotera. ⁹ Hanu hawadi ne hapiterera munu yofotji, pamurandu eshi ndjambi dhoyiruwana yagho ne yingi. No ngeshi ghahaghu, ghumweya ne ghana kukotora muyendhendi. ¹⁰ Ene ghukukutu thikuma kwamunu ghopithendi, yoyishi ngeshi ghana ghu, mbadiko ghoku mughamwena. ¹¹ No ngeshi hawadi hana rara pofotji, awo ne hana kukuyenyena; ene ngepi keho edi shogha kuyenyene munu yofotji? ¹² Munu yofotji ne kukona ghamuwithe munu ghumweya ene hawadi mbadi shogha wakone. Mughodhi ghomukwa dhihatu ne ghukukutu kughu tjinuna wangu. ¹³ Hasha kwa muhepwe namurereya ghomunyanyami kupitererera mukurupe endi fumu ghomuyero oyu ghana kwanga kutegherera kumanyangadhekero. ¹⁴ Aye ne ghana kashwagha mukashitiko nokuna kara fumu, ngambi kemo eshi aye ne hamuwana muhepwe mughufumu wendi. ¹⁵ Namonine waheya hayumi awa haparire mukaye; awo ne haparire namurereya oyu mboghemana mudyango dyendi. ¹⁶ Mbadiko ghuhura kwawanu omu hamutura ghakare fumu ene awa mboheya munyima dhendi ne mbadi mboha shamberera mumwendi. Ghushemwa, Eyi nayo ne yapira mudyo noyira watjidha mupepo.