¹ Kuyinu yoyiheya ne pakara thivaka, ruvedhe rokehe thitambo mukaye. ² Ruvedhe rokuyovoroka noruvedhe rokufa; ruvedhe rokutapeka noruvedhe rokudhura eyi hatapeka; ³ Ruvedhe ro kupagha noruvedhe rokwirura; Ruvedhe rokutjora noruvedhe rokutenda: ⁴ Ruvedhe rokudira noruvedhe rokuheka; Ruvedhe romadiro noruvedhe rokukina; ⁵ Ruvedhe rokuharanganya mawe noruvedhe rokughongawedha mawe; Ruvedhe rokundhondhera noruvedhe rokupira kundhondhera. ⁶ Ruvedhe rokuyangura noruvedhe rokuyongaritha; Ruvedhe rokupungura noruvedhe rokumwagha; ⁷ Ruvedhe rokudjadjura noruvedhe rokufuma, ruvedhe rokuporera noruvedhe rokukumburura; ⁸ Ruvedhe rokuhaka noruvedhe rokudhimba; Ruvedhe rondwa noruvedhe rothiraro. ⁹ Yiyeramo munye shogha wanenemo muruwani koyi ghana kuruwana? ¹⁰ Namona yiruwana eyi ghatapa Nyambi kwamunu eshi ghayi ruwane. ¹¹ Nyambi ne gharoyitha yinu yoyiheya yoyiwa paruvedhe rwayo. Ghatura karo moyo ghororuheya mumutjima dhagho, kushwayithako vene ngenyu eshi noyofotji temba oyu ghadimuka yiruwana yaNyambi kutunda kumatangero kate kughuhura. ¹² Nadimuka eshi mbadiko yo hasha kukwagho ngeshi mbadi kushamberera nokutenda ghuwa muyipara yagho. ¹³ Ndani karo eshi ngo kehe munu ne ngogha dye nokunwa nokushamberera maghuwa oyi ghana kuruwana, ayo ne yitapera yaNyambi. ¹⁴ Nadimuka eshi kehe thi ghatenda Nyambi ne mbothina karererapo. Mbadiko yokukona kuwedherera kukwatho nombadiko yokushwayitha kukwatho. Nyambi ne ghayi tenda kemo podiyo eshi munu ghamuyape. ¹⁵ Eyi yidipo ne yakarapo kare no- eyi mboyi karapo ne yakarirepo kare. Na-Nyambi ne kushana eyi yakarirepo kare. ¹⁶ Shime karo, namonine muno mukaye eshi mudyango dyomatetero ndhango, ghuyi ne wakariremo nomudyango dyoghupongoki namo ne mwakarire ghuyi. ¹⁷ Naghambire mumutjima wange, "Nyambi ne mboghana ghatura hahunga nawa yiharuri. Porudi ruvedhe rokehe thitambo nokehe thiruwana." ¹⁸ Naghambire mumutjima wange, "kuhatera ghunu wamwana munu, Nyambi ne kuwayereka podiyo eshi hatjwathane eshi nagho hapitura yira yiyama." ¹⁹ Eyi yina kuhokoka kwamwana munu ne yodiyo yina kuhokoka kuyiyama; Yifa yaghumweya ne yira yifa yaghumweya karo. Yaghushemwa, yoyiheya yakara nomun'u ghofotji; Munu ne mbadi ghapiterera thiyama, yoyiheya yapira mudyo. ²⁰ Yoyiheya kuyenda kudyango dyofotji: Yoyiheya kwashwagha kurukungu noyoyiheya mboyina huka kurukungu. ²¹ Yidye oyu ghadimuka eshi mupepo wamunu ne ghowa yendanga kuwiru ndani ghothiyama ne kuyenda mumuve? ²² Yodiyo, nanongonona eshi nane mbadiko yohasha kwamunu ngeshi mbadi kushamberera yiruwana yendi, oghu ne ghupingwa wendi. Yidye oyu mbogha kamureta karo nogha mone eyi mboyi hokoka munyima dhendi?