¹ Naghambire mumutjima wange, "Wiye nonina kukuyereka noyishamberera; Yodiyo, dyabwane maghuwa ene mone, nayo yi ne yapira mudyo. ² Naghambire kwawa kakuheka hayendhagho, "Ghupuku!" noyishamberera, "Yinu munye yokuwanenamo?" ³ Nafukunyine mumutjima wange eshi ngepi edi shoni kushambererithe nothinda novinyu, oku moni kunga mutjima wange noghunyanyami, nokutjwathana edi ghaghayara muyero, kate nakutjwathane eshi yipi yaroghera kuruwana hana wahanu muno mukaye muyipara yagho pano pakaye. ⁴ Natendire yiruwana yange yikare yikuru, nakutendere nothinda ndhugho nona tendire dipya dyoMandjembere. ⁵ Nona kutendere nothinda dipya dyoyitondo yombuyo nona tapekire mo yitondo yombuyo yokumarudhi-marudhi. ⁶ Nakutendere nothinda thiviya thomeyu, meyu ghokuveteritha yitondo yikure. ⁷ Nawana hapikange hotutughuru noho hambuyama; nonidi nawa pikange hamweya awa haretera mundhugho dhange. Ghushemwa, nidi noghushwi ghowingi, mutanga ghoyimuna nodyoyera kupiterera awa hatungire muJerusalem. ⁸ Shime nakughongawedhera Siliveri noNgorondo, nomaghushwi ghokukukarera ghamweya ghafumu nogho mumikunda. Nawana hembi hotutughuru noho hambuyama noha mbuyama hopambadi, maghuwa ghohana wawanu noyishikitha yokukutjaka-tjaka. ⁹ Yodiyo, natungipire nona karire noghushwi kupiterera waheya awa hatungire muJerusalem, shime karo, ghunyanyami wange ne wakarire nange. ¹⁰ Kehe thi gharumbere meho ghange ne mbadi nathi gha shwenekire. Mbadi nashwenekire mutjima wange kukehe ghano maghuwa. Mutjima wange ne wadjabwanine yiruwana yange yoyiheya nodho ndjambi dhokuyiruwana yange. ¹¹ Ndani ghona kengire kuyiruwana yoyiheya eyi gharuwana nyara dhange no eyi nawanenamo. Yaghushemwa, yoyiheya ne yapira mudyo noyira wakuyereka ghutjidhe mupepo. mbadimo yiyeramo muno mukaye. ¹² Ndani napirukire nithotere ghunyanyami, ghupuku noghuyero. Yinu munye yokukona ghatende munu oyu ghokupingithera mwafumu? ¹³ Ghona tjwathanine eshi ghunyanyami ne wakara nomaghuwa kwawa yero, thika dyodi yakara eshi munyenge ne wapiterera dikokore. ¹⁴ Meho ghamunyanyami ne mumutwi wendi ene muyero ne kuyenda mudikokore. Nadimuka eshi yinu yofotji ne yoya hokokanga kwawanu waheya. ¹⁵ Yodiyo, naghambire mumutjima wange eshi; "Thika dyodi yahokoka kwamuyero, dyoya hokoka nokukwange no pashanye keho nakarera no ghunyanyami ghushokuru?" Ghona ghambire kukwange nothinda eshi, oyi nayo ne yapira mudyo." ¹⁶ Mbadiko mavurukero ghawa nyanyami noghawa yero kuroruheya. Apa yidi eshi yoyiheya yi ne mboyina kapwa kuvurama mumayuwa paghutho norufitho rwamunyanyami ne rwakupitura yira rwamuyero. ¹⁷ Yodiyo, nadhimbire yipara pamurandu eshi yiruwana yoyiheya eyi hatenda muno mukaye ne yaghushatani kukwange, yoyiheya ne mbadiko mudyo, yira wakutjidha mupepo. ¹⁸ Ndani ghona nyathire yiruwana yange yoyiheya no eyi naruwanene muno mukaye, pamurandu eshi mbona yithiyi koyu mbogheya kughutho wange. ¹⁹ No yidye oyu ghadimuka eshi mboghana kara ghunyanyami endi ghuyero? Ene mboghana raghura yoyiheya eyi nawanine nokoyi nakuneyire nothinda eshi nomunyanyami muno mukaye. Eyi nayo ne yapira mudyo. ²⁰ Yodiyo, napirure mutjima wange nona kashire kuyiruwana yange yoyiheya eyi nawanine mukaye. ²¹ Poghadi katughuru oyu ghakara eshi yiruwana yendi ne noghunyanyami, ghudimuki nomanongwahu; Ene ghakona kuthiya ghupingwa wendi kwamunu oyu ghapira kuyiruwanena. Noyi karo ne yapira mudyo noghuyi ghushokuru. ²² Yiyeramo munye ghana wanenamo munu kuyiruwana yendi yoyiheya muno mukaye? ²³ Mayuwa ghendi ghomaheya ne ghotoko-toko nomutjima wendi ne mbadiko maturumuthero. Noyi karo yapira mudyo. ²⁴ Mbadiko yohasha kwamunu ngeshi mbadi kudya nokunwa podiyo eshi mudhimu wendi ne ghudjabwane muyiruwana yendi. Noyi karo, namonine kutunderera munyara dhaNyambi. ²⁵ Yidye ghokukona kudya no yidye ghokukona kuwana yishamberera, kupiterera Me? ²⁶ Nyambi ne ghatapa ghunyanyami, ghudimuki noyishamberera kwamunu ghomuwa kughutho wendi; ene kwawa yiharuri ne Aye ne kutapa yiruwana yokughongawedhera hanu hohawa kughutho waNyambi. Noyi karo ne yapira mudyo noya kara yira watjidha mupepo.