19 ¹ Sima na yango, nayoki lokola mongongo moko monene ya bato ebele penza na likolo, bazali koloba: Aleluyaa! Lobiko, nkembo pe nguya ezali ya Nzambe na biso ² po bikateli na ye ezali ya solo pe ya sembo; po apesi etumbu na mwasi ya ndumba monene oyo azalaki kobebisa mokili na kindumba na ye, pe azongiseli ye mabe po na makila ya basali na yeb. ³ Mbala ya mibale, balobi: Aleluya! Pe milinga na ye emati po na seko na sekoc.» ⁴ Bampaka tuku mibale na minei pe ba-bomoi minei bafukami, pe bakumbameli Nzambe, Oyo afandi na ngwende, balobi: Amen! Aleluya! Eyenga ya libala ya Mwana-mpate ⁵ Pe mongongo moko ebimi uta na ngwende, elobi: Bókumisa Nzambe na biso, bino nyonso basali na ye [pe] baoyo bobangaka ye, bato mike pe bato minene!d. ⁶ Pe nayoki lokola mongongo ya bato ebele penza, lokola lokito ya mai monene, lokola lokito ya kake makasi, bazali koloba: Aleluya! Po Mokonzi Nzambe [na biso], Oyo-ya-nguya-nyonso, afandisi bokonzi na ye. ⁷ Tósepela, tózala na esengo monene pe tópesa ye nkembo po eyenga ya libala ya mwana-mpate ekómi, pe mwasi na ye amibongisie; ⁸ nzela epesameli ye ya kolata bilamba ya petepete ya kongenga ya talo −ya solo, bilamba ya petepete ezali bikateli ya sembo po na basantu. ⁹ Alobi na ngai: «Kòma: “Esengo na baoyo babengami na limpati ya libala ya mwana-mpate!” » Pe alobi na ngai: «Wana ezali maloba ya solo ya Nzambe!» ¹⁰ Pe namibwaki na makolo na ye po na kokumisa ye, kasi alobi na ngai: «Keba! Kosala bongo té, Nazali se moninga na yo ya mosala pe ya bandeko na yo oyo bazali na litatoli ya Yesu. Kumbamela nde Nzambe! Pamba té litatoli ya Yesu ezali nde molimo ya lisakoli. ¹¹ Namoni likolo efungwami, pe tala, mpunda moko ya pembe ezalaki. Oyo amati yango [abengamaka] Moto ya sembo pe Moto ya solo; akataka makambo pe abundaka bitumba na bosembo. ¹² Miso na ye ezalaki [lokola] lolemo ya móto, pe bikoti ya bokonzi mingi ezalaki likolo ya motú na ye; azali na kombo moko ekòmamá, oyo moto moko té ayebi, longola se ye moko. ¹³ Alati elamba moko epoli na makila, pe kombo na ye ezali "Liloba ya Nzambeg." ¹⁴ Basoda [oyo] bazalaka na likoloh bazalaki kolanda ye likolo ya bampunda ya pembe; balati bilamba ya petepete ya pembe ya talo. ¹⁵ Na monoko na ye, mopanga moko ya mino ezalaki kobima, po na yango, áboma bikolo; ye nde moto akokamba bango na lingenda ya ebende, pe akonyata ekamoleli ya vinu ya kongala ya kanda ya Nzambe ya nguya nyonsoi. ¹⁶ Na elamba na ye pe na ebelo na ye azalaki na kombo moko ekòmamá: "Mokonzi ya bakonzi pe Nkolo ya bankolo." ¹⁷ Pe namoni anzelu moko atelemi na kati ya moi pe abeleli [na] mongongo makasi bandeke nyonso oyo epumbwaka na likolo penza: «Bóya kosangana na limpati monene ya Nzambe, ¹⁸ po bólia misuni ya bakonzi, misuni ya bakonzi ya basoda, misuni ya bilombe, misuni ya bampunda pe ya baoyo bamataka yango, misuni ya bato nyonso, ya bansomi ná ya baumbu, ya bato mike pe ya bato minenek.» ¹⁹ Pe namoni Nyama, bakonzi ya mokili ná basoda na bango basangani po na kobunda ná oyo afandaka likolo ya mpunda ná basoda na ye. ²⁰ Nyama ekangami, elongo na profete ya lokuta oyo azalaki kosala, na miso na yango, bilembo oyo ekosaki na yango baoyo bazwaki elembo ya Nyama pe bakumbamelaka elili na yango. Bango mibale babwakami, bazali na bomoi, na laki ya móto oyo epelisami na fofólo. ²¹ Bamosusu babomami na mopanga ya oyo afandaka likolo ya mpunda, oyo ebimaka na monoko na ye; pe bandeke nyonso etondi misuni na bango.