20 ¹ Pe namoni anzelu moko azali kokita uta na likolo, azali na fungola ya libulu ezangá suka ná monyololo moko monene na loboko na ye. ² Akangi Dragon, nyoka ya kala, oyo ezali Zabolo pe Satana, pe akangi yango na minyololo mbula nkoto mokoa. ³ Abwaki yango na libulu ezangá suka pe akangi, pe atie elembo likolo na yango, po ékosa bikolo lisusu té tii mbula nkoto moko ékoka. Sima na yango, esengeli éfungolama po na mwa-tango moke. ⁴ Namoni bangwende, pe baoyo bafandi na yango, bokonzi ya kosambisa epesameli bango; pe milimo ya baoyo bakatamá mitú po na litatoli ya Yesu pe po na Liloba ya Nzambe, pe baoyo bakumbamelaki Nyama té, elili na yango pe té, pe bazwaki elembo na elongi to na loboko na bango té. Bazongi na bomoi pe bayangeli elongo na Kristo mbula nkoto mokob. ⁵ Bakufi mosusu bazongi na bomoi té, tii mbula nkoto moko ékoka. Oyo ezali nsekwa ya liboso. ⁶ Oyo akozala na nsekwa ya liboso azali moto ya esengo pe mosantu. Liwa ya mibale ekozala na bokonzi likolo na bango té; kasi bakozala banganga-Nzambe ya Nzambe pe ya Kristo pe bakoyangela elongo na ye mbula nkoto moko [yango]. ⁷ Tango mbula nkoto moko ekokoka, Satana akobimisama na boloko na ye, ⁸ pe akokende kokosa bikolo na bipai minei ya mokili, Gog pe Magogc −oyo motango na yango ezali lokola zelo ya mbu−, pe kosangisa yango po na etumba. ⁹ Bapanzani na etando ya mokili pe bazingi nganda ya basantu pe engumba ya bolingo; kasi móto moko ekiti uta na likolo pe esilisi bangod. ¹⁰ Pe zabolo, mokosi na bango, abwakami na laki ya móto pe ya fofólo, esika Nyama pe profete ya lokuta bazali, pe bakoyokisama pasi butu moi, po na seko na seko. ¹¹ Pe namoni ngwende moko monene ya pembe pe oyo afandi na yango, oyo mokili ná likolo ekimi elongi na ye pe esika yango eleki emonani té. ¹² Pe namoni bato bakufá, bato ya minene pe ya mike, batelemi liboso ya ngwende. Babuku efungwami; pe buku mosusu efungwami, oyo ezali ya bomoi. Pe bakufi basambisami, kolanda oyo ekòmamá na babuku yango, engebene na misala na bangoe. ¹³ Mbu ezongisi bakufi oyo bazalaki na kati na yango, liwa pe mokili ya bakufi ezongisi bakufi oyo bazalaki epai na yango; pe moko moko asambisami engebene na misala na ye. ¹⁴ Liwa pe mokili ya bakufi ebwakami na laki ya móto. Oyo ezali liwa ya mibale: laki ya móto. ¹⁵ Pe oyo akòmamá na buku ya bomoi té, abwakami na laki ya móto.