¹ Ndikuwuzani chadidi chakirisitu. Ndili kulewa lini gunkha mukutsogolelewa namzimu waMulungu mtima wangu ukundiwuza kuti ndili kulewa lini gunka. ² Ndichadidi kuti ndina kulila kukulu pomwe ndilikubva mtima kuwawa padzulu pawanthu wadzina langu. ³ Ndifukuna kwangu kuti ine pachangu nditembelele nakuyikha pambali Kristu nakufuna kwaimwe abale. Abale wangu panyama. ⁴ Wale maIzirairi. Ndiwanthu adasankuliwa waMulungu adayita wana wake ndiye adawonesa ulemelelo wake adayita naiwo bzvipangano ndiye adaapasa mtemo adaphembedza Mulungu nanjila kwayo adatambila bzvaadalumbiliwa naMulungu. ⁵ Ndimakholo yaKristu yadachokela munyama -iye ndiye Mulungu wawentse ngalemekezewe kusingamale. Amen. ⁶ Bvzilibe kuyita ngati mafala yaMulungu yadayamba. Pakuti amusi mwentse maIzilaili wachadidi anikhala muIzilaili. ⁷ Kuti wentse mibadwe yaAbhurahamu ndiwana wake wentse basi, ''kubulikiza naIsaka ndimo muchemelewa badwe zake.'' ⁸ Nakufuna kwabzvimwebzvo wana wapanyama ahasi waMulungu. Wana wakutsimikiziwa adawelengelewa abadwe wake. ⁹ Pakuti aya ndiwo mafala yakutsimikiza: ''Panthawi ino ndichabwela, namwana mulumbwana achabadwa naSara.'' ¹⁰ Nee kuwa ibzvi Rabheka adayita pathupi namwamuna mubodzi, payi wanthu Isaka- ¹¹ Pakuti wana akhalibe kubadwa nakuphata chabwino nachakuyipa pakuti chinangwa chaMulungu chikhale chakuwoneka nakufuna kwake, nee nakufuna kwamayitidwe, nakufuna kwakuchemela kwake- ¹² Bzvidalewedwa kwaiye, ''Mkulu azathandiza mun'ono.'' ¹³ bzvidayitiwa bzvikhadanembewa, ''Jakobho ndamukonda koma Isawu ndamuzonda.'' ¹⁴ Tizati tani pamwepa? Pana kulungamisiwa naMulungu? bzviniyita lini. ¹⁵ Adati kwaMozisi, ''Ndichabvela nstisi kwaiwo wanditi ndibvele nstsisi ndichiyitila chifundo kwaiwo wandiniyitila chifundo.'' ¹⁶ Koma bzviniyita lini nakufuna kwawo pomwe naawo nakufuna kwaMulungu bzvinilatiza ntsisi. ¹⁷ Manembo yaniti kwaFarawo, ''Nachifukwa ichi ndidakukuza iwe kuti ndikulatize mphamvu yangu mwaiwe pakuti dzina langu lidzimiwe pansi pontse.'' ¹⁸ Pakuti Mulungu ambvela chifundo kwaawo anifuna nakumufuna aniwapasa mukukutu. ¹⁹ Muzati kwaine, ''Tina ndawa yanyi? kwawo alibe kumilila pachake?'' ²⁰ Iwe munthu ndiwe yani unidayila Mulungu? ko tingati kuna nyakuwumba , ''udachiwumba tani tenepa? ²¹ ko nyakuwumba alibe mphamvu pachiwumbe, kuyita ibzvo bzvaanifuna padhaka libodzi kuwumba chaanikuza nachaasaya kukuza? ²² Bzvingatani kuti Mulunguabvumile kulatiza kuwawa kwake kuti alatizembo mphamvu kudziwa kuti akayita namtima utali nakuwawa kwaibzvo bzvidakonzelewa kuwonengewa? Tani akayita ibzvi kuti adziwakane. ²³ Ndiye akhafuna pomwe kuwonesa kudala kwandemela yake, iyo idatululiwa kwaifepo waadawonesa ntsisi zake awo adakonzekela kutambila ndemela yake. ²⁴ Pakuti ndife awo wadachemela asili adachokela kwaaJudha wokha koma kuwanthumbo asili achiJudha. ²⁵ Adati kuna Hosiya. ''Ndizachemela wanthu asili wanthu wangu naanchikondi alibe kukondewa. ²⁶ Bvzichayita ngati ndidalewa kwawo koma amusi wanthu wangu pamwepo azachemelewa wana waMulungu waumoyo. ²⁷ Izaya adalila padzulu paIzilayeli, ''Nee bzvabzvo wana wachilumbwana wachiIzilayeli adawanda ninga muchenga wapanyanja koma angon'no-ngo'no wawo ndiwo azapulumusiwa; ²⁸ Pakuti Mulungu anizatonga ali padziko wentse. ²⁹ Ninga kulewa kudayita Izaya kuti, Dai Mulungu wamphamvu zentse alibe kutisiyila bzvizukulu ninga takhala ninga Sodom kana Gomola.'' ³⁰ Tiniti chiyani manje? wakunja pomwe akatinyangana kulungamisiwa kuzhula kulungama kwakulungamisiwa nachikulupililo. ³¹ Pomwe izilaili idaphatila pamulawu wakulungama udatazisa kufika pamulawo. ³² Ndawayanyi alibe kudumba pachikulupililo koma adadumba nabzvaakayita. Nakutenepo iwo akhagunkunthiwa namwala unigunkhuntha wanthu. ³³ Ule udalewedwa namanembo kuti: ''Nyanganani ndiniyikha mwala muZiyoni uyo uniyitisa wanthu kuti agunkhunthiwe uniwayitisa kuti agwe koma umweyo anikhulupilila mwaiye anizamukalipisa lini.