¹ Tiniti tani naAbrahamu, Baba wathu wapanyama, ndichani chaadachita? ² Ninga iye Abrahamu adalungamisiwa pamaso paMulungu nathangwe labzvaadachita, anga dai anachakudumba nacho. koma angadumbe lini pamaso paMulungu. ³ Ninga kunembewa kwabzvidachitiwa mumanembo, yaniti, ''Abrahamu adakhulupilila Mulungu ndiye chikhulupilio chake, Mulungu adamuwona kuwa wakulungama. ⁴ uyo aniphata basa, wake unidailiwa ngati bzvipo ibzvo adapasiwa kunaiye. koma mamuna aniseyenza anipagaliwa chaaninga aseenzela. ⁵ koma mamuna anachikhulupililo, uyo anikhulupilila mwaMulungu uyo aniti kumunthu ana mulandu, ulibe mulandu, ndimabasa yake lini ayo yaninyanganiwa naMulungu kuti amulungamise pamaso pake, koma chikhulupililo chake. ⁶ Dhavheti adachemelewa mamuna wamadaliso, uyo Mulungu adawona kulungama kwake palibe machitidwe. ⁷ Adati '' Madaliso kuna awo wakusaya mtemo adalekelela, nakuyipa kwawo kudakhululukiliwa ⁸ Wakudalitsiwa ndiye mamuna ule bzvakuyipa bzvake bzvinizakumbukiwa lini pomwe naMpfumu. ⁹ Ndibzvolini kuti madalitso yamweya yanipasiwa kuna wale wakugwatiwa ntsonga yaumuna, chadidi nee, kana kuti njaa awo alibe kugwatiwa ntsonga yaumuna bzvingatenepo? pakuti tinapo padanembewa mumanembo paniti, ''Abrahamu adakhulupilila Mulungu, ndiye thangwe lachikhulupililo chake Mulungu adamuwona kuwa wakulungama.'' ¹⁰ koma ibzvi bzvidayitika lini, akanati agwatiwa ntsonga yaumuna kana kuti atogwatiwa ntsonga yaumuna, koma akanati agwatiwa! ¹¹ Adazagwatiwa pambuyo pacho, ndiye kugwatiwa kwake kudakhala chilatidzo chakuwonesa kuti thangwe lachikhulupilo chake, Mulungu adatambila kuwa wakulungama, iye akanati agwatiwa, saka Abrahamu ndi Payi wa awo wentse alibe kukhulupilila mwa Mulungu ndiye anitambila kuwa wakulungama pamaso pake, kana bzvawo alibe kugwatiwa ntsonga yaumuna. ¹² Ndi Apayi wawalembo alibe kugwatiwa ntsonga yaumuna, lisili thangwe lakuti adagwatiwa, koma nathangwe lakuti anilalama umoyo wachikhulupililo kudayita Apayi wathu Abrahamu, akanati agwatiwa. ¹³ Mulungu adawuza kuti Abrahamu nambadwe wake kuti azakhala nanthaka yakuwa anichilo wadziko, chipangano ichi chidayitiwa lisili thangwe lakuti Abrahamu adayita bzvikafuniwa namtemo, ¹⁴ koma thangwe lakuti adakhulupilila ndiye adawonewa naMulungu kuti adalungama. ¹⁵ Nakuti mulawo ubwelesa kuwawa, apo palibe mulawo palibe nyakutaza. ¹⁶ Nakufuna kwaibzvi chikulupililo, chilewedwe chikhale pachifundo nakugogomezewa kwaAbrahamu namibadwe yentse, kuti awo ali pantsi pamulawo, naawo anthawila chikhulupililo chaAbrahamu. Ndiye payi waise tenste, ¹⁷ ninga kunembewa kwabzvidachitiwa ''Ndidakuita payi wamadzinza yentse.'' Saka chipangano chake china mphamvu, iye Mulungu adakhulupililiwa naAbrahamu ule anilamusa wakufa kuwumoyo ndiye nafala lake aniyita kuti bzvikanati bzvawapo bzviwepo. ¹⁸ Muchinyanganilo adakhulupilila muchinanganilo kuti akhale payi wamadzinza mazinji bzvichiyendelane nabzvimwebzvo bzvadawuziwa. ''kuti wachibadwe wake azayita tani.'' ¹⁹ Palibe kuneta muchikhulupililo adayita tupi lake ngati wakufa, (pakuti akhali namakholo dzana yakukhalamba) nakusabala kwamimba yaSara. ²⁰ Nakulewa kwaMulungu Abrahamu alibe kuzungulila mukhusaya chikhulupililo. Chikhulupililo chake chidamudzadza namphamvu ndiye adapeleka kuthokoza Mulungu. ²¹ Akhali nachadidi chaMulungu anikwanisa kuyita bzvaadalewa. ²² Pakuti bzvikhali kuti bzvidawelengewa kwaali wakulungama. ²³ Koma mafala yakuti, ''adawonewa naMulungu kuwa wakulungama'' yalibe kunembelewa nakufuna kwayiye yekha. ²⁴ Yadanembelewa ifepo pomwe awo tilikhuzatambiliwa ninga adalungama, tini khulupilila mwauyo adalamusiwa Yesu Mpfumu yathu kuchokela kuimpfa. ²⁵ Ndiye mbodzi yekha adapasiliwa kuti afe thangwe labzvitadzo bzvathu ndiye adalamusiwa kuwumoyo tikhale wakulungama pamaso paMulungu.