¹ Pamwepo palibe chakubzvipembedza nabzvo, iwe munthu umbatonga, bzvamunitonga nabzvo anango mumbabzvipasa mulandu pachanu. Ndawa imwe munitonga muniita bzvidafanana. ² Tinidziwa kuti Mulungu utongi wake ndiwachadidi ninga achitonga wanthu achita bzvimwebzvi. ³ Koma nyanganisisani ibzvi, iwepo uniyita bzvimwebzvi bzvawuntonga nabzvo anango, ko ufunga kuti kutonga kwaMulungu kungakuphonye? ⁴ Kana kuti ulikupepusa kukoma mtima, kubzviphata mtima kwake, nakupiiyilila kwake? ko ulikubzvidziwalini kuti Mulungu akukuyitisa ntsisi tangwe lakuti afuna kuti iwepo usiye bzvakuyipa bzvako? ⁵ bzvakuwumisa mtima, nakusaya kutembenuka kwamtima, bzviniyita kuti tikasangane nabzvakuwuma muntsiku zizabwela zakutonga kwake kwaukali, ntsiku lakuwonewa kwabzvabwino bzvaMulungu bzvautongi wake. ⁶ Anzachitila wentse munthu bzvaadachitambo: ⁷ Kuna awo adachita bzvabwino, kulimbikila mukuyita bzvabwino bzvakuchena, nakulemekezeka, athukuziwa, kusaya kutambila chakuseli pamilandu, azapasiwa umoyo usinga male. ⁸ Koma awo anipswaga bzvawo wokha, anilekelela chilungamo achiyita bzvakuyipa, ukhali , pomwe naukhali udayipisisa bzvinizagwela padzulu pawo. ⁹ Mulungu azabwelesa kuwawa nakushupika mumoyo mwamunthu anichita bzvakuyipa, kuyamba maJudha pomwe namaGiliki. ¹⁰ Koma wanthu wentse wale aniyita bzvabwino, Mulungu anizawayitila kuti athukuziwe, alemekezewe, pomwe akhale namutendele kutatika kuwaJudha teeyele kuwaGiliki. ¹¹ Pakuti palibe kusankhulana kuna Mulungu. ¹² Nakuti azinji adataza palibe mulawo, azawonongewa palibe mulawo, amwewo azinji adataza achiteela mulawo azatongewa namulawo. ¹³ Pakuti haasi wentse anitetekela mulawo adalungama patsogolo paMulungu, koma anichita mulawo anizapulumusiwa. ¹⁴ Nawakunja, awo alibe mulawo, anamulawo paali nakufuna kwakubadwa, nakutenepo ndimulawo paali nebzvabzvene alibe mulawo. ¹⁵ Bzvaaniyita bzviniwonesa kuti mtemo udanembewa mutima mwawo. mitima yawo inibzvipikisa lini, iniwonesa kuti ndichadidi. Pakuti panthawe zinango mifungo yawo inibvumilana nabzvaaninge achichita ndiye panthawe zinango inipikisan nawo. Nakutenepo nakufuna kwanaFala Yabwino yandinilalikila , ¹⁶ ibzvi ndibzvo bzvinizayitika pantsiku pamwepo Mulungu anizatonga mifungo idabisika yawanthu kuchokela mwaYesu Kristu. ¹⁷ Tsapano iwepo unibzvichemela muJudha uniphatilila pamutemo, uchidumba naMulungu, ¹⁸ unidziwa bzvimwebzvo Mulungu anifuna kuti uchite, ndiye udafunda kuchokela kumutemo kusankula chaicho chinifuniwa; ¹⁹ Unachadidi kuti ndiwe mtsogoleli waazimola, chiyedza chawale ali m'dima, ²⁰ Nyakufundisa wabzvitsilu na nyakufundisa waang'no, pakuti unidziwa kuti mumtemo munakudziwa pomwe nakudzala kwentse kwakudziwa nachadid, ibzvi bzvingawononge tani makhalidwe yawumoyo wako? ²¹ Unifundisa anango ndawayanyi usinga bzvifundisembo? unifundisa kuti musabe, iwe uchimbaba? ²² Pomwe uchimbati musachite upombo, iwepo uchimba chita upombo? Ulikulewa bzvakuyipa padzulu pakupembedza bzvimifananidzo, koma ulikuba mkati mwanyumba yabzvipedzo. ²³ Unidumba kuti unamtemo, ulikunyazisa Mulungu pakutyola mtemo. ²⁴ Pakuti, thangwe lanu imwepo dzina laMulungu lilikunyozedwa naasili achiJudha pakati pawanthu anidziwa Mulungu,''ninga kunembewa kwabzvidachitiwa. ²⁵ Kana ukayita bzvinifuniwa namtemo, kugwatiwa kwantsonga yaumuna kwako kunikhala nabasa, koma kana ukaleka kuyita bzvinifuniwa namtemo, ²⁶ bzvidandofanana namunthu alibe kugwatiwa ntsonga yaumuna. ko kana uyo asili muJudha, ule alibe kugwatiwa ntsonga yaumuna akayita bzvinifuniwa namtemo, ko Mulungu animuwona lini ninga munthu adagwatiwa ntsonga yaumuna? ²⁷ Nakutenepo iwepo muJudha unizatongewa na asili muJudha, pakuti unityola mtemo, nee bzvako una mtemo udanembewa pomwe udagwatiwa ntsonga yaumuna, pakuti wachola mtemo! ²⁸ Kugwatiwa nantsonga yaumuna kuniyitisa lini kuti munthu akhale muJudha chaiye, munthu ndimuJudha lini nakufuna kwakugwatiwa ntsonga yawumuna. ²⁹ Zhayi muJudha chayiye ndimunthu uyo alimuJudha chaiye pamtima wake. kugwatiwa kuniyitiwa naMzimu waMulungu, kusili kule kunilewedwa namtemo, udachita bzvakunembewa. Munthu umweyo anithukuziwa lini nawanthu koma naMulungu.