¹ Ife tidalimba tinifuna kulimbisa awo adaneta, koma tileke kubzvikuza pachathu. ² Ife pachathu tisamalile watinikhala nawo kuti tiwalimbise. ³ Pakuti Kristu alibe kulalama bzvinimukondwelesa iye pachake. Zhayi bzvidanembewa bzviniti, ''Bzvitutsi bzvidachoka mumulomo mwawo adakutukwanani, bzvidatukwana inepo.'' ⁴ Bzventse bzvidanembewa mumanembo, bzvidanembewa kuti bzvitifundise ifepo, kuti tikhale nakunyanganila kuchokela mumtima utali pomwe nakulimba mtima kwatinipasiwa namanembo. ⁵ Ndinipemphela kwaMulungu uyo aniyitisa kuti tikhale natima utali nakuti tikhale nakulimba kuti muwe namtima ubodzi kuchokela muna Kristu Yesu. ⁶ kuti mwentse imwepo, nafala libodzi muthukuze Mulungu naApayi mwaMpfumu yathu Yesu Kristu. ⁷ Nakutenepo tambilanani tsapano, ninga kutambilana kwamudayitiwa naKristu kuti wanthu athukuze Mulungu. ⁸ Pakuti ndikuuzani kuti Kristu adakhala kapolo pakugwatiwa ntsonga yaumuna bzvichiwonesa kukhulupilika kwaMulungu, kuti chipangano chaMulungu chikhale chachadidi kumakholo, ⁹ nakukwanisa pomwe wanthu asili aJudha kuti athukuze Mulungu thangwe la ntsisi. Ninga kunembewa kwabzvidayitiwa, ''Ndizakuthukuzani pakati pawanthu asili achiJudha, ndinizakuthukuzani nakukuyimbilani mudzina lanu.'' ¹⁰ pomwe bzvinilewewa kuti, ''Kondwani, imwepo wanthu asi wachiJudha nawanthu adasankhuliwa.'' ¹¹ pomwe, ''Thukuzani Chawuta imwepo mwentse asili wachiJudha wanthu wentse muthukuzeni iye.'' ¹² Pomwe Izaya adati, ''Pamuzu waJesse, anizabwela , mbodzi anizabwela achizatonga naasili wachiJudha; kuchoka mwaiyi wale asili achiJudha azawa nachikhulupililo mwayiye.'' ¹³ Ninga Mulungu wachikhulupililo chanu, kuti akudzadzeni nachikondi namtendele kuchokela muchikhulupililo chanu mwayiye, kuti kuyanganila kwanu kulambe kuchikula namphambvu yaMzimu wakulungama. ¹⁴ Abale wangu, inepo ndichadidi chakuti ndimwe wabwino chaibzvo, pomwe kuti munandzele zabwino mkati mwanu, pomwe nakutikwanisa kulimbisana pakati panu. ¹⁵ Koma mubhilifi limweli ndanemba ndisingatsembeleke padzulu pabzvinthu bzvandakukukumbusani pomwe, ndikapita lini napambali nathangwe lachisomo chimwecho chandidapasiwa naMulungu. ¹⁶ Mphaso imweyi ndiyakuti ndikale kapolo waKristu Yesu adatumiwa kuna wale asili achiJudha, ndichiseeyenza ninga Nyantsembe kulalikila Mafala yaMulungu, kuyitila kuti ntsembe yawale asili achiJudha zizatambiliwe, chichilungamisiwa naMzimu waKulungama. ¹⁷ Mwa Kristu Yesu ndinabzvo bzvakubzvikuza kuphatila Mulungu. ¹⁸ Ndinitsembeleka lini ndinzangolewa bzvimwebzvo bzvidayitiwa nakristu, kuchoka mwainepo kuti nditsogolele wanthu asili achiJudha mukutetekela Mulungu. adayita bzvimwebzvi kuchokela mumafala nabzvaadayita, ¹⁹ namphambvu yabzvidawonesewa na nabzvidabwiso, nakufuna kwamphambvu yaMuzimu waKulungama. Saka mukufamba kwentse ukukufikila ku Elirikamu, ndalalikila bzvidalimba mafala yabwino yaKristu. Chinthu chibodzi chandinitsungilila nchakulalikila mafala yabwino yakristu. ²⁰ Munjila imweyi, ndinifuna kulalikila Fala laMulungu, kufika kuna wale anati ambca nabzvaKristu kuti ndisamange, padzulu pabzvinthu bzvidamangiwa namunango, ²¹ ninga kunembewa kwabzvidayitiwa kuti, ''Awo libe kuwuziwa nabzvake anizawona, ndiye awo alibe kubva anizambvesesa.'' ²² Ndiye saka bzvidandikanganisa kadawanda kuti ndibwele kwaimwepo. ²³ koma kuti tsapano ndamala basa langu mumphimpha yino pakuti ndidamala kwabzvaka bzvidawanda kuti ndibwelele ndizakuwoneni, ²⁴ Ndina chiyanganilo chakukuwonani pandidazhula nakumweko paulendo wangu waSpeini, nakuzathandiziwa naimwepo kutindiyende kumweko, pambuto yakukondwa pakukuzungilani kwachinthawe. ²⁵ Panthawe ino ndilikuyenda kuJelusalemu, kukapasa wanthu waMulungu wakulungama mphaso . ²⁶ Pakuti Mpingo wakuMekedoniya naAkaya adakondwa kuti apasa chipo kuti athandize amphayi pakati pawanthu waMulungu muJelusalema. ²⁷ Indebvee, kukumbuka kumweku kukhali kwawo iwo wokha, mukilewa chadidi anifanila kuthandiza mphayi amwewo. Pakuti Judha adagawana nawanthu asili wachiJudha madaliso yawo yaMzimu, wanthu asili wachiJudha anifanila kuthandiza panyama. ²⁸ nakutenepo, kana ndamala basa limweli ndiye ndapeleka mphaso yentse yaadawunganiniziliwa, ndinizatatika ulendo wakuSpaini, ²⁹ Ndiye ndinizakuzungilani pandininge ndichiyenda kumweko. pandinizabwela kwaimwepo, ndinidziwa kuti ndinizabwela namadalitso yadadzala yaKristu. ³⁰ Ndinifuna kukulimbisani abale wangu, kuchokela mwaMpfumu Yesu Kristu nachikondi chatinipasiwa naMzimu, phatanani nainepo mumapemphelo. ³¹ Pemphelani kuti Mulungu andibhasepe bwino mumanja mwaawo asingakhulupilile wamuJudeya. pemphelani pomwe kuti wanthu waMulungu ali muJelusalemu akondwe pakuwathandiza kwandizayita. ³² Pemphelani kuti ndizabwelele nakukwanu ndichikondwa kana nakufuna kwaMulungu, ndiye ndinizakondwa nakupuma thangwe lakukuzungilani. ³³ Mulungu umweyo anipeleka mtendele , akhale naimwepo.Ameni.