¹ Tambilani umweyo ana utofu pachikhulupililo, koma muchachitisane naye makani pabzvinthu bzvaaninga achikumbuka. ² Munngo munthu anachikhulupililo chakudya bzventse, koma munango analibe kulimba andodya muliwa wamasamba basi. ³ Umweyo ambadya bzventse aleke kunyoza ule asingadye bzventse; apo uyo munthu anidya muliwo wamasamba anifanila lini kulewa kuna uyo anidya bzventse kuti alikutaza, pakuti Mulungu animubvumila tenepo. ⁴ Ndiwe mbani iwepo unitonga kapolo wamunango munthu? ndiTenzi wake anilewa kuti adziwa kana kuti adzonga. Mbani azamulamusa pomwe, pakuti Mpfumu ndiye anzamulamusa pomwe. ⁵ Munango munthu anikumbukakuti tsiku yinango idakosha kuzhula yinango, nayinango mbali munango achimbati ntsiku zentse zidayenzana. Munango namunango ngadziwe kuti bzvaalikuyita ndibzvo bzvinifanila kuchitika. ⁶ Munthu anibhasopa ntsiku, aniyitila kulemekeza Mulungu; umweyo ambadya, anidyela Mulungu, pakuti ambapeleka zikomo kwaMulungu. Umweyo asingadye, amababzvinyimila Mulungu; amabapeleka zikomo pomwe kwaMulungu. ⁷ Palibe ababzvilalamila pake yekha, pomwe palibe anibzvifela pachake yekha. ⁸ Patilikulalama tinilalamila Chawuta, nakutenepo patinimwalila tinimwalilila Chawuta nee tikakhala wamoyo newakumwalila koma ndife waChawuta basi. ⁹ nachifukwa chimwechi Kristu adamwalila adalamuka nkulalama pomwe, pakuti ndiChawuta wamphambvu wawentse waadefutu nawa amwewo alikulalama. ¹⁰ Koma imwe , ndawayanyi muchitonga abale wanu? imwe ndawayanyi muniyanganila abale wanu pantsi? pakuti tentse ifepo tinizamila patsogolo paMulungu kuti atiyeluze iye. ¹¹ Ngati kunembewa kwabzvidachitiwa, ''chelo ndichilalama,'' Chawuta anitenepo, ''kwayinepo mabondo yentse yazagwadama patsogolo pangu, ndiye mishoo yamalilimi yawanthu yentse yanzapeleka umboni kuti ndine Chawuta.'' ¹² Manje munango namunango anizalongosola bzventse bzvaadachita yekha kwaChawuta. ¹³ Zhayi ngatileke kutonga munango munthu, usayite chelo chinthu chiniyitisa kuti mwanzako akanganisike nacho, kana kuti apite muchakuyipa, ¹⁴ Ndimbadziwa nakudzwisisa kuti palibe chinthu chinipswipa nakufuna kwachene chokha, koma munthu akafunga kuti chilibe kuchena, kuna iye chilibe kuchena. ¹⁵ Kana ukakanganisa mbale wako nathangwe labzvinthu bzvawunidya, bzviniwonesa kuti ukufamba lini muchikondi. usalekelele bzvawunidya bzvichiwononga munthu yu adafelewa naKristu. ¹⁶ Usayitisa anango wanthu alewe bzvakuyipa padzulu pabzvinthu bzvawunikumbuka kuti bzvabwino. ¹⁷ Pakuti Umambo waMulungu ndikhani lini yakudya kana kumwa, koma kulungama, mtendele, pomwe nakukondwa kunichokela kwaMzimu wakulungama. ¹⁸ Umweyo aniseenzela Kristu munjila imweyi anikondwelesa Mulungu ndiye wanthu anilewa bzvabwino padzulu pake. ¹⁹ Saka tsapano tinifuna kulimbikila nthawe zentse kuyita bzvinthu bzvimwebzvo bzvinibwelesa ntendele, nabzvinithandiza kulimbisana kuna munango namunango. ²⁰ Tisawononge basa laMulungu nathangwe lachakudyaBzventse bzvinthu bzvakuchena, koma nkutaza kuti munthu udye bzvinikanganaisa mwanzako. ²¹ Nchabwino kuti usadye nyama kana kumwa bwadwa kana kuyita bzvimwebzvo bzviniyita kuti mbale wako ataze. ²² Bzvaunikhulupilila padzulu pabzvinthu bzvimwebzvi ndibzvako iwepo naMulungu. Munthu anakukondwa chaiko kana asingabzvipase mulandupamwepo paaniyita bzvinthu bzvaanifunga kuti bzvakulungama. ²³ Koma kana achikayikila padzulu pabzvinthu bzvaanidya, Mulungu animupasa mulandu pamwepo paanenge achidya. Ndiye chentse chiniyitiwa mwakusaya kukhulupilila ndichakutaza.