¹ Munthu wentse anifanila kulemekeza awo wentse alipamipando yapadzulu-dzulu, pakuti palibe boma lingalalame kana lilibe kukhazikisiwa naMulungu. Ndiye alikulamulilawo adakhazikisiwa naMulungu. ² Nakutenepo umweyo anipikisana naboma lilikulamulilayo anipikisa bzvidakhazikisiwa naMulungu; Umweyo anibzviyita alikubzviyitisa kuti atongewe yekha. ³ Pakuti alamulili anifanila lini kuti agopewe naawo aniyita bzvabwino, koma naawo anichita bzvakuyipa. koma unifana kuti usagope uyo alikutonga? koma ita bzvabwino, ndiye akuthukuza. ⁴ Pakuti ndimulanda waMulungu alikuseenza kuti bzvikomele iwepo. koma ukachita bzvakuyipa, mugope, pakuti anikwanisa kukulanga, ndiye anagatakulile lini spada palibe , pakuti ndikapolo waMulungu pakuti animila pambuto yaMulungu pakuyitisa awo aniyita bzvakuyipa kuti ashupike kwene-kwene. ⁵ Thangwe labzvimwebzvi unifanila kutetekela awo alikulamulila nee nathangwe laukali waMulungu wokha, komambo nathangwe lakuwa namtima usingabzvipikise. ⁶ Ndiye muchipagalimbo msonkho, pakuti awo alikulamulila alikuseenzela Mulungu kana achidzadzikisa mabasa yawo. ⁷ Tsapano pagalani mshoo yentse yamsoko: ifuniwa kuti ipagaliwe, apagaleni bzvinthu bzvanu bzventse, ndiye alemekezeni nakuwalemekeza wentse. ⁸ Khalani mulibe magawa, khali namangawa yachikondi pakati panu, ndawa uyo wakonda mwanzake wachita chinthu chabwino wadzadzikisa bzvinilewdwa namulawo. ⁹ Milawo initi, leka kuchita upombo, leka kupha, leka kuba, nee kaso,'' Imweyi naminango idaphatanidziwa yentse pamulawo ubodzi, ''Konda mwanzako ninga kubzvikonda kwawunbzviita imwepo wekha.'' ¹⁰ Umweyo anikonda mwanzake animuyitila lini chakuyipa, nakutenepo chikondi chinidzadzisa mulawo wentse. ¹¹ Munifanila kuyita bzvimwebzvi pakuti mulikudziwa kuti nthawe yafika yakuti tibanganuke kuchoka kutulo. Pakuti nthawe yakuti tipulumusiwe yafika pafupi kukunda patidathoma kutembenuka. ¹² Usiku ulipafupi kumala, masikati yawapafupi, lekani tiyikhe pambali machitidwe yammdima, ngatibvaleni bzvakubvala bzvombo bzvachiyedza. ¹³ Tichiteni mfambilo wabwino, ngati masikati, nee kuwa mumafeshita yauwundedzeli, kana undedzeli; tileke kufamba munjila zaupombo,nee kuwa nakaso kakupitiliza, tibzvisamalile tikeke kuwa namakani kana kuwa nantsanje. ¹⁴ Tibvale Mpfumu Yesu Kristu, tileke kuyita bvakuyipa bzvinifuna makhalidwe yakuyipa yakubelekewa nayo.