¹ Tsapano , abale wangu, tangwe lantsisi zikulu zaMulungu kwaifepo, ndikukumbilani namtima wangu kuti, bzvipasileni kwaMulungu ninga ntsembe inilalama idabzvipasila kubasa lake pomwe inimukondwelesa. ² Siyani bzviniyita wanthu wamudziko lino, koma siyani Mulungu akuphinduleni mukati mwanu pakukupasani nkumbukila zinyowani. Tsapano muzakwanisa kudziwa kubzvinifuna Mulungu, ibzvo bzvili bzvabwino, bzvinimukondwelesa nabzvakukwana mubzvinthu bzventse. ³ Nachifundo chaMulungu chandidapasiwa inepo, ndiniti kwaimwepo mwentse: musakumbuke pachanu kuzhula bzvamunkumbuka, kumbukani nakubzvibweeza kuti kuna kuyeluziwa, bzvisanduleni nakusandula nzelu zanu. chitani ibzvi bzvichiyendelana nachikhulupililo chamudapasiwa naMulungu. ⁴ Tina bzvidzo bzvizinji pathupi pathu, bzvidzo bzvimwedzo bzviniyita lini basa libodzi, ⁵ Munjila ibodzi-bodziyo, kana bzvabzvo tidawanda, tili thupi libodzi mukuphatana naKristu, ndiye tidaphatanidziwa kuna munango namunango ninga bzvidzo bzvakusiya-siyana bzvathupi. ⁶ Saka tinifanila kuseyenzesa bzvipo bzvathu bzvakusiya-siyana bzvaatipasa Mulungu kuchoka mukukoma mtima kwake. ⁷ Kana chipo chathu ndichakulalikila mafala yanichoka kwaMulungu, tinifanila kulalikila mukukhulupilila kwatili nako. Kana kuli kuphata basa, tinifanila kuphata basa, kana kuli kufundisa tinifanila kufundisa. ⁸ kana kulikulimbisa anango, tinifanila kutenepo, umweyo anigawana naanango anifanila kubzviyita namtima wentse, kana uliutsogoleli anifanila kusewenza namphambvu. kana uchiwonesa ntsisi kwaanango , bzviiyiteuchikondwa. ⁹ Chikondi chikhale chilibe ukhuphe. Tayani bzvakuyipa muphatilile bzvimwebzvo bzvabwino. ¹⁰ Muchimbachita chikondi pachibale, mukhale muchibzvichepesa, nakuteeya ulemu, muwe nawulemu kuna munango namunago. ¹¹ Seyenzani bzvamphambvu, musayite utofu. Phatilani Mpfumu namtima wentse. ¹² Khalani mudakondwa mukunyanganila kwanu, khalani namtima utali mukushupika kwanu, ndiye pemphelani nthawe zentse. ¹³ Gawanani bzvinthu bzvanu naabale awo wakulungama waMulungu. nyanganani njila zabwino zakuwaphata nazo kuwawonesa chifundo. ¹⁴ Dalitsani amwewo ankuzunzani; aphempheleleni kuti adalitsiwe nee kuti atembelelewe. ¹⁵ Kondwani naawo anikondwa, lilani naawo anilila. ¹⁶ khalani bwino kunamunango namunango. Musabzvikode , koma yitani ubwenzi naawo aninyanganiliwa pantsi naanango. Lekani kubzviwona ngati ndimwe mwekha mudachenjela. ¹⁷ Musapagale chakuyipa kana mwachitiliwa chakuyipa. chitani bzvabwino pamaso pawanthu wentse. ¹⁸ Pambuto yako yita bzvinthunthu bzventse napaukwanisa napo kuti ulalame bwino namunthu wentse. ¹⁹ Mbale wangu usabwelezele, kondekana, zhayi siya ukali waMulungu abwelezele. pakuti, bzvidanembewa kuti, ''Kubwelezela nkwangu ; ndichapagala,' anilewa tenepo Mpfumu.'' ²⁰ Koma kana mdani wako ananjala mpase chakudya. kana ananyota mpase chakumwa. pakuti mukachita ibzvi, muninga wamuthila masibe yamoto pansolo pake.'' ²¹ Musakuliliwe nachakuyipa, koma mukulile chakuyipa nachabwino.